Read Nalca RASUL 7 Bible Online

RASUL 7 - Nalca bible

RASUL 7

¹Yahudi yuba wa gakaʾ dubnya bedya Stefanus bek, ”Ban nidyaʾ alja wenyalamla aboka yana kinjak ara aldib gom?” aboka heimok.

²Dara, Stefanus bedya sekoka, ”Hem yab o, nadya neyung yab o, ugunda nak kebnenulum. Abraham bera Haran heik biniboka unggulumok salek anam Mesopotamia heik or anam ulumok salek hyak senenggomaʾ imiknya Imik Neyung bera Abraham bek yeiniboka,

³lemokja, Anja mok soko ek, an kabo nim ek lobmenekanya, eimik nadya anak aawoka lebgenya sokok binilam, wenyaboka lemok.

⁴Wera danyek, Abraham bera Kasdim sokok loboka, Haran moko e soboka ulumok. Wera Haran heik ab Abraham alja neyung be soboka danyek, Imik Neyung adya Abraham bek mok sokok enyegan neyung yabo wen ululum ak an beil bilimok.

⁵Ban salek era, soko enera Imik Neyung adya Abraham bek nera anja yokaʾ soko danamla aboka Abraham bek anam eleganggumok. Dara, yan sang hnonok sibin anaba mekaʾ nera ansamba munaʾ gobda lebgen aboka elegoka lebnenggumok. Bok Imik Neyung adya dara, soko enyek Abraham bemba hnon, al nang yilaʾ eimik lunuwoka nelemeija nang amba hnon, eleganesin amok. Dara nera, Abraham bera me yak danggumok bok lemok.

⁶Alda Imik Neyung adya Abraham bek okoka lemoknya nera, An nang yilaʾ ara, eimik yok nang sokok sam sekel yanggan nang dangoka ulumnemak. Dara, sik an nang yilaʾ sekel bilimeija sokok nang adya dara, sikenek igin yakaʾ kweiyiwoka, yeiriwoka bobnenewoka ulumeija salek era, gibnaʾ denga odaraʾ badya anaso lebnamla.

⁷Bok, sikenek igin yakaʾ kweiyiwoka malyaʾ seneleseija sokok nim era, nadya sikenek yana lelewoka igina boyiwanesin. Dara, Abraham an nang yilaʾ ak dara, ban sokok loboka nadya anak lebnenggen sokok sam an yeiniboka nak giblemnenyak, hyok.

⁸Imik Neyung adya ban wenyaboka Abraham bek seleb lebgogomok dara, wera dib unubdanamab bar aboka, bolaʾ garanaʾ beknaʾ elegemok. Wera an adya, Abraham bedya me Ishak beibok dara, linbadya sum mabok dara, alja me nek bolaʾ garamok. Dara wera onoʾ, Yakub bedya dara, alja mab obadya nang ek Israeli nang edya neyung yab ugumaʾ nang beibok dara, bolaʾ garasuk.”

⁹”Dara, nunja neyung Yusuf bera alja hemyab edya hmana leboka rupiah amba dekek dara, Mesir sokok sam ek wa wenya dangamok. Bok, Imik Neyung adya alak arawoka pe bo uboka,

¹⁰onoʾ Imik Neyung adya Yusuf bek yokaʾ-yokaʾ igina kwelemok bok alak bleboka sekiyimok. Dara, Yusuf bek Imik Neyung adya geremseng unaʾ ab, ganya pe seininaʾ ab, elegemok dara, wera anadya eimik Yusuf bera Firaun bek yuba sabnom aboka byuk sum era pe lebok dara, Firaun bedya perob senewoka alak Mesir soko dubnya sekiyiwoka, Firaun bedya senenggom e ab, yokaʾ-yokaʾ welemokaʾ nidyaʾ ab ara Yusuf bek elegemok.

¹¹Dara wera, yok sum enyek Mesir sokok ak Kanaan sokok senenggom gwaneng okaʾ enyek bukumek dara, nimi nauba gwaneng ok adya gwekdo balamek. Dara, nunja neyung yab era gwaneng doboka demenggom dangamok.

¹²Wera gwaneng okaʾ bukumek sum enyek, Yakub bedya Mesir sokok ara gandum nauba ulumla an yuba kemok dara, nunja neyung yabo youmaʾ nang ek, Yakub bedya alja mab ek wera dekel busululum aboka orugumok. Dara, men youbuka dekel bilimeknya nera an.

¹³Dara onoʾ, li penenya sum dekel yeknya nenyek, Yusuf bera alja hemyab ek, nara Yusuf bera nara an aboka laga aabdangamok. Wera danyek Mesir sokok dubnya Firaun bedya dara, Yusuf bera ban ben alja mabo silibaʾ senewoka ella dangamok.

¹⁴Wera danyek, Yusuf bedya alja neyung Yakub bek, neyung anja mab ek nidyaʾ Mesir sokok yoululum aboka yuba beiyimok dara, wera Yakub mabo silibaʾ ara Kanaan sokok abaʾ ara Mesir sokok nimi denga penya ebdobnya sekdigin nang yibilimek.

¹⁵Wera Yakub bera seleb Mesir sokok yibiniboka ulumokaʾ ara, al Yakub be nong ab, nunja neyung yabo youmaʾ nang nidyaʾ ab dara Mesir sokok ab somogomek.

¹⁶Dara Israeli nang edya Mesir sokok ab ara, sikja beʾ nera, Abraham bedya Hemor nang yilaʾ ak ab Sikhem sokok dekemok ak, ban soko lokoka dil bilisik.”

¹⁷”Dara, Imik Neyung adya Abraham bek unuwanamna amokaʾ ak gigiwanamla salek era oka danggiga balamok dara, wera Mesir sokok ara Israeli nim ok likoka nauba danggiga balamok.

¹⁸Dara ban salek danyek, Mesir sokok ara, Yusuf bek elgom ulumok yok Firaun dubnya bedya sekoka wenelesuk.

¹⁹Wera ban sum enyek, Firaun nunja nimi yilaʾ ek igin yakaʾ kweiyiwoka malya nenellilisuk. Dara alja lelemok ara, nim edya wenyok beilinaʾ me nera beiyik gwab loboka somoklenok aboka dukaʾ lolowoka bologollilisuk.

²⁰Dara, unulumok salek Musa bera beibok. Dara alda ok adya kemen danaba, perob nong me an senemok. Wera Musa bera walaʾ winilya alja neyung bedya ek moma diniwoka bo ulurek.

²¹Wera Musa bek okok byik dara, Firaun bedya gelma edya doboka, alja ek alja beiyimokaʾ yokaʾ anaso dangiyiwoka oklomok.

²²Dara, Musa bera alda hyak Mesir nang edya ella ulumeknya nera, nidyaʾ ella danggiga balamok. Wera danyek Musa bera senenggom migibnya dangoka, alja unulumok ab yuba sanaʾ ab dara, hyak pelemok.”

²³”Wera Musa bera alja gibnaʾ seleb denga hnonok ebdobnya mekbadya ubok dara, alja ganya ek nadya mok nim Israeli nang era hekaʾ anaso uldolomak do senewoka kemel binisin senemok.

²⁴Wera kemel bilisuk dara, Mesirnya eb, Israelnya beb, penya oldalarek eibsuk dara, Israelnya bek mala doboka bleboka, Mesir heik yokaʾanya bek dibaʾ omok.

²⁵Musa bedya dara, alja mok nim edya nak Imik Neyung adya sik nong blebsululaʾ aboka arawananelaʾ ara ella ubnemak senemok bok, Israeli nim edya dara, Musa bek blebsululaʾ aboka ulusil senewoka ella danggumek.

²⁶Dara, ampum so maboka gwelegok dara, Musa bedya Israeli nang penya nang sik moumen oldalarek eiyisuk. Dara, alja bleboka hiyiwosunun senen ulumok. Dara alja, Hemyab o, ugun moumen bok anasa hekasa oldalarum do, wenyaboka heibsuk.

²⁷Bok alja hem bek olomoknya bedya, Musa bek bleblesuk ara mok sam walda beiyiwoka lebok ara, Anda heknedya unu yana lelesinya ululul aboka jaboka sekiyinjok do?

²⁸Anda ampum ara Mesir nang omom sok sumen nak obnunaʾ aboka lelenelem do, hyok.

²⁹Ben nedya alak wenyal yabokaʾ kebok dara, Musa bera Mesir sokok ab yeiri bindiwoka ulumok. Dara, Midian sokok ab me penya beiyimok.”

³⁰”Musa bera Midian sokok ulumok salek era, gibnaʾ denga hnonok uboka ebdobnya mekbadya dok dara, Imik Neyung lero ara, Sinai mein berem hola seknenggulumok sokok sam ara, uk bokaʾ lologoka singilimok gal gangganek sam sekemok ak, Musa bera eiyimok.

³¹Dara Musa alda nera hekaʾ do senewoka ganya loka daboka, nemen oka gelelinga biniboka keeboka borolomok enyek, Wenelesilnya Imik Neyung bedya yub era uk bokaʾ lomok ab uboka lemokja,

³²Nara anja neyung yab youmaʾ nang edya Imik Neyung ulumna e. Nara Abraham bedya, Ishak bedya, Yakub bedya, sikja Imik Neyung era nara alan ulumna e, hyok. Dara, Musa bera loka daboka ber-ber alamookanya, kemenaʾ loboka hogung lilibdangamok.

³³Dara onoʾ Imik Neyung adya Musa bek saawoka, Musa an sekelam soko era perob geisa soko anasa, anja yan sang ongonaʾ ara anyagan gwirib loblom.

³⁴Nadya nimi Mesir sokok sam igin yakaʾ kweboka nauba kwellilisil ara eibna. Dara, sikja molonaʾ ara seleb kebnakanya, sikenek blebnesin anasa, nara wen yinggin. Anasa wera, nadya anak Mesir sokok sam nekdo bilom aboka sekiyiwagen, aboka lemok,” hyok.

³⁵”Musa al ban Musa benyek Israeli nimi nong edya alak, Heknedya nuk bo uboka, yana lelesilom aboka sekiyinjok do aboka wekdo dorogomekaʾ onnya bedya al nenesa leboka unumek bok, onoʾ alja Imik Neyung lero adya gal donggalek sam yeiniboka, bo usinya uboka blebsinya nenewoka Imik Neyung adya Mesir sokok bokol bilimok.

³⁶Dara, al neik Musa ben edya Israeli nimi Mesir sokok ab bleboka bo uboka, onoʾ alja senenggom lok so ab, beknaʾ ab, unulumok ara, Mesir sokok hnon eneng mek gwan ek sam hnon, holaʾ seknenggulumok sokok sam hnon, unuwoka gibnaʾ denga hnonok ebdobnya mekbadya meewoka bo diri balasuk.

³⁷Dara al neik Musa bedya, Israeli nim ek, Ugun gangganek ab nak gaboka donyok sok, eimik ununumnaʾ lenya be hnon doboka sekiyiwanamla, amoknya bera alan.

³⁸Dara, al Musa holaʾ seknenggulumok mok hwalek sam Israeli nang ablaboka ulumek. Nunja neyung yabo youmaʾ nang eb, Sinai meinik sam alak samok lero eb, alablaboka yabalamek. Dara, al Musa bedya nim embengaʾ unaʾ yub era, Imik Neyung adya elegemok dara, onoʾ nuk eleklesuk.”

³⁹”Bok, nun nang yilaʾ edya Musa bek alja lelemok yuba hyak bleklemek. Alak lek senewoka, ganya lomok ara Mesir sam on pik binimab senelemek.

⁴⁰Dara, Israeli nang edya Harun bek, Nunda yokaʾ ak nunja dubnya nenewoka giblemnemab dara, alja bo binisil anasa, sunuwoka meeweisilom, hyek. Dara, Nunda Musa bedya Mesir sokok ab bo yalasilnya bek, wera hekaʾ hubok ara elgom ulumab bar, aboka lelemek.

⁴¹Dara ban salek enyek, Israeli nang era, sapi pam ak sunuwoka, nunja neyung ara al anye aboka, pama oboka masa ab giboka deregoka, sikja soruk adya meemek sununaʾ amba hnon beiyiwoka, giboka, bera seboka eiya hlaboka giblemek.

⁴²Dara, unulumek anyek Imik Neyung adya eiyiwoka imik ulumla guraʾ enyek giblenok aboka Imik Neyung ara sikenek soruka lobonggosuk. Ban unuwanamoknya nenesa geklewoka men ununumnaʾ lelemek nang edya momnya dobek ara, Wei, ugunda Israeli nang o, ugunda holaʾ seknaʾ mok sam pama garawoka beiyiwoka giblelum gibnaʾ hnonok ebdobnya mekbadya leboka ara, na Imik Neyung nong amba ununggululum.

⁴³Ugunda Molokh bedya gibnaʾ e nek, Refan guraʾ anyek, ugunja nunja migibnya bera anya aboka giblenob aboka bo yabalalum. Anasa, ugunuk nadya doboka hyak mok Babel mok ek boboganesin, aboka momnya dobek.”

⁴⁴”Imik Neyung sik gangganek ulumok an beknaʾ pam bokaʾ e ara nunja neyung yab Israeli nang edya, holaʾ seknaʾ orok sokok sam bo yabalamek. Ban e nera, Musa bek Imik Neyung adya ban unuwoka sobnelum aboka nekemok sok sunuwoka somek.

⁴⁵Dara wera, al on Imik Neyung e nera, Musa seleb somogok dara, Yosua bedya Israeli nimi doboka bobok dara, Kanaan sokok bindiwoka, Imik Neyung adya yok nim men ulumek nimi yakasuk dara, sikja soko dangoka ulumek salek anaba, moruwoka bo yabalamek. Dara, Imik Neyung e nera or ulmoublemok ara Daud lunuwoka nebok dara, wera sidyaʾ dakok.

⁴⁶Daud bedya Imik Neyung ganya ak yongona geboka, Yakob bedya giblemok Imik Neyung amba, e sobnun aboka Imik Neyung ak molomok.

⁴⁷Bok, Imik Neyung e sunuwoka son dara, Daud bedya me Salomo bedya somok.

⁴⁸Bok, Imik Neyung migibaʾ senenggomaʾ ululanya bera, alda nimi solomak ek sam unggulumla. Nenesa leboka, ununumnaʾ lelemek nang bukuk sam momnya dobok an:

⁴⁹Imik Neyung wenyalamla ara, Im ara nadya ekla bunaʾ. Soko ara nadya yan sang liginaʾ. Anasa wera, hek e nek nasamba sobnanulum do? Nasamba dek-deka son oulyang ara har sam ubnamla do?

⁵⁰Yokaʾ-yokaʾ nidyaʾ ara nadya soruk adya uyiwanggumsa de? wenyaboka lelemla, ara momnya dobok.”

⁵¹”Hemyab o, ugunda hyak ganya gasa uboka Imik Neyung yub ak dib senenggululum anyek hyak lok nong. Ugunda Imik Neyung yub ak sene o onugamna anasoʾ ok ululum. Ugunja neyung yab edya Imik Neyung Geisinya ol yangalemek sok, ugumba unulum.

⁵²Ununumnaʾ dib Imik Neyung yuba lelemek nang nidyaʾ ugunja neyung yabo edya olomek. Imik Neyung me pelelanya bera eimik yanamla aboka, men yub lero yalamek nang anaba olomek. Bok wenera, Imik Neyung bedya jong ganya ulumla me nek ugunja yuba sonda adya miniwoka oblum.

⁵³Imik Neyung lero nang edya unuwanalum an yuba seleb elegesik bok, ugunda dib senewoka unuwanggulumukanya, nak an henga gouboka olonulum,” wenyaboka ban nidyaʾ ara, Stefanus bedya lebok.

⁵⁴Yahudi yuba san nang edya, Stefanus bedya lelemok yuba kemek dara, sikja ganya oblumugoka mona yeilib menegesuk dara, sikda Stefanus bek si gleng darawoka yu ganya bomek.

⁵⁵Bok Stefanus bera, Imik Neyung Geisinya adya deknewoka ulumoknya adya imik sam kemelemok enyek, Imik Neyung dilinaʾ yebokaʾ eiyimok. Dara, Yesus ara Imik Neyung bedya sirikek sam sekemokaʾ ak eiyimok.

⁵⁶Dara Stefanus bedya, ”Wei wera, ugunda kendelulum. Nara im pik gaboka ublakanya, nimi dibaʾ me Yesus ara, Imik Neyung sirik soruk sam sekemla eibna,” hyok.

⁵⁷Dara, ban mamagamek nang edya, Stefanus bedya wenyal yabok yuba kel yabek dara, o lebdangoka hema doboka Stefanus bek oka we denel biniboka,

⁵⁸alak mok beiyek bo yeiniboka girik adya oro yabek. Dara, Stefanus bek olomek nang edya dara, gobenenya si Saulus bek sikja boksom era alja nong eilib beiyimek.

⁵⁹Wera Stefanus bera girik adya anam saboka olomek salek, Imik Neyung ak molowoka lelemokja, ”Wenelesilimnya Yesus o, nadya ganya an doboka beibnelom,” al yabok.

⁶⁰Dara onoʾ, hnon komo lumugoka Imik Neyung ak yuba bii aboka lemokja, ”Wenelesilimnya Imik Neyung o, ban unulumak malya unaʾ era sikenek lunuwoka gwirib lobsimenek lobnelam,” aboka molobgogomokaʾ seleb dara, alda dib somogomok.