Read Nalca ROMA 11 Bible Online

ROMA 11 - Nalca bible

ROMA 11

¹Dara nara heibnesin: Imik Neyung ara alja nim era seleb ugunda na lek hyok de? Hyak orok, wenyhenggubuk! Nababya Israeli nang, Abraham bek ab mengebgiga, Benyamin nang yilaʾ ak abnya.

²Imik Neyung ara alja weboka dosuk nim era lek aboka yaknenggubsuk. Goma, Elia bera alda Israeli nim emba leboka Imik Neyung ak anaso unulumak al bilimokaʾ Imik Neyung yuba momnya dobokaʾ ak sam momnya dobokaʾ ara, ugunda elgom ululum de?

³Nekel bilimok yub era, ”Wenelesilimnya o, sikda anja ununumnaʾ len nang era seleb omak, anak uka daboka gibnaʾ oulyang era sikja seleb golob menegerob; anya nanagok nabayokaʾ or unanya nera, sikda nadya embengaʾ unaʾ era gwenewoka dobnobaʾ umak,” aro yuba bo bilimok.

⁴Wenhyok bok, Imik Neyung ara alak hekaʾ hyok do? ”Nara nasamba dara, Baal ak gibnenggulumak nang enyek, denga salyaʾ anyek denga sekbadya or lomna,” wenyaboka lebok.

⁵Neikso wenebabya, or wanaʾ uboka eleksinaʾ adya sunuwoka denga hnonok so or ulumak.

⁶Bok ban nera wanaʾ uboka eleksinaʾ adyakanya, yok ununaʾ adya gom. Wera anaso unuwanggunumso dara, ban wanaʾ uboka eleksinaʾ ara wanaʾ uboka eleksinaʾ wenyhenggunuseng.

⁷Anasa dara har so do? Israeli nang edya we doblemoknya nera dobnenggubuk, bok nang enedya dobnamak aboka webok nang edya dobek. Dara yok nang era gasa ganya bobek,

⁸nera an momnya dobok sok ulumlaʾ ara, ”Imik Neyung ara sikenek lobaʾ hogung ganya mayiwosuukanya, eibijek aboka eilinggom heng eb, kenggom o neb danyek elegousuk.”

⁹Anya Daud bera wenhyok, ”Sikja senenggomaʾ memewoka delemaknya nera, weboka younaʾ yinaʾ heng ab, weininggeldanaʾ ab, siksamba diriknaʾ ab dangalamnamla.

¹⁰Dara sikda eibijek aboka, sikja heng era gunaʾ nenewanalamakanya, sikja gwadya yok ara sobaʾ geinildilimnesilim,” wenyaboka lebok.

¹¹Dara nara heibnesin: Sikda ouluka dibek anasa malyingginimak de? Hyak orok nong! Bok sikja meknenaʾ enesa, sikda soloma dabsulul aboka, blebsinaʾ damok ara yok mok soko nim ek byuk.

¹²Anasa sikja meknenaʾ enedya, mok soko ara dub gebeyiweekanya, sikja mek ok unaʾ era, yok mok soko nim emba dub danganaʾ ulumla, dara hyak nauba so ara sikenek pe munaʾ gobdo pewousuk.

¹³Wei, Yahudi gom nim o, nara ugunuk wenyhenesin. Wera na nong ara, Yahudi gom mok soko nim emba yub lenaʾ gaknya ulumna anasa, ban yub damok era nadya welemna wa senenggomaʾ perobaʾ ara wera an senelamna.

¹⁴Wera anedya nara nim ek sam dara, nadya mok soko nim ek sikja ganya soloma gebnesisinya adya, sikenek nimi wene nimi hnon blebnesisinya.

¹⁵Anasa sikja nunda lek hyek adya, yok mok soko nim enyek, Imik Neyung ab neikaʾ hibek. Dara ganya or perob senewoka dobneseng dara, wera somoknaʾ nang ek ab embengaʾ ulumak bok, yok damok hnon lanawanamso de?

¹⁶Wera anasa, men nong roti gwaneng enyek perobaʾ ak ulumla dara, wera nidyaʾ yoklomaknya neneba perobaʾ ak ulumla. Dara onoʾ yarenga damok anaba perob dara, wera nidyaʾ soruk pik anaba perob.

¹⁷Anasa gal soruka wen seleb dibookanya, ugunda nong salyaʾ bongolamla gal enesoʾ anyek an seleb soboka makok dara, wera nidyaʾ hiboka Zaitun siligaʾ ok ulumla gal ak an maklum.

¹⁸Dara ban al soruk enesa leboka, ugunda hamaʾ daknenggom, mem! Bok ugunda hamaʾ daknelum dara, banyek seiniwanalum, anera ugunda an yareng enyek an maknenggublum, bok yareng enedya ugunuk an makal yousuk.

¹⁹Ugunda onoʾ, gal soruka wene bologokaʾ ara, nak anyegan yok hmoka anasoʾ siligoulaʾ aboka unuwok, henesom. Bok,

²⁰dara perob! Sikda an unu bologokaʾ ara, sikja ganya dib senenaʾ orok anasa unuwok. Anya ugunda jongaʾ ikoka mel-mel eiyiwosuk ara, ugunja ganya dib senewolum adya unuwok. Anasa ugunda ganya habmereng henggunulum, bok hyak lok ganya bolomnelum!

²¹Nera Imik Neyung ara men gal soruk yokaʾ enyek wanaʾ unggulumso dara, wera albabya ugunuk wanaʾ ubnenggunusil.

²²Wera anasa, ugunda ban Imik Neyung alja pe yongon ganya eb, alja ganya gasa geboka unuwokaʾ ara, sik seleb malyinggek nang ek ara gasa so unubok, bok sikja ugunda ganya pe yongon uboka elegousukaʾ anyek pe seinilimnelum. Anera banaso, ugunda alja pe ganya yongonaʾ ak ubmoubnelum dara, anera ugunuk ulumnesil, bok orok dara, ugumbabya soruka diboka boboganasil.

²³Bok onoʾ sikbabya, sikja ganya dib senenaʾ orok ganya enyek lobnamak dara, Imik Neyung migibnya bek ululanya anasa, sikbabya eimik era soruka onsok diriganamla.

²⁴Dara ugunda salyaʾ beiyik bongomna Zaitun gal enesoʾ anyek seleb garawousuk dara, ugunja unaʾ ek keeboka dara, nera unuwanggunumso bok, ugunda Zaitun nim adya pe melemaknya nenesoʾ anyek seleb garawoka dobsuk. Bok hyak nauba so ara sik ban sikja nimi yilaʾ sunuwoka, sikja Zaitun gal yokaʾ nong ak an soboka mebnamla anyek hnon nauba so.

²⁵Hem yab nang, wera anedya ugunda nunugok hyak ella ulumab senewoumunuk anasa, ban damok enyek ugunda ella doululum aboka, nara wenyhenesin: Israeli nang era sikja ganya hyak gasa adya, yok mok soko nim enyek hyak nauba wekel yok.

²⁶Wera an pik uboka, Israeli nang era eimik era blebnamla. Nera an momnya dobokaʾ ulumla sok, ”Dek lunuwoka dosinya bera Sion ab yanamlakanya, alda Yakub bek ab nidyaʾ malya ulumeija nang era walawoka boboganamla.

²⁷Nara sikja malya unaʾ doboka boboganasin dara, nadya sikeneb dibaʾ wenyabdoubaʾ ara an.”

²⁸Perob lero yanggan yuba donaʾ ak sam ak dara, ugunsamba leboka, sikda Imik Neyung ab isaʾ gebdangoka ulumak, bok weboka dobsukaʾ ak sam ak dara, sikda sikja youmaʾ neyung yab danasa leboka, sikda Imik Neyung adya wanaʾ ulusil nang ek ulumak.

²⁹Wera anasa Imik Neyung ara, alda perob eleksinaʾ ab, alja yoululum hyokaʾ amba dara, angoo hekaʾ amba lelemsa senewoka ganya oka denggulumla.

³⁰Anasa dara neikik, ugunda youmaʾ dara Imik Neyung pe kenggululum, bok wenera sikjaʾ pe kenggom enesa, ugunda angoo yadyek senewoka arasina ganya era dololum.

³¹Wera neikik, sikda wenera pe kenggulumak, dara ban seleb doblum ganya enedya, sikbabya eimik era angoo yadyek senewoka arasinaʾ dobnemak.

³²Anasa Imik Neyung ara, nimi nidyaʾ ara ban pe kenggoma lomok doronggoka lekaʾ wiblebsuk, wera anedya alda ban angoo yadyek anasa men arawounun senen ganya enyek, sikenek nidyaʾ ban aboka arawosununaʾ aboka an unuwok.

³³Imik Neyung bedya bonaʾ mandebnaʾ ab, yok-yok ella dangan damok eb, yokaʾ ella unaʾ ab, ai, hyak lomok sokok yangabok anyek lok bar! Wera anedya aldib, alja yuba saboka nenyek alamlaʾ ara pe lelebdaknamenggomokanya, alja ban pik era pe lelebdaknamenggom e!

³⁴Anasa heknedya Wenelesilnya bedya ganya era ella ulumla do? Goma heknyek alak wenenanya seleb dangoka wenelemok do?

³⁵Goma heknedya alak yokaʾ hnon seleb elek lobokaʾ, alda anyek lunuwanamsoʾ ara hekaʾ do?

³⁶Dara yokaʾ-yokaʾ nidyaʾ ara alak ab, al adya, anya alamba. Anasa alak ara si imik nenenaʾ alsamba ok hyak sob-sobaʾ giblemnemeijaʾ anyek ulusulul!