Read Nalca ROMA 13 Bible Online

ROMA 13 - Nalca bible

ROMA 13

¹Imik Neyung bek ab gom mok soko dub nang era hnon unggulumak anasa, nimi yok-yok aljaʾ imik uboka wa bolomak mok soko dub nang ek ara hyak pe kelelulum. Dara an wen ulumak mok soko dub nang era, Imik Neyung adya memewoka sekeldilisil.

²Anasa heknedya mok soko dub nang ek walamla dara, alda Imik Neyung bedya unu memewoka unuwokaʾ ak walamla. Dara heknedya banaso unuwanamla dara, igin damok doboka al eilib bo dildal yanamla.

³Wera anasa, be hnon alda pe unulamla dara, alda mok soko dub nang ek lok ganya boblyek, bok alda meknewanamla danyek hnonok. Anda pemerintah nang ek lok ganya bobnenggonggom ulunun senelelam de? Dara perobnya nenyek unululom, anedya anda alak ab giginaʾ dobnelam.

⁴Anasa mok soko dub nang era ansamba perob dolulaʾ aboka, Imik Neyung ak arawoka wa wen nang ulumak. Bok anda malyinya nenyek unuwanalam dara, mok soko dubnya bera alda oldan gawa era salyaʾ hwam bonggulumlaʾ anasa, alak lok ganya bobnelam. Mok soko dubnya bera Imik Neyung adya waboka diriknaʾ anyek, wa nen sik malya ubnemak nang ek sikbabya dirigoka welenok aboka ulumak.

⁵Wera anasa, nunda ganya yok-yok sok lobdanamab, nenera Imik Neyung ara wabsilyek aboka gom, alda nunja ganya adya wenyalamlyaʾ sunuwoka unulumnemab.

⁶Dara an ganya en bololum adya ugunda sikja mok soko yok-yok amba deklemnelum alamaknya nera keboka deklelum. Wera anera sikda ban wa nen memewoka welemak nang era, Imik Neyung ak welemak adya unululum.

⁷Anasa anda nidyaʾ yok nang ek anja deklemnelamnya nera, yokaʾ amba leboka dololanya bek, wera yokaʾ amba leboka deknaʾ benyek an deklelom. Mok soko amba dara, mok soko amba donaʾ geknewanalanya bek an deklemnelam. Lok ganya bonaʾ amba dara, lok ganya bonaʾ geknewanalanya bek deklemnelam. Gibnaʾ amba dara, gibnaʾ amba donaʾ geknewanalanya bek eleklemnelam.

⁸Ugunda yokaʾ-yokaʾ bol lonaʾ ara hyak mem. Bok ugunda yok nang eb wanaʾ uldalalulum. Wera anasa heknedya alaʾ nim ak wanaʾ ulusil dara, alda Yahudi nim emba unuwanalum an yuba beknaʾ sunuwoka unulamla.

⁹Anasa Imik Neyung yub ara anaso wenyalamla, Yok gel salanggom mem, nim onggom mem, hokaʾ donaʾ mem, yok nang edyaʾ amba ganya oka denggom mem. An wenyalamla yub edya yok yub nidyaʾ ara henga sangnewoka, neikaʾ hnonok ban yub enyek an ulumla, anda nimi yok nang ek ara an nonga an dam nang wanaʾ uldalalam sok, yok nang eneba unu wanaʾ ululom!

¹⁰Ban wanaʾ unaʾ ara nim ak ara malya nenewounun senenggulusil. Anasa, wanaʾ unaʾ ara unuwanalum an yub ak gigiwokaʾ ak ulumla.

¹¹Ugunda ban wene salek unulamla uruma era ella ululumaʾ ara, ugun mablumaʾ ara buknelum salek seleb danggiga balamla anasa, ban wenyalasil yub era al unulumnelum ok. Anasa blebsinaʾ ara nunda men anam ganya dib senewoub salek ek ab dara, wenera hyak seleb ok berem nong ulumla.

¹²Mok soko ara seleb inibdouluwoka, wera bereganamla salek. Wera anasa nunda wera gunaʾ hnoum ab ununanya nera lobibyekanya, dilinaʾ adya mal yin enyek enegoka ulumnemab!

¹³Anasa nunda yubyek danyek ulumak diligaʾ ganya namenaʾ anyek pe ulunob. Salyaʾ eiya hlaboka bolowoka dero yabanaʾ mem, yu mek denaʾ mem, malya unaʾ ak molonaʾ hogunga bobmoubuka, salyaʾ salaldanaʾ ak unggom mem, soloma daboka wabdangdo unggom mem.

¹⁴Bok Wenelesilnya Yesus Kristus anyek dilinaʾ yin mal nong geboka ongolomunukanya, ugunja nong era ganya ok denaʾ amba hmanggom mem.