Read Nalca ROMA 14 Bible Online

ROMA 14 - Nalca bible

ROMA 14

¹Ganya dib senenaʾ hmengnya bek ara, aljinya leblenya nera keb loboka doblom.

²Dara hnon nang ara, ganya dib senelamlakanya, yok-yok denaʾ nidyaʾ ara or delemnesinya senewanalabok, alja ganya hmengnya bera, or meklaʾ masa ok delemla.

³Imik Neyung ara ban benyek seleb dolomla anasa, denelanya bedya, denggubija nang ek derenaʾ mem. Anya onoʾ denggubija nang edya, dija nang ek yana lelenaʾ ara mem.

⁴Anda heknedya, wera nimi yoknya bedya wa wenya benyek yana lelelelam do? Alda malyingginimlaʾ gom, alda or seklemnamlaʾ gom ara, nera alja neyung bedya memewanamla. Bok Imik Neyung adya memewoka bo ulumnamla anasa, alda sobaʾ seklemnamla ok.

⁵Be hnonja dara hnon sum enyek dibsokanya, yoknya dara malya so senelelabok, onoʾ yok nang edya dara, nidyaʾ ara perob ok senelamla. Anasa nimi yok-yok alja ganya adya anyek aldib perob senewalya dara, or senelemnamla.

⁶Heknedya ban yok hnonoknya nok salabmoubnamla dara, alda Imik Neyung amba unulumnamla. Anya heknya denaʾ denemna dara, alda Imik Neyung ak perob aboka giblamla anasa, alda Imik Neyung amba unulamla. Dara onoʾ heknedya alda denaʾ denggunumnekanya, albabya Imik Neyung ak perob aboka giblamla anasa, albabya Imik Neyung amba unulamla.

⁷Nenera banasa, nimi be hnon nu gangganek ara, al damnya amba ok ululanya bera hnon unggulumla. Dara onoʾ nimi be hnon al damnya amba ok somoklelanya bera hnon unggulumla.

⁸Anasa nunda embengaʾ ulumab dara, Imik Neyung amba ulumab. Anya nunda somoganamab dara, onoʾ Imik Neyung amba somoganamab. Wera anasa, embengaʾ unaʾ gom, somoknaʾ gom, nidyaʾ ara nunda Imik Neyung aljinya ulumab.

⁹Wera nenesa leboka, Kristus ara seleb somogoka embengaʾ subuk. An unuwoknya nera, alda somoklemak nang ab, or embengaʾ ulumak nang ab, siksamba wenesinya dounun aboka unuwok.

¹⁰Bok anak dara, anda hekaʾ amba anjaʾ hem bek yana lelelelam do? Anya anda hekasa anjaʾ hem bek waboka derelelam do? Unululam bok, nunda nidyaʾ ara Imik Neyung adya pe yana lelewoka ubnesil ekla berem neikaʾ bo beildal binimab.

¹¹Nera an momnya donaʾ ulumla sok, ”Imik Neyung yub ara anaso lelemla, na embengaʾ ulumnaʾ anasa, nimi nidyaʾ ara na saramek koma lumugoka bul yanamaakanya, nimi nidyaʾ Imik Neyung ak giblemnemak.”

¹²Anasa, nunda yok-yok aljaʾ saramek sekoka, nara anasa-anasa unulamsa aboka al hogung ak laga wenyhenemab.

¹³Wera an unuwanasil anasa, nunda dukaʾ lolowom aboka yana leleldanaʾ ara mem! Bok ban ganya en boboka wenyalamak yub enyek bobnemab. Nunda nunjaʾ hem bek boroboublingganyek, gom ouluk diknaʾ girik dangiyiwanyek mem, senelemnemab!

¹⁴Nara Yesus pik ab uboka ella ulumnekanya hyak aldib senelamnaʾ ara, yok-yok denaʾ ak dara, malyaʾ ara hnon unggulumla. Bok ban yokaʾ-yokaʾ ara sembejaʾ ak ulumla senelemak nang enyek, sikenek danyek, sembejaʾ dibaʾ ara an ulumla.

¹⁵Anasa anda an yokaʾ hnon delelamakanya, anjaʾ hem bek alja ganya soloma dabel dililam dara, wera anda wanaʾ uldalalulum alamla yub ek sunuwoka ununggululam. Kristus ara alsamba seleb somogok anasa, anda denaʾ anasa leboka anjaʾ hem bek somogoldinaʾ ara mem.

¹⁶Or perobaʾ anak an ulumlaʾ ara, derelenok senewoka ganya ngogol lobnenggom, mem.

¹⁷Anasa Imik Neyung adya wenesinaʾ era, denaʾ mek arabaʾ ak unggulumla, bok Geisinya adya pik uboka perobaʾ nenenaʾ ab, ganya pe namenaʾ unaʾ ab, ganya eiya daboka unaʾ ab, danyek ulumla.

¹⁸Wera anasa heknedya ban nenyek sunuwoka Kristus ak welemla dara, Imik Neyung bek ganya hekeldilimlakanya, nim adya dara alak wa bobsuukanya welesilnya benyaʾ senelemak.

¹⁹Anasa nunda ganya pe namenaʾ unaʾ ab, wenebdangoka ganya pe unaʾ ab, damok en lanawanamlyaʾ anyek yeiriwoka doblemnemab.

²⁰Anda denaʾ anasa leboka Imik Neyung wa wenaʾ malya nenenggom, mem! Yokaʾ-yokaʾ nidyaʾ ara geisaʾ ak ululabok, denaʾ anasa leboka yok nang ek ouluk diknaʾ girik dangalalanya benyek hyak omom nong ak ulumla!

²¹Anasa pam soub gom, anggur mek gom, or yokaʾ anyek, anjaʾ hem bek ouluk diknaʾ girik danemlya ara anda denaʾ lobnesom dara, hyak perob.

²²Anda an nong anasa leboka, anja dib senelelam ganya enyek Imik Neyung saramek salabmouboka ululom. Be hnon ban nera perobnya nenyaʾ or unuwounun senewoka al nonga yana leleldanggululanya bera, alda pe ulumla.

²³Bok heknedya alda yokaʾ ak delemlekanya, ganya elelanya bera, alda ganya dib senenaʾ anyek sunuwoka ununggulumlaʾ anasa, alda seleb henga goubukaʾ ak ulumla. Anasa yokaʾ-yokaʾ ara ganya aldib senenaʾ anyek sunuwoka ununggulumak dara, malya unaʾ ulumla.