Read Nalca ROMA 15 Bible Online

ROMA 15 - Nalca bible

ROMA 15

¹Nunda migib ulumab nim era sik hmeng ulumak nim ek sikja hmeng enyek nunja dob salalemnemabakanya, nunja perob senelemabnya nok ganya dobom-dobom yok-yok enaʾ mem.

²Nu gangganek ara nimi yok-yok nunja nim edya ganya eiya dabnaʾ anyek, alak perob danggiga balamnamlaʾ anyek yeiriwoka elemnemab.

³Kristus anaba alda alak eiya dabnanya nenyek enggulumok anasa, bok alda an momnya dobokaʾ ulumla sok, ”Sikja yuba saboka derenaʾ, anak unu derelenjakaʾ ara, nasamba seleb wenyaboka unuwanyek.”

⁴Anasa nidyaʾ yokaʾ-yokaʾ men danyek momnya doboknya nera, nuk anyeganyeb ella danamak senewoka seleb unu momnya dobok. Wera anedya nunda pe ganya gouluwoka salabmoubnaʾ ab, geisa Imik Neyung yuba momnya dobokaʾ ak ab ganya sangaldisinaʾ ab dadya, ganya welemnamab aboka unuwok.

⁵Dara al Imik Neyung ganya goulunaʾ damok ab, ganya sangallinaʾ damok ab eleklesilnya bedya, ugunda Kristus Yesus senelamlaʾ sunuwoka balalum sok, pe ganya kwebdangoka ugunuk eleklesulul.

⁶Anedya ugunda nunjaʾ Wenelesilnya, Yesus Kristus alja Imik Neyung, alja neyung bek hnon, hnonok ganya boboka, neikiwok leboka alja si imik nenelelulum, senelamna.

⁷Anasa Kristus ara nuk Imik Neyung ak perob giginaʾ amba leboka seleb dobsuk sok, ugumbabya yok nang anaba pe keboka unuldalalulum.

⁸Ban nadya lebnanya nera ban nenyek lebna, Imik Neyung adya perob nenesinaʾ amba, Kristus ara nunja youmaʾ nang ek wenyalasukaʾ anyek sunuwoka unuwoununaʾ aboka, alda bolaʾ garan nang edya wa wenya seleb dok.

⁹Anya yok mok soko nim era, sikda Imik Neyung ak alja angoo yadyek senewoka arasinaʾ anasa leboka giblemneseng uruma geknewoulul aboka unuwok. Nera an momnya dobokaʾ ulumla sok, ”Anasa nara yok mok soko nimi gangganek ab anak giboka, anja si amba mazmur ber adya seboka giblemnenggen.”

¹⁰Onoʾ hnon leboknya nera, ”Wei, yok mok soko nim o, alja nim eblaboka eiya hlalalulum.”

¹¹Hnonda, ”Wei, ugun yok mok soko nim o, Wenelesilnya bek giblelulum, or perob, nidyaʾ yok-yok mok soko ulumak nimi yilaʾ dumung era alak giblululum.”

¹²Dara Yesaya beneba wenyalamokaʾ ara, ”Isai bedya damok ab be hnon lanawanamla, alda yok mok soko nim ek wenewousunun aboka lanawanamla, dara yok-yok mok soko nim era alak ok ganya dib beiliwanamak,” wenyaboka lelemok.

¹³Wera Imik Neyung al ganya wenaʾ damoknya bera, ugunuk nidyaʾ eiya bon ganya eb, pe namenaʾ un ganya eb, ugunja ganya dib senenaʾ pik uboka nidyaʾ gigiwoka unulusulul. Anedya ugunda Geisinya migib pik uboka, ganya wenaʾ ara hyak nauba danggiga balamnelum.

¹⁴Nadyaʾ hem yabo nang, ugunuk pe ununaʾ adya seleb deknewosuukanya, yok-yokaʾ ella danganaʾ damok eb, or pe ganya adyok wenebdanasom ara, nara seleb ella ulusin.

¹⁵Bok Imik Neyung adya wanaʾ uboka eleksinaʾ anyek, nak seleb eleganyoknya nenesa, nara or ono sam gom, anasam gom, ugunuk hnon an wenyamsaʾ anyek ella ublulum aboka, asaʾ gebdangoka momnya doboka an seleb beibsisa.

¹⁶Wera anera nara, sik Yahudi gom mok soko nim ek, Geisinya bedya munaʾ yok geisa nenewousukaʾ anyek, Imik Neyung adya alak pe giboka beibnyak senewoka doblul aboka, Yesus Kristus wa wenya dasakanya, Imik Neyung adyaʾ perob lero yanggan yuba Yahudi gom nim ek lero yabalamna.

¹⁷Anasa nara nadya Imik Neyung amba welemna wa nemba leboka, Kristus pik ab dara, nara or nonggo henesinya ok.

¹⁸Dara nara yok yub emba dara, asa ganya boboka wenyaro yibinggunumna, bok Kristus ara yok mok soko nimi pe keboka ununaʾ ak bo balalul senewoka, yub sanaʾ pik ab, laga ununaʾ pik ab,

¹⁹yok lok so beknaʾ migib adya hnon, yok senenggom lok so ununaʾ adya hnon, Geisinya migib adya na pik uboka, welemlaʾ anyek hnonok, nara asaʾ ganya boboka wenyaro yabalamnamna. Dara nara Yerusalem heik ab ara Ilirikum heik dongolamsa dara, nara Kristus bedya perob lero yanggan yub era hyak senenya loboka leb elekdo yibisa.

²⁰Anya ban yub en lero yabalamsa dara, nara nadyaʾ perobaʾ anyaʾ senelamsaʾ ara, Kristus si seleb ella unggulumeija nang mok soko era, yok nang edya seleb yangameija damok enyek, onoʾ nadya sounuwoka an eilib sob siklewanyek aboka, sikja mok heik era lelemsa.

²¹Anera momnya dobokaʾ ulumlaʾ sunuwoka, ”Sik anam alsamba yub enyek dobnenggumeija nang era, eimik alak eibnemaakanya, sik anam kenggulumeija nang era, eimik anyek senewoka pe ella ubnemak.”

²²Wera anedya nara li gong ugunuk yanasinya senemsa bok, pik garalenyok.

²³Bok wenera, nara anyagan mok soko era hnon wa unggulumlakanya, nara ugunuk yanamna senemsa salek era, wene gibnaʾ danyek wen senemsaʾ anasa,

²⁴nadya senelamnaʾ ara, nara Spanyol sam bannya dara, ugun ululumaʾ ak dek-deka sobnyekanya, ugunub eibdanamab senelamna. Wera anedya, ugunublaboka unaʾ anyek or mekaʾ anyaʾ senewanya dara, ugunda nak bokol bininulum senelamna.

²⁵Bok nara wenera Yerusalem heik sik bonaʾ garan munaʾ Imik Neyung mab amba bonaʾ arawoka bo balamna.

²⁶Dara Makedonia nang eb, Akhaya nang eb dara, nunda Yerusalem heikek yok munaʾ Imik Neyung mab gangganek bonaʾ garan nang ulumak nang emba arawanamab arob.

²⁷Ban wenyan dara seleb unuwanamab aboka wenyarob dara, wera nera sikjinya nek ulumla. Dara yok mok soko nim era Yahudi nim edya perobaʾ ulusilaʾ ak ab seleb dorob anasa, dara sikba yok mok soko nim eneba Yahudi nim ek sokok an ulumla bonaʾ danedya arelemnemak ok.

²⁸Anasa nara ban wa nen seleb webdaknyakanya, yok mok soko nim edya sikja yeiriwoka eboka beiyirobaʾ anyek sikenek elekgogoweisinya dara, nara ugunuk pik ab uboka Spanyol moka binimna.

²⁹Anya nara ella ulumnaʾ ara, wera nara ugunuk yanya dara, nara Kristus adya perobaʾ lelenel lomok, hyak senenya loboka unuwanasin senelamna.

³⁰Bok nunja wenesinya Yesus Kristus ab, Geisinya adya wanaʾ usinaʾ ab, danasa leboka, hemyabo nang, nara ugunuk wenewoka wenyhenemnaʾ ara, ugunub nab Imik Neyung ak molonaʾ anyek neikaʾ hiboka, nasamba mololomnemab,

³¹wera anedya, nara Yudea sam bleklemak nang ek ab pe arawoka bo ubnelekanya, onoʾ anedya Yerusalem amba webnamna wa nera, sik munaʾ Imik Neyung mab edya ganya hekoka or senewanok.

³²Dara na ban Imik Neyung adya wen senemlyaʾ sunuwoka ugunuk ganya eiya daboka yanamnakanya, ganya heknaʾ ugunub neikaʾ dobnemab.

³³Wera Imik Neyung al ganya pe namen unaʾ damoknya bera, ugunuk sobaʾ ulusulul! Amin.