Read Nalca ROMA 16 Bible Online

ROMA 16 - Nalca bible

ROMA 16

¹Nara ugunuk molowoka wenyhenesinaʾ ara, nunjaʾ hem ge Febe, Kengkrea sam yuba donaʾ nim emba wa welemla gel genyek, ugunda pe arawoka ulumnelum.

²An lebnanya nera, anedya ugunda alak Wenelesilnya pik ganya gwelelek aboka, neikso yok munaʾ Imik Neyung mab emba arawoka ulumak sok, alda yokaʾ hnon doroweisinya senewanamla dara, arawoka ubnelum. Wera alda yok nang ek hnon, na nong ak hnon, hyak nauba seleb arawousuk anasa.

³Nadya perob aboka, nadyaʾ hemyab Yesus Kristus pik neikaʾ welemab nim, Priskila, Akwila ak, an sikenek gibsin yub enyek, unu wenyaboka gibisil henelum.

⁴Sikda nak embengaʾ ululul aboka, sikja nong era seleb nuk obnesak aboka beibdarek. Anasa sikenek ara nanagok gibnenggubsin, alda Yahudi gom yuba donaʾ nimi nidyaʾ anaba wenyamak.

⁵Sikja ek yuba donaʾ nim eneba perob aboka gibisil wenyhenelum. Dara Asia mok soko, hyak men Kristus amba moubuk doka ulumlaʾ, nunjaʾ hem hyak wanaʾ ulumabnya, Epenetus bemba gibna.

⁶Ugunsamba yeiriwoka welemla gel, Maria gek hnon gibna.

⁷Na anam yuba dobnenggom enyek, Kristus lomok yub lenaʾ gak nang gangganek ara si sinaʾ nang uluraakanya, nadyaʾ hemyabo neik mok soko nang, nablaboka neika henga gouboka doronggosikaʾ Andronikus beb, Yunias beb, siksamba hnon gibsin.

⁸Wenelesilnya pik uboka hyak wanaʾ ulunanya, Ampliatus bek perob aboka gibna.

⁹Kristus wa wenya nunjaʾ hem be, Urbanus bek hnon gibna, nadyaʾ wanaʾ ulunanya, Stakhis bek hnon perob aboka gibna.

¹⁰Yokaʾ-yokaʾ ak ab dara, Kristus lomok hyak siklebdaboka ululanya, Apeles bek hnon gibna. Sik Aristobulus bedya ek nim dangoka ulumak nim ek perob aboka gibsin.

¹¹Nadyaʾ hembe, neik mok ebnya, Herodion bek perob aboka gibna. Sik Narkisus bedya ek dangoka, Wenelesilnya lomok ulumak nim ek, perob aboka gibsin.

¹²Sik Imik Neyung amba hyak yongowoka welerak gelewa, Trifena geb, Trifosa geb, perob aboka gibsin. Al Imik Neyung amba hyak yongowoka welelanya, nadyaʾ wanaʾ ulunanya, Persis bek perob aboka alsamba gibna.

¹³Wenelesilnya pik weboka doboknya, Rufus bek perob aboka gibna. Hnon aljaʾ genong gek, nak danaba nadyaʾ genong ulumla an perob aboka gibna.

¹⁴Asinkritus beb, Flegon beb, Hermes beb, Patrobas beb, Hermes beb, hemyabo nang sikeneb neikaʾ ulumak nang eb, perob aboka gibsin.

¹⁵Filologus, Yulia geb, Nereus beb, al hmal gel geb, Olimpas beb, munaʾ Imik Neyung mabo nidyaʾ sikeneblaboka ulumak nang eb, perob aboka gibsin.

¹⁶Ugunda yuba dobub nang senewoka hyak pe ganya olokdangoka gibildalalulum. Anyagan Kristus yub dorob nim nidyaʾ ara perob aboka gibisak.

¹⁷Bok hem yab o, nara ugunuk wenewanesin, anedya ugun men neksikaʾ doblum yub an, onoʾ yoksonya, nimi ganya bokdanok aboka, ganya sunuwoka doulub meneganasonya nenyek, sik ban unuwanasiseng nang ek pe keebdaboka ulululum. Wera anasa, sikenek pika leiboka ulululum!

¹⁸Banaso nim era, nunjaʾ wenesinya, Kristus amba wenggulumak anasa, bok sikja mon emba weldalamak nim. Sikja yub sanaʾ edya hyak or senewanok aboka bugumaʾ saboka, sikja yub era pero makaʾ lelewoka, ganya pe ulumak nim ek wenyaboka sondaʾ lelemak.

¹⁹Ugunja pe keboka unululumaʾ anyek, an unu ulumak an yub era nimi nidyaʾ ara kelemak. Wera anasa, nara ugunsamba leboka, hyak eiya dablenel. Bok nadya senelenanya nera, ugunda perobaʾ amba dara ganya pe ella uboka, malyaʾ ak dara sembejaʾ orokaʾ anyek ulunok senelamna.

²⁰Ai, wera anasa, al Imik Neyung ganya nonga pe unaʾ damoknya bedya, men berra aboka, bisaʾ dubnya Satan ara ugunjaʾ yan damumduk soldob meneganamla e. Nunja Wenelesilnya Yesus adya wanaʾ uboka eleksinaʾ era ugunuk sobaʾ ulusulul!

²¹Nadyaʾ hembe, neik wa welenamnya, Timotius bedya hnon, nadyaʾ hemyabo, neikmok nang, Lukius bedya hnon, Yason bedya hnon, Sosipater bedya hnon, ugunuk perob aboka gibisak.

²²Nara ban momnya donaʾ dobnanya, Tertius bedya, ugunuk Wenelesilnya si sibuka perob aboka gibsin e.

²³Nak hnon, yuba donaʾ nim ak hnon, aralesilnya Gayus bedya, ugunuk perob aboka gibisil. Moksoko amba rupiah beillililanya, Erastus bedya hnon, nunja hembe, Kwartus bedya hnon, ugunuk perob aboka gibisirik.

²⁴Nunja Wenelesilnya, Yesus Kristus adya perob eleksinaʾ era, ugunuk nidyaʾ sobaʾ ulusulul! Amin.

²⁵Ugunuk migibaʾ gebsuukanya, perob lero yanggan yub nadya senenggomaʾ lero yabalamnaʾ ab, hyak gibnaʾ gong gelek loboka, gunuwoknya nenyek sunuwoka, wera Yesus Kristus yub an lero yabalamnaʾ ban nidyaʾ ara, or alsamba ok.

²⁶Hnon gunuwok bok, wenera Imik Neyung ulmoubnaʾanya bedya orugosukaʾ sunuwoka, yok-yok mok soko nimi nidyaʾ ara sikda ganya dib senewoka pe kenaʾ ak bo binok aboka, ununumnaʾ lelemek nang momnya dobokaʾ pik uboka seleb wenyalasukaʾ ara, wera seleb laga dok.

²⁷Yesus Kristus pik uboka, Imik Neyung al alak ok hnonok, hyak geremseng nongaʾ si imik nenewoka gibnaʾ ara, alsamba ok hyak sob-sobaʾ ululul! Amin.