Read Nalca ROMA 2 Bible Online

ROMA 2 - Nalca bible

ROMA 2

¹Wera anasa nim o, or anda heknyeneba, anda yok nang ek yana lelelelam bok, ambabya meknenaʾ ak ab goʾ unggululam. Anda yok nim ek yana lelelesilimnya beneba, al neiknya nenyek ambabya unululamaʾ anasa, anda yok nim ek yana lelelesilim salek era, wera an dam nang ak yana leleldalalam.

²Bok Imik Neyung adyaʾ igina kwenaʾ ara, sik ban unulumak nang ek ara, pe domdigum sunuwoka unulusilaʾ ara, nunda ella ulumab.

³Wera anda nim o, anda sikenek anaso unulumak nang ek yana lelelesilim bok, anaso ununaʾ era ambabya unululamaʾ anasa, anja dara nara Imik Neyung adya igina eleklesilaʾ ak ara, merewanesom de?

⁴Anasa anda aljaʾ heknaʾ ganya ab, aljaʾ or malye senewoka diri usin ganya ab, aljaʾ sangarob ganya ab danera, wera dolbalek so senelelam de? Dara ban Imik Neyung adyaʾ heknaʾ ganya anera, anak ganya dangawoka yuba donaʾ ak bo balenggelaʾ ara, anda elgom ululam de?

⁵Bok ban anja ganya gasa nong enyek, ganya danganaʾ orok adya, wera Imik Neyung be eimik waboka pe sunubdaboka yana lelewanasilaʾ geknewanamla sum era, alja wema dabsinaʾ ara, an dam nang doboka nauba bolololam.

⁶Anasa, Imik Neyung ara, nimi yok-yok, alja unulamlaʾ sunuwoka, gigiwoka diriganesil.

⁷Wera an unuwanesilaʾ ara, sik pe ganya gouluwoka perobaʾ digumaʾ ak unulumakaʾ ara, perobaʾ senenggomaʾ ak elemakaʾ hnon, si imik nenenaʾ ak hnon, giginaʾ elemak nim ek hnon somoganggunumlaʾ digumaʾ ak elemakaʾ hnon, anasa sik an nim ek ara, embengaʾ unaʾ ak eleganesil.

⁸Bok sik na pewanenelyaʾ anyek senewoka ane digum anyek eboka, dib nong ak blekoka, malyaʾ ak pe keboka unulumak nang era, yu sen-sen aboka wema dabnaʾ damok ak sikenek eleganesil.

⁹Malya unaʾ unuru ulumak nang era, nimi yok-yok malya damok gweknaʾ ab, okna dabsinaʾ ab dara, men youboka dara, Yahudi nim ek, anya dara, onoʾ Yunani nim ek hnon, sikinek yameb goluwanesil.

¹⁰Bok perobaʾ senenggomaʾ ab, si imik nenenaʾ ab, pewoka namenaʾ unaʾ ab dara, nimi nidyaʾ pe unulumak nang edya dobnemakaʾ ara, men youboka dara Yahudi nang hnon, anya dara, onoʾ Yunani nang eneba, sikenek yameb goluwanesil.

¹¹Wera anera, Imik Neyung ara, hogunga ak kemewoka ununggululanya anasa, unuwanesil.

¹²Wera anasa, nimi nidyaʾ Yahudi nim emba unuwanalum an yuba orokaʾ anyek, malya unulumak nim era, Yahudi nim emba unuwanalum an yuba gonggom somoganamak. Bok nimi nidyaʾ Yahudi nim emba oruksin yub eb malya unulumak nim era, wera ban Yahudi nim emba unuwanalum an yub edya yana lelewanasil.

¹³Dara, ban unuwanalum an yub ek kenaʾ ok kelemak nang era, Imik Neyung ganya adya dara, pemnaʾ gebnenggunesil bok, alda ban Yahudi nim emba oruksin yub anyek, an wenyalamlaʾ sunuwoka unulumak nang enyek, eimik era pemnaʾ gebnesil.

¹⁴Dara yok mok soko nim era, Yahudi nim emba unuwanalum an yub ek dara, sikenek ara unaʾ orok bok, sikja ganya doboka an unuwanalum an yub adya unulululum alamlaʾ an sunuwoka unulumak dara, wera sikda ban unuwanalum an yuba orokaʾ anaba, siksamba sik nong ara unuwanalum an yuba dibaʾ ulumak.

¹⁵Wera anedya, ban Yahudi nim emba unuwanalum an yub ulumlaʾ ara, sikja ganya lomok momnya dobsukaʾ, sikda laga amal dalamakaʾ ara an. Dara, sikja ganya ak yuba laga lenaʾ ab, sikja ganya era pelamaʾ, meknelamaʾ alamlaʾ ab, wera anyek beknaʾ dibaʾ ulumlaʾ ara an.

¹⁶Nadya perob lero yanggan yub lelemnaʾ sunuwoka, nimi ganya lomok yokaʾ-yokaʾ doknolomakaʾ ulusilaʾ nidyaʾ ara, Imik Neyung adya Kristus Yesus pik uboka yana lelewanesil sum era, banera unuwanamla.

¹⁷Bok anda Yahudi nang abdangoka, Yahudi nim emba unuwanalum an yub ak kwebmouboka, Imik Neyung amba leboka habmerenga nonggo aldalalam.

¹⁸Hnonda Yahudi nim emba unuwanalum an yub adya neklesak adya, anda alja ganya ella uboka, nenyek perobaʾ malyaʾ ara, nidyaʾ ella ululam.

¹⁹Anya anda heng lum nang amba pik abnanya uboka, sik gunaʾ lomok ulumak nim emba dilinaʾ ululam.

²⁰Dara, anda Yahudi nim emba unuwanalum an yub ek ab, anda yok-yok geremsengaʾ, dib nongnya neb doboka ella ululam anasa, anda sik elgom nim eb, ganya kabnenggom nim eb damba, wenewoka neksinya ululam.

²¹Anasa, anda yok nang ek neklesilimnya bera har so do? An dam nang dara, nekeldanggululam de? Anja neklesilimaʾ ara, hokaʾ donaʾ mem aboka neklesilimjok, onoʾ hekasa an nong ara hokaʾ dololam do?

²²Anja lelelam ara, ”Gela salyaʾ salanaʾ mem,” alalamjok, onoʾ hekasa an nong ara gela salyaʾ salalalam do? Anda nim ugumaʾ e nek ara, u nebom aboka gamalaʾ solololamjok, onoʾ hekasa anda e nenyek lalawoka dololam do?

²³Anda ban Yahudi nim emba unuwanalum an yub emba leboka, nonggo alalam bok, hekasa anda ban oruksin yub ek meknewoka, Imik Neyung ak derelelam do?

²⁴Anasa an unulum dara, ”Wera ugun pik uboka, yok-yok mok soko nim era, Imik Neyung si ak derelemak,” wenyaboka momnya dobokaʾ ak ulumla.

²⁵Anda Yahudi nim emba unuwanalum an yub ek pe keboka unululam dara, bolaʾ garanaʾ ara perob dangalamla, bok anda anyek bleklelam dara, anak garawajeknya nera salyaʾ lelem ub lobjek.

²⁶Wera anasa, sik anam bolaʾ garawanggom nang edya ban Yahudi nim emba unuwanalum an yuba lelemlaʾ sok sunuwoka pe unulumak dara, alda seleb bolaʾ garananya beneso senewanggunuseng de?

²⁷Wera anaso dara, nim anam bolaʾ garawanggomnya bok, unuwanalum an yub ak pe unululanya bedya dara, eimik era, an wenenaʾ yuba damnya uboka, bolaʾ garananya bok, anda ban Yahudi nim emba oruksin yub ak bleklelam anasa, alja anak yana kibnenggel.

²⁸Anasa Yahudi nang enyaʾ anaʾ ara, nimek sam ak ok gom, anya bolaʾ garanaʾ anaʾ anaba, nim adya unulumaknya nek ok gom.

²⁹Bok yuba dolomla adya ok Yahudi nang ulumla ara an. Anya bolaʾ garasinaʾ dibaʾ ara momnya donaʾ ulumlaʾ sunuwoka nim adya unulusaknya nek gom, alda yuba dobnaʾ adya, ana pik uboka ganya garalasilaʾ anyek dib. Anasa benyek gigiwoka perob anaʾ ara, nimek ab lananggulumla, bok Imik Neyung bek ab lanalamla.