Read Nalca ROMA 3 Bible Online

ROMA 3 - Nalca bible

ROMA 3

¹Wera anaso dara, Yahudi nang edya naubaʾ perob soʾ ara hekaʾ do? Anya bolaʾ garasinaʾ ara hekamba ulusak do?

²Wera, sikja naubaʾ perob soʾ ara, yokaʾ-yokaʾ amba hyak gong ulumla. Dara men nong ara, Imik Neyung yub ara sikenek men lobonggosuk.

³Anasa, har so do? Wera sik gangganek hnon dib senenaʾ orok adya, wera ban ganya enedya Imik Neyung adya bojam usinaʾ era, orokaʾ gebneseng de?

⁴Anaso gom, hyak orok! Alda ban momnya dobok sok, ”Yok-yok anja yub ek ara, anedya anda aldib lelemlaʾ ara, laga beknaʾ danamla. Dara, anak yana lelewananjak dara, oblamaganalam,” an wenhyokaʾ anasa, wera Imik Neyung ok dib nong ulumlakanya, nimi nidyaʾ ak dara, sondaʾ nang ok ulumak.

⁵Bok ban nunja meknenaʾ edya Imik Neyung adya peldisinaʾ enyek an e wenyaboka laga gebnamso dara, nunda hek henesibya do? Nara nim ak adya an wenyhenemna, Imik Neyung ara alja wema debnaʾ anyek laga danamso dara, alda pe sunuwoka ununggulusil wenyhenesibya de?

⁶Anasa nera unuwanggunumso, hyak orok nong! Bok anaso unuwanamso dara, wera Imik Neyung ara, soko ak ara, hekaʾ huboka yana lelewanamso do?

⁷Bok Imik Neyung adya aldib nongnya nera nadyaʾ sondaʾ lenaʾ adya, alja si senenggom si imik nenenaʾ ara nauba dangalamla dara, wera nara or anam wenebabya anda malya unaʾanya aboka yana lelem-lelem alanel ara hekamba do?

⁸Dara anaso senewanesibya dara, ban hnon wenyhenesibya, ”Wera nunda malyinya nok unuldibilloklonob, anedya anyeganyeb perobaʾ ara lanalamnamla,” wenyhenesibya. Aldib, hnon nang edya dara, sikda nuk anaso wenyalamak alamak bok, nera sonda lelesak. Anasa banaso ganya bolomak nang era, sikda al igina donaʾ ok.

⁹Anasa har so do? Wera yok nang eb dara, nuk perobaʾ ak ulumab de? Hyak gobdo orok nong! Wera men dara lebmabja, or Yahudi nang gom, Yunani nang gom, sikda nidyaʾ seleb malya unaʾ migibaʾ damumduk ulumak,

¹⁰an wenyaro momnya dobokaʾ ulumla sok, seleb lulum-lulum abmab ara, ”Nimi hnonok sibin anaba, hnon pelemak nim era orok.

¹¹Dara, nimi hnonok sibin anaba geremseng ganya bonaʾ orok. Anya, Imik Neyung ak enaʾ anaba orok.

¹²Nimi nidyaʾ ara, ben hnonok sibin anaba, perobnya nera hnon ununaʾ orok uboka, meknewoka malya ub menegoka, sikda salyaʾ hwam ok dangamek.

¹³Sikja denggoroknaʾ era, nimi soko loklomna selengaʾ enesoʾ anyek si aklowoka, sikja silyum era pe makaʾ lelewoka, sikja sibamaʾ ak ara, malyaʾ si sabsinaʾ yuʾ anyek ulumla.

¹⁴Sikja sik ara, solom ganya boboka wema dabnaʾ ok deknero lolomla.

¹⁵Anya, sikja yan era enenga yeknaʾ amba dara, hyak habmasaʾ nong ak yabalamak.

¹⁶Anya, golol meneknaʾ damok ab, ganya okna dabnaʾ damok ab dara, sikja pikik sam ulumlakanya,

¹⁷pe namenaʾ neikaʾ hiboka un pik era, sikda elgom ulumak.

¹⁸Dara, Imik Neyung ak loka dabna ganya era, ban nang digum enyek ara, unggulumla,” wenyaro momnya dobok.

¹⁹Bok nunda banyek ella ulumab ara, yokaʾ-yokaʾ Yahudi nim emba unuwanalum an yuba lomok ulumlaʾ ara, nimi sik ban Yahudi nim emba oruksin yub damumduk ulumek nang ek senewoka beibuk, anedya nidyaʾ sibamaʾ leboka, sokok me nidyaʾ ara Imik Neyung adyaʾ igina kwesinaʾ lomok ulunok aboka unuwok.

²⁰Anasa wera, Yahudi nim emba unuwanalum an yub pik ab uboka, nimi nidyaʾ ara, Imik Neyung saramek ara, nimi hnonok sibin anaba, perobaʾ nenenaʾ orok. Oruksin yub era, malya unaʾ ak pe ella nonga danok aboka ok ulumla.

²¹Bok wenyek dara, unuwanalum an yub orokaʾ anaba, Imik Neyung adya peldisinaʾ ara, oruksin yuba lomok ab, ununumnaʾ lelemek nang buku lomok ab, seleb laga neklesuk sok, wera seleb laga gebsuk.

²²An laga gebokaʾ ara, Yesus Kristus ak nimi nidyaʾ dib senelemak nim emba, Imik Neyung adya peldisinaʾ ara, laga dok. Wera anasa, nera yok nang enyaʾ senen ganya era, hnon unggulumla.

²³Anasa, nimi nidyaʾ ara seleb malya umeekanya, Imik Neyung adya aljaʾ senenggomaʾ si imik nenenaʾ ara, seleb sokol lonaʾ dangalamla,

²⁴bok wanaʾ uboka eleksinaʾ adya, Kristus Yesus pik uboka malya unaʾ ak ab seleb munaʾ dekoka dobsukaʾ adya, or goʾ perobaʾ nenelesil.

²⁵Anera Imik Neyung adya men, ganya dib senenaʾ anasa leboka, Yesus eneng pik enyek anyeb nimi malya unaʾ amba deksulul aboka, Kristus Yesus ara nim amba elegosuk. Alja or unulunok senelemok salek, unulumek malya unaʾ era anesemba hnon yokaʾ unuwanggubsuk anasa, wenera alja ban unuwokaʾ damok ara, aljaʾ pe ununanya nera anaso abdok ara an.

²⁶Ban unuwok ganya era, wen ulumab salek enebabya, alja pe unusinaʾ ara laga dolulaʾ aboka unuwok. Anedya alda dib nongnya ulumlakanya, nimi Yesus ak dib senelemak nang era perobaʾ nenesinaʾ ara laga dolul aboka ubuk.

²⁷Wera anaso dara, nunda nonggo abdanesibyaʾ damok ara, hekaʾ ak ulumla do? Hyak orok! Har damok ek nonggo abdanggunusibya do? Yokaʾ unuwanalum an yuba pe unun damok emba leboka de? Nene gom, alda nimi ganya dib senenaʾ nong amba leboka dara, nonggo abdanggunusibya.

²⁸Nunja dib senelemabaʾ nong ara, nim ara Yahudi nim emba unuwanalum an yub ek sunuwoka unulamlaʾ adya perob nenenggulusil, alda ganya dib senenaʾ nong adyok perobaʾ nenelesil.

²⁹Goma, Imik Neyung ara hnon Yahudi nang emba Imik Neyung ok ulumla de? Alda yok mok nim amba Imik Neyung ulumla do? Wera al an, aldib. Alda yok mok nim amba hnon, sikja Imik Neyung ulumla!

³⁰Wera an lebnaʾ ara, an nenyek lebna. Dara, al neik Imik Neyung edya sik seleb bolaʾ garaweisik nang era, ganya dib senenaʾ adyok perobaʾ nenewanasilikanya, bolaʾ garawanggom nang eneba, al ganya dib senenaʾ adyok, perobaʾ nenewanasil.

³¹Wera an unuwanasil dara, nunda ban ganya dib senenaʾ anasa leboka, Yahudi nim emba unuwanalum an yub ara orok nenelemab de? Hyak mem! Alda anyek, hyak pe migibaʾ geboka unulumab.