Read Nalca ROMA 6 Bible Online

ROMA 6 - Nalca bible

ROMA 6

¹Wera anaso dara, nunda hek henemab do? Wera ban wanaʾ uboka eleksinaʾ ara nauba danggiga balalul aboka dara, malya unaʾ ak unuldibilloklemnemab de?

²Anaso dara hyak mem nong! Nunda malya unaʾ amba seleb somoganggubub de? Anasa nunda malya unaʾ ak unuldibilloklemnemab dara, nera hyak okna so.

³Anya nunda nidyaʾ Kristus Yesus lomok seleb dibaʾ meka dabsik nang era, wera al somogokaʾ lomok seleb dabsikaʾ ara, ugunda elgom de?

⁴Wera anasa, al somogokaʾ lomok meka dabsik dara, nunda al ab neikaʾ soko lokosik. Dara, Neyung bedya si senenggomaʾ adya Kristus ara somoklomak nang gangganek ab embengaʾ subuka bukiyiwok sok, eimik era numbabya wenyok embengaʾ unaʾ lomok ulumnemab aboka, neikaʾ soko lokosik.

⁵Anasa nunda seleb al somogokaʾ ak neikaʾ hnonok ok doub dara, wera onoʾ eimik era, al embengaʾ subuk ak neikaʾ hnonok ok danamab.

⁶Nunda ella ulumabaʾ ara, nunja malya unaʾ nong migib era denghelyekanya, nunda malya unaʾ ak kebijek aboka dara, nunja youmaʾ ulumoub ganya nong era, seleb alab neikaʾ gal dubuk glaboka bo somogosuk.

⁷Anasa heknyek seleb somogok dara, alda malya unaʾ ak ab seleb lob lobok.

⁸Wera anasa, nunda Kristus ab neikaʾ somogoub dara, nunda eimik era al ab neikaʾ uru balamnemabaʾ ara, aldib senewoka nunda ella ulumab.

⁹Nunda seleb ella ulumabaʾ ara, Kristus ara alda somoknaʾ nimi gangganek ab seleb embengaʾ subuk anasa, somoknaʾ damok ara hnon alak ol lelenggulumlaʾ anasa, alda saawoka onoʾ hnon somoganggunumla.

¹⁰Dara al malyaʾ unaʾ amba leboka al somogokaʾ ara, lika hnonok hyak munaʾ gobdo unubdakookanya, al embengaʾ ulumlaʾ ara, hyak munaʾ gobdo Imik Neyung amba ulumla.

¹¹Wera anasa, nunda malya unaʾ amba leboka seleb an unu somogomouba, bok Kristus Yesus lomok Imik Neyung amba leboka embengaʾ ulumabaʾ ara, ugunda nenyek hyak al dib senewoka, pe beklemnelum.

¹²Anasa ugunda malya unaʾ ganya anyek diliwoka unuwoumunuk aboka, ugunda malya unaʾ ara, an somoganamla nong enyek an or welenulul senenaʾ ara mem.

¹³Ugunja nonga, yana, soruk ara, nim on mal yin enesoʾ ak, ugunda malya unaʾ amba eleknenggom, mem. Bok ugun nong ara, nunda youmaʾ dara seleb somokdomoub bok, wera embengaʾ ulumab senewoka, Imik Neyung ak eleklelulum. Anya ban ugunja nonga, yana, soruk ara, perob nenesin mal yin geblelul aboka, Imik Neyung ak eleklelulum.

¹⁴Ugunda unuwanalum an yuba migib lomok unggululum, bok wanaʾ uboka eleksinaʾ migib lomok ululumaʾ anasa, ugunuk malya unaʾ migibaʾ adya hnon gologanggunusil.

¹⁵Anasa har so do? Nunda wanaʾ uboka eleksinaʾ lomok ulumabakanya, unuwanalum an yuba lomok unggulumab anasa, nunda malya unaʾ ak unubgiga balamnamab de? Orok! Anaso ununggulumnemab, hyak mem nong!

¹⁶Ugunda hnonnya bek biniboka, nara anja wa wenya danamna aboka bo elegeldal balalum dara, ugun nong ara ban benedya wa wenya dangoka, alja yuba pe keboka unululum ara, ugunda anam elgom ululum de? Anasa, ugunda malya unaʾ ak elegel dalalum dara, somoknaʾ ak bo balenggel. Bok pe keboka ununaʾ ak elegel dalalum dara, perobaʾ nenenaʾ ak bo balenggel.

¹⁷Ugunda youmaʾ dara, malya unaʾ adya wa wen nang ululum bok, wera ugunda ugunuk neklesikaʾ ak ganya gouluwoka pe keboka unululumaʾ anasa, Imik Neyung ak pe giblenob.

¹⁸Ugunda malya unaʾ ak ab seleb lob lobsuukanya, pe unaʾ adya wa wen nang dangalum.

¹⁹Nara ban nim adyaʾ lelong sok wenyhenya nera, ugunja hmeng enesa lebna. Anasa ugunja nonga, soruka, yan era, youmaʾ dara, sembejaʾanya beb, wonaʾ unaʾ nauba danggiga balamlaʾ ak, sikja wa wen nang aboka bo elekdangalum sok, neikso wenebabya ugunda ugunja nonga, soruka, yan era, penaʾ adya ban pe munaʾ gobdo unaʾ ak bo balanggelaʾ anyek, alja wa wenya aboka bo elekdanalum.

²⁰Ugunda malya unaʾ adya wa wenya dangoka ululum salek era, pe unaʾ migib ak ab dara, seleb pika garabdangoka ululum.

²¹Anasa an youmaʾ unululumnya nera, wen banyek bekoka, dara alya ulusilaʾ amba dara, anasemba perob soʾ digum ara, hekaʾ ak dololum do? Ban anaso unaʾ nidyaʾ ara, sidyaʾ nong ara, somoknaʾ ak dangalamla.

²²Bok wenera, ugunda malya unaʾ ak ab seleb lob lobsuukanya, ugunda Imik Neyung bedya wa wen nang doulum. Dara, banedya perobaʾ dolumnya nedya pe munaʾ gobdo unaʾ ak bo balasilikanya, hyak sidyaʾ nong ara embengaʾ ulmoubnaʾ dangalamla.

²³Malya unaʾ adya deknaʾ ara, somoknaʾ damok ak ulumla, bok Imik Neyung adya perob eleknaʾ era, nunja Wenelesilnya Kristus Yesus lomok ulumla embengaʾ ulmoubnaʾ unaʾ ak ulumla.