Read Nalca ROMA 9 Bible Online

ROMA 9 - Nalca bible

ROMA 9

¹Nara Kristus adya aldib nongnya nenyek lebnamna, nara sondaʾ lebnenggunumna. Geisinya adya nadya mek ganya hnon aldib lelenel.

²Ara nara hyak ganya lomok soloma dablenelekanya, sobaʾ ganya angoo senelamna.

³Anya nara nim unaʾ sam ak dara, nadya mok soko nimi nang yilaʾ amba leboka, nara malya nenebdanakanya, nadyaʾ hemyab amba, Kristus bek ab, yok gebdonun senelamna.

⁴Wera sikda Israeli nim ulumaakanya, sikda seleb alja mabo nenesuukanya, sikda perobaʾ senenggomaʾ ab, unubdanamab an yub eb, unuwanalum an yub eb, yuba longonaʾ amba yub eb, unu eleganasin hyok yub eb, dara sikda seleb domek.

⁵Wera sikda youmaʾ ulumek nang edya mengerob nang ulumaakanya, Mesias Kristus bera alda yokaʾ-yokaʾ nidyaʾ alak hnonok imik ululabok, nim ek sam ak dara sik nang yilaʾ ak ab beibek. Bok alda Imik Neyung sobaʾ giblemnemabnya bek ulumla. Amin!

⁶Anyek bok Imik Neyung yub ulumlaʾ ara gigiwanggubok senewanggunusibya! Anasa nim ulumak Israeli nim era, nidyaʾ Israeli nang unggulumak.

⁷Anya Abraham nang yilaʾ nidyaʾ ara alja mabo dibaʾ unggulumak. Bok, ”Ishak bek abnya nenyek an nang yilaʾ alamnamak,” aboka lebok, hyok.

⁸An wenhyoknya nera, nim ulumaakanya beillilimak mab enyek Imik Neyung mab unggulumak. Alda me eleganenggen amok me al nang yilaʾ aboka si silemnamak aboka wenyasuk nang yilaʾ enyek, Imik Neyung bedya mab ulumak.

⁹Anasa ban yub era, an wenyasuk yub ulumlaʾ ara an: ”Ban salek eneso danyek, nara saawoka yanamna dara, Sara gera nengma hnonok beibnamla,” wenyamok.

¹⁰Bok onoʾ an nenyek ok gom. Hyak lak nongnya nera, Ribka gera alja mab era, be hnon nunjaʾ youmaʾanya, Ishak bera sikja neyung ulumok.

¹¹Bok ban mab era anam beibnenggusuukanya, perobaʾ malyaʾ gom anam unuwanggurek bok, Ribka gek an wenhyok, ”Men karob so me nera goubenya so me nedya wa wenya danamla.” Anedya Imik Neyung ara alja weboka dobsuk yub era migibaʾ kablul aboka, bok ununaʾ adya gom, alda Imik Neyung alja yoululum hyoknya nedya unuwok.

¹³An momnya dobokaʾ ulumla sok, ”Nara Yakub bek wanaʾ ulumsakanya, Esau bek ara lek senelamsa.”

¹⁴Wera anaso dara, nunda hek henemab do? Dara Imik Neyung ara pe sunuwoka unuwanggubuk de? Hyak unuwanggunumso, orok!

¹⁵Anasa alda Musa bek wenhyok, ”Nara heknyek angoo yadyek senewoka arawananya bek ok nara angoo senewoka, aralemnamna, nara heknyek angoo yadyek senewanenya bek ok nara angoo yadyek senelemnamna,” hyok.

¹⁶Dara Imik Neyung unulusil era, nim adya seininaʾ ak gom, yeiriwoka enaʾ ak gom ununggulusil. Bok Imik Neyung adya yadyek anasa ganya doboka unulusil.

¹⁷Anasa Imik Neyung yuba momnya dobokaʾ ara Firaun bek wenhyok, ”Wera anasa nara anak sekiyiwagesaʾ ara, wera anedya, nara nadyaʾ migibaʾ anak laga amab elegoka, anya anedya nadya si nera mok soko nidyaʾ perobaʾ ob lelewolul aboka ununggesa,” wenhyok, hyok.

¹⁸Anasa Imik Neyung ara alda ganya doboka heknyek angoo yadyek ganya boboka arawanamna senenanya bek aralamla. Anya heknyek ganya gasa nenewanamna senenya bek ganya gasa unaʾ benyek an beillilamla.

¹⁹Wenera ugunda nak wenyhenenulum, ”An anaso dara, hekasa alda nuk meknenaʾ gebnamso do? Anasa heknedya alak isaʾanya nenewanamla do?”

²⁰Wei, nim o, anda heknya do, anedya Imik Neyung ak sondaʾ anasa mel-mel alalam do? Wera uyiwoknya bedya al uyiwoknya bek, ”Anda hekasa nak an uyiwonulum do?” wenyhenemso de?

²¹Dara go soko adya yok-yok bonaʾ memelanya bera, ban neik go soko winirobaʾ enedya perobaʾ ak senesonya nera nen memewoka, ono yoknya nera or sobnya memewanamna senesonya nera nen memelamla dara, anadya alda meknelemla heneseng de?

²²Anasa alja uruma dogoma anaʾ ab, alja migib ab, laga eleganamlaʾ amba dara, Imik Neyung ara yokaʾ-yokaʾ alja uruma dogom henemlaʾ somoganamla aboka orowek memewokaʾ ak ara, alda or eimik ek senewoka diri ulumla.

²³Onoʾ saawoka ban yokaʾ-yokaʾ ak alja angoo yadyek senenaʾ elegousununaʾ ulumla ara aljaʾ perob senenggom bonaʾ enyek alja perobaʾ senenggomaʾ amba orowek memewoka ulumla.

²⁴Wera anera nunda an alja yoululum aboka ebsuk nang era Yahudi nang ok ek ab gom, alda ono yok-yok mok soko nim ek ab anaba weboka dobsuk. Anaso nunsamba unusuk dara, anano?

²⁵Neikso ununumnaʾ lenya Hosea buku lomok alja lebokaʾ ara, ”Nadya nim gom bok, eimik era nadya nim henemna, anya nadya wanaʾ anya gom bok, nadya wanaʾanya henemna.”

²⁶Anya sikenek hanyagarab, ”Ugunda nadya nim gom,” amnyaʾ ak ara, anyeganyeb sikenek, ”Embengaʾ ulumla Imik Neyung bedya mab aboka henemak,” hyok.

²⁷ Dara Yesaya bera Israeli nang emba ban wenyalamok, ”Israeli nang era nauba mek gwan gemek egenyaʾ eneso ak ligilyebok, or mekaʾ loblenya nok eimik era blebnamla.

²⁸Alja seleb an wenhyoknya nera, Imik Neyung ara eimik an soko eilibik anera hyak berra aboka nidyaʾ gobdo unuwanamla ak lelemla,” hyok.

²⁹Men dara, Yesaya bera banaso wenyalamok sok, ”Imik Neyung imik sokok nidyaʾ ulumlaʾ dubnya bera, nuk nimi yilaʾ hnon lobongganggumso dara, nunda seleb Sodom Gomora heik anaso dangdomnesibya, wenhyok,” hyok.

³⁰Wera anaso dara, nunda hekaʾ hnon henesibya do? Henesibnya nera ban: yok-yok mok soko nim era perob nenesinaʾ ak we dobnenggulumek bok, ganya aldib senenaʾ adyok, ban perob nenesinaʾ ara seleb dorob.

³¹Bok, Israeli nang ek dara, ban unuwanalum an yuba peldisinaʾ damok anyek, we doblemekaʾ ara, doblamlobek.

³²Hekaʾ adya doblamlobek do? Sik Israeli nang era ban ganya aldib senenaʾ anasa we dobnenggulumek, bok laga ununaʾ adya we doblemek anasa sok lobek. Sikda ouluk diknaʾ girik ak ouluka dibek,

³³nera an momnya dobok sok, ”Hyak aldib, nara Sion meinik sam ara soruka beleknaʾ girik ab, yana ouluka diknaʾ girik ab beiyimnamna, dara heknedya alak an ganya aldib senewanamla dara, eimik era alya dabnenggunumla,” wenhyokaʾ ak momnya dobokaʾ ak ulumla.