Read Nalca 1 KORINTUS 1 Bible Online

1 KORINTUS 1 - Nalca bible

1 KORINTUS 1

¹Nadya hemyab o, ugunda Imik Neyung yuba donaʾ nim, Korintus heikek ululum nim ek, ugunda Yesus Kristus lomok geisa nenesuk nim uboka, Imik Neyung amba munaʾ gobdo ulunokaʾ aboka youbusuk nim ek momnya doboka beibsin. Dara onoʾ Wenelesilnya si Yesus Kristus bek, sikja Wenelesilnya uboka, onoʾ nunja Wenelesilnya ulumlaʾ anasa, yok mok nim eneba giblemak nim ek hnon, beibsin. Nara Paulus beb, nunja hem be Sostenes beb, nunja dara, nunja neyung Imik Neyung beb, Wenelesilnya Yesus Kristus ab dadya, ugunuk wanaʾ uboka eleksinaʾ ab, ganya siklewoka unaʾ ugunuk ulusulul senelenam. Nara Imik Neyung adya alja seiniwoka, alja gaboka donyoknya bedya Wenelesilnya Yesus Kristus alja yuba lenaʾ gaknya uboka, nara Paulus bedya ban momnya donaʾ en ugunuk beibsin e.

⁴Ugunda Yesus Kristus pik uboka, Imik Neyung adya wanaʾ uboka eleksinaʾ seleb dolumaʾ anasa, ugunsamba leboka Imik Neyung gibel yaban dara, Imik Neyung ak perob aboka mololamna.

⁵Ugunda seleb Kristus lomok uboka, wera ugunuk dara, yokaʾ-yokaʾ nidyaʾ ara, dub danganaʾ ak ululum. Ugunda yok-yok yuba salalumaʾ hnon, ella dangalalumaʾ hnon adya, dub nim ululum.

⁶Wera Kristus ak laga danganaʾ anyek yarenga elegoka mel-mel asuk.

⁷Anasa, nunja Wenelesilnya Yesus Kristus yanamla senewoka diri ululum salek era, ugunda yokaʾ-yokaʾ ganya eleknaʾ ak dara, garan unggululum.

⁸Dara, Wenelesilnya Yesus Kristus yanggalya sum era, ugunuk hnon gegena ponaʾ orokaʾ anyek eibsununaʾ aboka, Kristus adya lobongganggonggom, ugunja ganya kallilimnesil.

⁹Imik Neyung ara alja me nunja Wenelesilnya Yesus Kristus ab ganya kwebdangoka ulululumaʾ aboka, ugunuk youbosuknya bera, sob-soba bojam ulmorulelanya bek ulumla.

¹⁰Nadya hemyab o, nara nunjaʾ Wenelesilnya Yesus Kristus si sibuka, ugunda ganya bokoldanaʾ hyak loboka, hnonok ganya boboka, hnonok seininaʾ seiniwoka, hnonokaʾ ak hiboka ulululumaʾ aboka, neik so ganya ok yo aldalalulumaʾ aboka, nara ugunuk wenelesin.

¹¹Hem yab o, ban wenyhenya nera, Kloe ek nim edya, nak Korintus nim era doluwoka bokdangoka ulumak aboka neknyekaʾ anasa, lebna.

¹²Nadya wenyhenya nera damok ara, ugun gangganek ara hnon ara lelelumja, ”Nara Paulus bek diriga balamna,” hnon nang edya dara, ”Nara Apolos bek diriga balamna,” onoʾ yok hnon nang edya dara, ”Nara Kristus ak diriga balamna,” alalumaʾ anasa lebsin.

¹³Kristus ara galawoka ululanya de? Paulus bera ugunsamba blebsululaʾ aboka oboka gal ak glabek de? Goma, ugun meka dasikaʾ ara, Paulus bek si sibuka meka dasik de?

¹⁴Anadya wera, nimi yok nim edya nak Paulus bera meka dasinaʾ ara, Krispus beb Gayus beb danyek ok meka dasisaʾ anasa, nara perob senewoka eiya dabnel.

¹⁵Anadya wera, nimi yok nim edya, nak Paulus bedya si sibuka meka dalasil ara, alja yuba don nimi danokaʾ aboka ulusil wenyhenggunenyak.

¹⁶Yo, hnon ban, Stefanus beb alja ek nim eb danyek hnon, nadya okoka meka dabsisa. Bok yoknya nek dara, nadya hnon meka damsaʾ ara an senewoka beknenggulumna.

¹⁷Kristus nak bokol yeilinyok era, nimi meka dalasululaʾ aboka ubnenggunyok, bok alda perob lero yangganaʾ yuba lelelulaʾ aboka, bokol yeilinyok. Bok, Kristus gal dubuk somogok yuba migib era, salyaʾ lelem dalyek aboka, nimi geremseng adya yuba lelelulaʾ aboka, senewanggunyok.

¹⁸Anasa, somoganobaʾ aboka uk hinik anam balamak nim edya dara, Kristus gal ak somogok yub era, salyaʾ lelemaʾ senelemak. Bok, nunda Imik Neyung adya blebsuk nim edya dara, Kristus somogok yub ara, Imik Neyung migib ara alan, senelemab.

¹⁹Anasa wera, Imik Neyung adya yuba bukuk momnya dobokaʾ ara, ”Sokok amba geremseng nim edya sikja ella dangalamakaʾ ara, soldob meneganamna dara, yokaʾ-yokaʾ ella dangalamak nimi sikja ella unaʾ era, orok nenewoka dengeiyiwanamna,” aro dobok.

²⁰Geremseng nimi dibaʾ ara hanyagar ulumak do? Sokok an yuba neksin nang dibaʾ ara, har sam ulumak do? Imik Neyung adya sokok anyagan geremseng ulumakaʾ ara, orok nenemokaʾ anano?

²¹Imik Neyung nidyaʾ ella ulumlaʾ adya, nimi soko nim era hyak yokaʾ-yokaʾ nauba ellaʾ anaba, sikja ella unaʾ edya dara, nak ella danggunuseng senemookanya, nunja lero yabalamab yub era, nim adya malya yuba senelemak bok, ban adya nak dib senelemak nim era, blebnesin senewoka perob senemok.

²²Yahudi nim era, lok so beknaʾ dibaʾ ak eibsibyaʾ aboka elemak. Yunani nim ek dara, nimi sokok an geremsengaʾ ella danganaʾ damok ak elemak.

²³Bok nuk dara, Kristus gal ak glaboka somogok yub ek lero yabalemab. Dara, Kristus gal dubuk somogok yub era, Yahudi nim ek dara, ganya suguwoka lek senelemak. Bok Yahudi gom nim ek dara, salyaʾ so yuba senewoka dolbaleka dablesil.

²⁴Bok Imik Neyung adya nuk youbosuk nim edya dara, nera Yahudi nim eneba, Yahudi gom nim eneba, Kristus ara Imik Neyung adya alja migib eb, alja geremseng unaʾ damok an, senelemab.

²⁵Anasa, Imik Neyung adya, nera dongdang anaʾ senelelanya nera ella nong bok, nim adya dara, nera hyak geremseng el danganaʾ senelemaknya nera dolbalek so. Onoʾ Imik Neyung adya, nera hmeng unululanya nera, migib nong ulumla. Nim adya migib era hmeng ulumla.

²⁶Wei, ugunda hemyab o, Imik Neyung adya ugunuk youbosuk sum era, ugunda hekaʾ anasonya ululum anyek seiniwolulum. Nimi heng adya ugunuk kemesin dara, geremseng nang hnon, ganya goluwoka sikenek kelemak nimi hnon, yok-yok senenggom dub nanga hnon, nauba unggululum.

²⁷Anasa wera, sokok an geremseng ulumak nim era, sikba alya dabsululaʾ aboka, sokok anyeb nera dongdang alamaknya nenyek, gaboka dobsuk. Onoʾ sokok an senenggomaʾ anyek, migib ulumak nim enyek, sikba alya dabsululaʾ aboka, sokok anyeb nera hmenga senelemaknya nenyek, gaboka dobsuk.

²⁸Wera nimi nidyaʾ ara, Imik Neyung hogung ak nonggo heijek aboka, Imik Neyung adya, wen sokok an ululanya nenyek orok nenewolulaʾ aboka, nera sokok so, melinya, onoʾ hyak malya nong senelemaknya nenyek, gaboka dobsuk.

³⁰Imik Neyung adya ganya doboka albeyok unumokaʾ adya, wera ugunda Yesus Kristus ablaboka geisa nong gebeiyisuk. Dara, Imik Neyung adya, Kristus doboka, nunja geremsengaʾ alan aboka dangiyisuk. Dara onoʾ, al Yesus ara nunjaʾ ganya peldisinaʾ ab, geisa unaʾ ab, blebsinaʾ ab danyek, ulusil.

³¹Anasa wera, Imik Neyung yuba bukuk orowek momnya dobok sok, ”Nara pelemna senewoka nonggo alalenya bera, Wenelesilnya lomok ulumna adya pelemna senewoka nonggo alalul e,” aro dobok.