Read Nalca 1 KORINTUS 12 Bible Online

1 KORINTUS 12 - Nalca bible

1 KORINTUS 12

¹Wenyek dara, Imik Neyung Geisinya adya wa wenaʾ migibaʾ yok-yok eleklesilaʾ ak lebnamna. Hemyab o, ban yuba damok enyek dara, hyak pe dibaʾ ella danasom senelamna.

²Ugunda Wenelesilnya bek anam elgom ululum salek era, ugunda yuba gomnya giblemakaʾ ak gliboka bo balasuk.

³Imik Neyung Geisinya adya bo ulusilya nim edya dara, ”Yesus ak ara meilinya,” hemenggom anasa, ugunda ella danalum aboka, neksin. Anasonya neikik, onoʾ Imik Neyung Geisinya adya diri bo usinaʾ orok nim edya, ”Yesus anyek Wenelesilnya ulumla,” hemenggom anasa lebsin.

⁴Imik Neyung Geisinya adya, wa wenaʾ damok eleklesilaʾ ara, yok-yok ululabok, ban nidyaʾ ara, neik Geisinya bedya ok eleklesil.

⁵Wenelesilnya bek arawoka wa wen danasa dara, yok-yok ululabok, ban arawoka welemakaʾ amba dara, Wenelesilnya Imik Neyung hnonok ok gobdo ulumla.

⁶Imik Neyung wa welemakaʾ ara, yok-yok ululabok, wa welemakaʾ anasa migibaʾ eleklesil Imik Neyung era, hnonok ok ulumla.

⁷Nuk nidyaʾ hiboka pewosululaʾ aboka, Imik Neyung Geisinya ara, nimi hnonok-hnonok yok-yok eleklesil.

⁸Dara nimi ben hnonda Geisinya bedya yuba geremsengaʾ salalulaʾ aboka, wa wenaʾ damok eleklamla. Nimi hnonda al neik Geisinya bedya, pe ella dangoka yuba lelelulaʾ aboka, wa wenaʾ en damok eleklamla.

⁹Dara onoʾ al neik Geisinya bedya, dib senewolulaʾ aboka migibaʾ eleklamla. Onoʾ neik Geisinya bedya hnon nim ek, nimi merellisin migibaʾ damok eleklamla.

¹⁰Hnon nim ek ara, yokaʾ-yokaʾ senenggomaʾ migib ununaʾ anyek, unuro yaban danasa wa migib en damok eleklamla. Onoʾ yok nim ek ara, ununumnaʾ lelelulaʾ aboka, an wa nen migibaʾ eleklamla. Al onoʾ neik Geisinya bedya hnon nim ek ara, ban nenera Imik Neyung wa ara ban, alda ban nenyek dara, Imik Neyung adyinya gomaʾ an wa migib eleklamla. Hnon nim ek ara, yok-yok sokok yuba ella danganaʾ damok migibaʾ eleklamla, hnon nim ek ara, yuba damok danyek nera damok ara, banyek lebok an danasa migib eleklamla.

¹¹Ban nidyaʾ unulamlaʾ ara al neik Geisinya bedya ok unulamla. Nimi yok-yok elaʾ gigiro Geisinya elegosunun senemnaʾ ok sunuwoka yok-yok eleklesil.

¹²Kristus ara, nimi nong anasoʾ ak hnonok ok ulumla. Nong ara hnonok bok, yana soruk ara yok-yok gong ulumla. Yana soruk ara, yok-yok bok nong dub ak dara, hnonokaʾ ak ulumla.

¹³Anasonya neikik, numbabya Yahudi nimi yokaʾ gom, Yahudi gom nim gom, ek wa nang gom, seleb blebdangoka sikbeyok ganya doboka ulumak nimi gom, nunda nidyaʾ hnonok nong ak denewoka ulunokaʾ aboka, hnonok neik Geisinya bedya seleb mek dibaʾ dabsuk. Numbabya nidyaʾ ak neik Geisinya elegosuk.

¹⁴Wera nimi nong ara, yan moumenaʾ ok unggulusil bok, alda nidyaʾ yana soruka bokoka gong-gong ulusil.

¹⁵Yan adya lebnesodya, ”Nara soruk gom anasa, nara nong ak unggulumna,” henemso dara, wera ban nenyek dara yan ak dara, nimi nong unggulumnamso de? Orok.

¹⁶Dara onoʾ o adya lebnesodya, ”Nara heng dok unggulumnaʾ anasa, nara nong ak unggulumna,” henemso dara, wera ban wenyhenemsoʾ adya nong unggulumnamso de? Orok.

¹⁷Nimi nonga nidyaʾ ara, hiboka heng dok ok ulumso dara, nong ara hekaʾ huboka yuba kebnamso do? Goma, nonga nidyaʾ ara, hnonok hiboka o meklaʾ ok hnonok ulumso dara, songa dinin dara, hekaʾ huboka songa diniwanamso do?

¹⁸Imik Neyung adya ok yana soruka nidyaʾ ara nunja nong ak sam beiri yibuk. Yana soruk ab, yokaʾ-yokaʾ nidyaʾ ab, Imik Neyung adya alja unuwonun senemok sok sunuwoka, alja ok ganya doboka dirigoka beiri yibuk.

¹⁹Nimi nong ara, yan dem ak gom hnonok ok ulumso dara, hekaʾ uboka nonga danamso do?

²⁰Anasa yana soruk ara gong ululabok, nong ara hnonok ok ulumla.

²¹Anasa wera heng adya dara, soruk ak, ”Nara anak dolbalek senelenggen,” wenyhenggunumso. Onoʾ huk adya yan ak, ”Nara anak dolbalek senelenggen,” henggunumso.

²²Alda saawoka onoʾ nunja dara, nong gararobaʾ hnonda hmeng senelemabnya nenyek onoʾ hyak dib nong ulumla.

²³Hnonda nunja nong era darasam anara, mek perob gom senelemabnya nenyek, nunja dara, perob aboka yokaʾ-yokaʾ pe unulumab. Onoʾ heng kemenaʾ perob gom senelemabnya nenyek, nunja dara, pe keebdangoka bo uldalamab.

²⁴Bok nong yana soruka perobnya nera, alak yokaʾ-yokaʾ ununggulumab. Imik Neyung adya nunja nonga pe lelewoka beiyisukaʾ adya, wera nunja heng kemenaʾ edya dara, perob senewamenggomnya nenyek, perob senewanokaʾ aboka umok.

²⁵Wera nong ara, doluwoka bokdeijek aboka, yana soruka nidyaʾ hiboka pe diri ubdanokaʾ aboka umok.

²⁶Yan ak oka del yabasin dara, wera nonga nidyaʾ ak oka dero lolosil. Soruk ak gom alda pelemla aboka gibel yaban dara, yok-yoknya neneba nidyaʾ perob aboka eiya hlalamak.

²⁷Hemyab o, anasa ugunda Kristus nonga ululumukanya, onoʾ ugunda hnonok-hnonok Kristus adya nong yokaʾ ululum.

²⁸Anasonya neikik, Imik Neyung yuba donaʾ nim emba dara, Imik Neyung adya orowek men ellaʾ gigiro gegewoka sekiyimok. Men Imik Neyung yuba lenaʾ gak nang, penenya nera ununumnaʾ len nang, winilinya nera neksin nang, dara sikda yokaʾ-yokaʾ migibaʾ unuro yabalemek nang, dara nimi merellisin damba hnon, yok aran damba hnon, yok nanga bo usin danasa hnon, onoʾ dagalongnaʾ ara, yok-yok yuba san damba hnon, sekiyisuk.

²⁹Sikenek dara, nidyaʾ yuba lenaʾ gak nang ok gom, ununumnaʾ len nang ok gom, neksin nang ok unggulumak. Sikda nidyaʾ ara, yokaʾ-yokaʾ migibaʾ unuro yaban danasa unggulumak.

³⁰Nidyaʾ nimi hwen damba, yok yub edya unuro san danasa, yuba dangawoka san danasa, nidyaʾ ara neikik eleganggusuk.

³¹Anasa wera, ugunda hyak perob wa wen damok enyek, dobnob senewoka hyak yeiriwoka dulululum. Bok ana damumduk anara, hyak pe unuwanalumnya nenyek neknesin.