Read Nalca 1 KORINTUS 13 Bible Online

1 KORINTUS 13 - Nalca bible

1 KORINTUS 13

¹Nara nim adya yuba nidyaʾ ella dangoka salasinya bok, lero nang yub anaba ella dangoka salasinya bok, yok nim ek, wanaʾ unaʾ orok dara, wera nadya ella dangoka salasinya yuba danara, abya meklaʾ ak moka go-go alamla sokaʾ ak, senenggom nyonyanaʾ nyo-nyo alamla sokaʾ ak, ulumnesinya.

²Nara Imik Neyung yuba lenaʾ migib elegenyokaʾ adya pe leb elegoka, yokaʾ-yokaʾ ara, hyak lomoknya neneba olowoka ella uboka, yokaʾ-yokaʾ nidyaʾ ella uboka, Imik Neyung ak hyak dib senenaʾ adya, mok soko mein anaba dama delewoka yokok sam bukillil yabalesinya bok, yok nim ek wanaʾ usinaʾ orok dara, wera nak dara, hyak salyaʾ nongnya bek ulumnesinya.

³Wera onoʾ nadya bolosinya bonaʾ era, bonaʾ garan nim ek nidyaʾ salyaʾ bokoka, na nong anaba or uka dabnululum aboka, bo elegeldal balasinyaʾ anaba, nara yok nim ek wanaʾ unaʾ orok dara, nadya nidyaʾ unulusinenya nera, gobdo salyaʾ lelem dananeso.

⁴Nimi ben hnon, yok nim ek wanaʾ dibaʾ ululanya bera, ganya siklewoka namen ganya adya perob ok unulamla. Wanaʾ unaʾ ara, alda solom ganya bonggulumla, imik neneldanggulumla, dengdang ganya bonggulumla.

⁵Wanaʾ unaʾ ara, salyaʾ ganya adya yokaʾ-yokaʾ ununggulumla, nadya yok nim edya bok, nadyinya nok dolulaʾ aboka senewoka wegenggulumla. Wanaʾ unaʾ ara, yu ganya berra bonggulumla, alda gogobaʾ ganya bonggulumla, mona yeilirub ganya mekaʾ bonggulumla.

⁶Wanaʾ unaʾ ara, yana lelenaʾ ara pe unaʾ orok dara, perob senenggulumla. Bok, perob unaʾ ak dara, perob senelamla.

⁷Alda yokaʾ-yokaʾ nidyaʾ ara, pe siklewoka unulamla. Alda yok nim edya perobnya nek dib senelamla. Onoʾ, yokaʾ-yokaʾ adya sene galalamlaʾ anaba, dara onoʾ yokaʾ-yokaʾ ak anaba, hyak ganya siklelmoubuldalamla.

⁸Wanaʾ unaʾ dibaʾ ara, hyak denghemenggomaʾ ulumla. Wenyek dara, nimi ganya geremseng uboka, Imik Neyung yuba lel eleklesak bok, eimik era unuwoka lebnenggunumak. Wenyek dara, nimi hnonda yok-yok yuba salamak bok, eimik era dengaro lobnamla. Wenera nimi yokaʾ-yokaʾ nidyaʾ ella dangalamak bok, eimik era denghenemla.

⁹Anasa nunja yokaʾ-yokaʾ ella ulumabnya neb, ununumnaʾ lelemabnya neb, or wenera mek so ok unuro lelemab bok,

¹⁰Imik Neyung adya yokaʾ-yokaʾ nidyaʾ ara, perobaʾ ok nenewanamla sum yanamla dara, mek so meilinya nera hyak denghenemla.

¹¹Nara youmaʾ anam mekmab ulumsa dara, nara mekmabo salamak yub ek salamsa, mekmabo seinilimak ganya ek seiniwoka, mek mabo senelemak sok, naba senelamsa. Bok nera seleb nauba dasa dara, mekmab anaso seiniwoka unulamsaʾ ara, seleb lobonggamsa.

¹²Nunja wen yokaʾ-yokaʾ eillilimabnya nera, heng kemel danaʾ ak an yamaʾ inib-inib anaʾ eillilimab sok anaso eillilimab. Bok eimik ek dara, hyak pe okoka eibnemab. Wenera nara yokaʾ-yokaʾ darasam ok ella ulunabok, eimik era, Imik Neyung adya nak an yokaʾ-yokaʾ ulunelaʾ ella ulunel sok, yokaʾ-yokaʾ nidyaʾ ella danamna.

¹³Anasa wera, wenyek dara, ban winilya damok danyek ulumlaʾ ara, dib senenaʾ hnon, ganya nebem anaʾ hnon, wanaʾ unaʾ hnon, ulumla. Ban winilya ululabok, dib nongnya nera, wanaʾ unaʾ ak hnonok hyak dib nong.