Read Nalca 1 KORINTUS 3 Bible Online

1 KORINTUS 3 - Nalca bible

1 KORINTUS 3

¹Ugunuk dara, nara Imik Neyung Geisa ganya seleb ulusil nim enesoʾ ak lebnenggusisa. Bok, nara ugunuk yuba lesisaʾ ara, sokok an seinilemak nim ek lelemak sok, onoʾ Kristus ak dib senelemak bok, anam moum den mab anasoʾ ulumak nim ek lelemak sok, ugunuk lesisa.

²Men dara, gasa denaʾ demenggom ululumaʾ anasa, nauba nimi delemak denaʾ ek gom, alda moum den mabo delemak denaʾ ek elegeisisa. Bok, ugunda weneba okoka ganya kanaʾ loboka anam salyaʾ lelem ululum.

³Ugunda solom ganya bobdangoka, ugun moumen anaba waldalalum, oldalalum dara, wera anara sokok an malya ganya bololumaʾ adya unululum. Imik Neyung ak elgom ulumak nim enesoʾ ak, ugunda ululum.

⁴Dara, hnon nim era lelelumja, ”Nara Paulus bek diriga balamna,” hnon yok nim edya dara, lelelumja, ”Nara Apolos bek diriga balamna,” alalum. Ban wenyalalumnya nedya dara, ugunda sokok nimi ganya bolulum e.

⁵Dib nong ara, Paulus bera heknya do? Onoʾ Apolos bera heknya do? Nunda welenamnya nenyek, ban adya dib senelum bok, nunda Imik Neyung adya alja wa arawoka, welenam nang ok ulunam. Nunda or Wenelesilnya bedya ban wa nenyek welerurum aboka, elegesukaʾ ok welenam.

⁶Nadya dara, yinaʾ ok memsa, Apolos bedya dara, alda mek ok yekemok bok, meklaʾ sangiyiwoka weliyimoknya bera, Imik Neyung adya ok unumok.

⁷Anasa, yinaʾ melelanya hnon, meka yeklelanya hnon ara, dib nong gom bok, Imik Neyung adya weliyiwoka, meklaʾ sangallililanya alak ok hnonok, dib nong ulumla.

⁸Anasa sik penya dara, neik wa welerak nang ulurak. Dara, sikda wa elaʾ gigiro welerak sok, deknaʾ anaba sunuwoka dobnarak.

⁹Nunda Imik Neyung amba neik wa welemab nang ulumab. Ugun nong ak dara, Imik Neyung adya alja wa soko yokaʾ anaso ululum. Dara onoʾ, ugunda Imik Neyung alja e ululum.

¹⁰Imik Neyung adya nak wanaʾ uboka eleksinaʾ edya wera, nara e sonya beneso uboka, nadya men e igimsaʾ ak ara, yok nanga makoka solomak. Bok, nimi nidyaʾ ara, nadya egomnaʾ igimsa ak, hekaʾ huboka sobnamna do senewoka pe kendenemso.

¹¹Seleb ikimok egomnaʾ diba ara Yesus Kristus. Yok nang era, yok egomnaʾ dibaʾ iknamenggom.

¹²Bok, Imik Neyung adya ikimok egomnaʾ ak ara, yok nang edya dara, hnonda emas girik adya solomak, hnonda perak girik adya solomak, hnonda yok-yok perob girik adya solomak. Bok, onoʾ hnonda or gal sirikaʾ adya solomak, hnonda wira adya solomak, hnonda girik adya solomak.

¹³Nimi nidyaʾ elaʾ gigiro solomak e nera, Kristus yanamla sum era, nidyaʾ damoka laga nenewanamla. Dara, nimi nidyaʾ sikja wa nera, pe wemek gom, malya uboka wemek gom ara, Wenelesilnya Kristus yanamla sum enyek, ara uk adya sunuwanasil.

¹⁴Nimi nidyaʾ e sorobaʾ anyek, uka diniwalyebok, uka denggublya dara, Imik Neyung adya perob deknaʾ dobnamla.

¹⁵Bok, nim adya wa wemeijaʾ anyek, uka delya dara, welenya bera angoo senewanamla. Al nong ak dara, blebnamla bok, uka delemna ak ab nongdem gobdakdo balamak sok ubnamla.

¹⁶Ugunda Imik Neyung e ulumab senenaʾ ara, ugun dam nang elgom uldalalum de? Imik Neyung Geisinya ara, ugunja ganya lomok ulusil ara, ugunda elgom de?

¹⁷Imik Neyung e ara, aljinya yokaʾ nong uboka, ugun nong ak dara, ban e nong ululumaʾ anasa, nimi ben hnon Imik Neyung e ak golol meneklamla dara, alba Imik Neyung adya, alak golob meneganamla.

¹⁸Nimi ben hnon, al damnya bol neneldanggom. Onoʾ nimi ben hnon ugun gangganek ara, nara yokaʾ-yokaʾ nauba el nong seneldalamla dara, Imik Neyung adya alak yok geremseng hwamnya nenewonululaʾ aboka, wenera dongdang anaʾ anyaʾ dangoka ululul.

¹⁹Nera sokok anyek geremseng nong senelemaknya nera, Imik Neyung adya dara, dongdang anaʾ anya senelamla. Imik Neyung bukuk momnya dobokaʾ ara, ”Yokaʾ-yokaʾ geremseng ulumak nim ek, Imik Neyung adya geremseng ulumakaʾ ak ab, henga weboka youlusil,” aro dobok.

²⁰Onoʾ momnya dobok ara, ”Yokaʾ-yokaʾ nauba ella ulumak nim era, sikja yokaʾ-yokaʾ seinilemakaʾ ara, Imik Neyung adya dara, nera salyaʾ lelem seinilemakaʾ ara, ella ulumla,” ara dobok.

²¹Anasa wera, ugunja nim ek ara, hyak perob senewoka gigildanggom. Yokaʾ-yokaʾ nidyaʾ ara, Imik Neyung adya ugunuk elegesuk ak ulumla.

²²Anasa Paulus gom, Petrus gom, sokok an gom, somoganalumaʾ gom, embengaʾ ulumnalumaʾ gom, wen ulumla salek gom, eimik yanamla salek gom, nidyaʾ ara, ugunjinya yokaʾ nong ulumla.

²³Dara, onoʾ ugun nong ak dara, Kristus aljinya uboka, Kristus nong ak dara, Imik Neyung aljinya ulumla.