Read Nalca 1 KORINTUS 4 Bible Online

1 KORINTUS 4 - Nalca bible

1 KORINTUS 4

¹Anasa nuk dara, wera Imik Neyung adya gegemokaʾ anyek, nuk elegosuk nim uboka, kristus ak arawoka welemak nang ulumak alasinok.

²Wera, ban unuwoka arawoka welemak nang ara, wa ara yoknya bedya welelulum aboka, oruklesil dara, or pe bojam unulunok.

³Bok, na Paulus ben nong ak dara, or ugunja gom, yok nim eneba, nak yana lelelenulum dara, nera malya senewoka dolbalekaʾ dablenel. Na moumen seinildalamna anaba, dib yana leleldanggulumna.

⁴Nara ban nenyek malya ubna senenaʾ ara, orok bok, nenyek dara, wera nara pe ulumna gom, malya ulumna gom ara, nadyaʾ gomaʾ, Wenelesilnya bedya ok sunuwoka yana lelelenel.

⁵Anasa wera, ugunja men, bera malya ubla, bera pewal aboka, berra aboka yana leleldanggom. Alda diri ulumunaʾ ara Wenelelesilnya bedya yalyekanya, al adya yok-yok damoka nidyaʾ gunaʾ lomok sam doknolomlaʾ ara, poboka laga nenewanamla. Imik Neyung adya, onoʾ nimi ganya lomok mouboka seinilemaknya nera, laga nenewanamla. Ban sum enyek, nimi nidyaʾ ara, Imik Neyung adya sikenek unuro yana lelewoka gigiwanesil.

⁶Anasa nadya hemyab o, ugun pesindamba dara, nadya Apolos bek hnon, nak hnon, sunuwoka seleb lebsin. Ban unusenya nera damok ara, anadya ugunda nuk keeboka, sik unulurak senewoka pe unuwolulum, anya wera, wen ulumla pe unulumakaʾ anyek salabmoublulumaʾ aboka ubsin. Anadya wera, ugun moumen ara, nunda perob nim aboka, gigibdangoka onoʾ yok nim era, malya nenewomunuk aboka ubsin.

⁷Anasa wera anak dara, heknedya men perob so uyinyok senelelam do? Anda yokaʾ-yokaʾ bololamaʾ ara, hnon eleganggunjoknya nek hnon bololam de? Wera dara, yokaʾ-yokaʾ nidyaʾ anak elegenjok bok dara, hekasa nabeyok dolomna senewoka, nonggo alalam do?

⁸Ugunda seleb dub nang ululum. Anadya wera yokaʾ-yokaʾ dobsinya ganya bonggululum. Ugunda seleb dub nanga dolum bok, nuk dara, orok! Nublaboka neikaʾ nimi yok nim ek wenelenobaʾ aboka, ugunda seleb dub nanga dangasom dara, perob senewanesinya bok.

⁹Nadya seinilamna dara, nu Imik Neyung yuba lenaʾ gak nang dara, Imik Neyung adya nuk seleb, nim adya ngoluksin nanga hnon, lero nang edya ngoluksin nanga hnon dangiyisuk. Nuk dara, malya umnaʾ anasa, obnamna nim eneso uboka, nimi hogung ok sam obnemab aboka, onoʾ sokok anyeb ebngalogoka glollisin nim enesoʾ ak ulumab.

¹⁰Kristus nong anasa leboka, ugunuk dara yuba donaʾ geremseng nim uboka, nuk dara dongdang anaʾ nim ulumab. Nuk hmeng ulumab bok, ugunuk dara migib ululum. Nuk dara derelesak bok, ugunuk dara, perob senewoka gigilesak.

¹¹Dara wenebabya, nunda mek oka, gwaneng oka kwelesil. Nunda denerob akleng ok ongolomab. Nuk nim adya malya nenewoka olosak. Nunja dibaʾ un e nera unggulumla.

¹²Nunda yokaʾ-yokaʾ dobnobaʾ aboka dara, nunja soruk adya yeiriwoka welemab. Nuk nim adya weil malyaʾ gloksin dara, unuwesin nang ek amba perobaʾ-perobaʾ lelemab. Nuk malya nenewoka obsin dara, obsin nang ek sam siklewoka lolomab.

¹³Nim adya nuk derewoka wabsin dara, sikenek ara nunja dara, meka lelewoka perob ok lelesab. Dara wenebabya, nunda sokok an sembejaʾ eneso ak ulumab; nim adya lolomak sembejaʾ anaso ulumak senellilisak.

¹⁴Nara ban wenyaboka ugunuk momnya dobsinaʾ ara, ugunuk alya dabsululaʾ aboka ubnenggubsin bok, ugunda nadya mab eneso ululumaʾ anasa, wenesin danasa lebsin.

¹⁵Kristus yuba donaʾ nim ululumukanya, ugunuk yuba neksin nang era, denga salyaʾ ulusiseng bok, ugunjaʾ neyung bera gong danggunuseng. Na Paulus ben nong anyek, Kristus Yesus adyaʾ perob lero yanggan yub elegeisisaʾ adya, ugunja neyung be dangoka unya nok ulumna.

¹⁶Anasa wera, nadya ulumna sok diligaʾ doboka ulululumaʾ aboka, ugunuk dukaʾ lolom-lolom hesin.

¹⁷An nenesa leboka, hem Timotius benyek na lunuwoka ugunuk bilom aboka bokol yeisin. Al Timotius bera, Wenelesilnya bemba ganya goluwoka pe welelanya bek, nadyaʾ yokaʾ dam me neneso wanaʾ ulumna me nek, bokol yeisin. Alda hyak pelemla senewoka, welelul senelamna me. Dara alja ugunuk, nadya Kristus ak dib senemsa danyek ulusenya nenyek an ara, nadya yuba donaʾ nimi wenero yabalasinaʾ anyek, ugunuk saawoka bekellilimnesil.

¹⁸Nimi wene nang ugun gangganek ara, nera Paulus bera anyagan yanggublul senewoka, sikda dengdang ganya bobak.

¹⁹Wenelesilnya bedya, nak or Korintus nim ek bulul senewalya dara, mek anam ugunuk kemel yanasin. Na yanya danyek wera, dengdang ganya bolomak nim era, nera yuba dem ok salamak gom, aldib migib ulumak gom ara eibnamna.

²⁰Anasa Imik Neyung wenelemnesilaʾ ak dara, yub dem adya gom, aldib senewoka alda migib adya hnon ulumnamla.

²¹Anasa wenera, ugunja perob senemunya nenyek, nunda nenyek henelum. Ugunja dara, nara yeiriwoka yuba gasa einiwoka nekel yosulul senelelum gom, alda ugunuk wanaʾ ganya uboka, namenaʾ anyek pe nekel yosulul senelelum gom?