Read Nalca 1 KORINTUS 7 Bible Online

1 KORINTUS 7 - Nalca bible

1 KORINTUS 7

¹Wenera nara ugunja momnya donaʾ pik neknulum yub ek lebnamna. Nengmabo ben hnon ara, gela dobnenggunumla dara, nera perob.

²Bok, doldanaʾ orok adya, meknewoka salaldalamakaʾ anasa, nengmab ak dara, alba alja gel ge dobnamla. Dara, gel ak dara, albabya nenya dobnamla.

³Dara nenya ara, alja gel ak pe nenya unulamla sok unululul. Dara neikso, gel adya, alja nenya ak anaba, hyak pe unululul.

⁴Gel alja nong ara, alaʾ mokaʾ ak unggulumla. Alda alja nenya amba hnon ulumla. Anasonya neikik, nenya anaba alja nong ak dara, alaʾ mokaʾ ak unggulumla bok, alja gel gemba hnon ulumla.

⁵Anasa, gela nenya dobdangoka ulumunjok dara, malya ganya boboka, loboka yok-yok unaʾ ara mem. Seʾ amba dara, bokdangoka ulumnulum bok, nera men nenya ab gel ab unuwananam aboka, yuba sabdoumun dara, or unulumnulum. Bok, sobaʾ anaso unulmorulumun dara, bisaʾ dubnya Satan adya ugunuk galal yeisilyek anasa, seʾ ok bilimunaʾ ara youmun dara, gela nenya onoʾ neikaʾ ulumnulum.

⁶Nadya ban wenyhesinnya nera, ugunda ganya pe seiniwoka unuwanalumaʾ ak lesin, gasa wekewoka lenggulusin.

⁷Nadya ganya ak dara, nimi nidyaʾ ara, nadya ulumna sok, sikba ulumneseng senelenabok, nimi yok-yok ara, Imik Neyung adya elaʾ girigo yok-yok eleklesil. Anasa, hnon nim era ban nenyek elegemokaʾ adya, alba unululabok, yok nim era yok elegemokaʾ adya, yok unulamla.

⁸Gelewa, nengmabo, anam dobdanggom nim eb, youk gelewa ululum nim eb, nadya ban wenewanasin. Naba ulumna sok, ugumbabya ugumbeyok kaboka ulumnalum dara, nera perob.

⁹Bok, gela nenya dobsinya ganya nauba seinilemun dara, wera men gela nenya dobnelum. Gela nenya dobsinya ganya adya, anja ganya nauba oka delesilya dara, or gela nenya dobnelum dara, perob so.

¹⁰Gela nenya seleb dorob nim ek, anadya ban oruganesin. (Ban nenera nadya ok unuwolulumaʾ aboka lebnenggubsin bok, Wenelesilnya bedya ban ara ugunuk lelesil.) Nenya seleb domlya gel gera, alja nenya lonaʾ ara, hyak mem.

¹¹Bok, gel ara nenya doledyok loblya dara, wera yok nenya ek saawoka donaʾ ara, hyak mem. Goma, saawoka men dosonya bek hil yanamsoʾ ok ulumla. Dara, nengmab anababya neikik, domlya gel gera lonaʾ ara mem.

¹²Bok, yoknya nemba wenewanasinaʾ ara ban (Nera Wenelesilnya bedya gom, alda nadyok weneweisin yub era an): Dolenya bedya Yesus ak dib senenaʾ orok gel gek ulumlya gel gedya, nara anab pe ulumnenam helya dara, dolenya bera yuba donaʾ orok gel aboka, lonaʾ ara mem.

¹³Dara onoʾ saawoka, Imik Neyung yuba dolomlya gel genyek, Kristus ak dib senenaʾ oroknya bedya nara anablaboka ulumnenam helya dara, lobnun aboka, lonaʾ ara mem.

¹⁴Anasa wera, yuba donaʾ oroknya benyek, alda Imik Neyung me dangamna gel gek dolomla dara yok so nenelamla. Anasonya neikik, onoʾ gel ara, yuba donaʾ orok bok, Imik Neyung me dangasonya bedya dobokaʾ adya, wera yok so nenelamla. Dara, ban nenyek ununaʾ orok dara, sikja beibseng me neneba beiyik mab anasoʾ uluseng bok, ban ununaʾ adya yok so nenelesil.

¹⁵Bok, Imik Neyung yuba donaʾ orok gel gom, nenya gom edya, alja gel gek gom, alja nenya ek gom loblya dara, or lo balalul. Ban unuwalya dara, al yuba dib senelelanya bera anam kwemnaʾ anaso unggulumla. Imik Neyung adya dara, waldanaʾ oldanaʾ orokaʾ anyek, pe ulunok senelesil.

¹⁶Ugun Imik Neyung yuba dololum gelewa edya dara, anja dara, nadya nenya era, Imik Neyung ak bleboka bo yanamna gom, orok gom ara, ugunda elgom ululum. Anasa onoʾ, ugun Imik Neyung yuba dololum nengmab edya dara, neikik nadya gel gera bleboka bo yanamna gom, orok gom ara, ugunda elgom ululum.

¹⁷Imik Neyung adya ugunuk youbsukaʾ ara, al adya migib elegoka ban unuwoka ulumnelum aboka, youbosuk sok, neik so unu ulumnalum. Dara, ban yub enyek, nimi nidyaʾ Imik Neyung yuba dolomak nim ek unulululum aboka, wenero yabalasin.

¹⁸Sununaʾ ara, nimi ben hnon, alak Imik Neyung adya youblya sum enyek, bolaʾ garamoknya ulumlya dara, saawoka bolaʾ garawanggomnya neneldanggom. Bok, ben hnon Imik Neyung adya youblya sum enyek, bolaʾ garawanggomnya bek ulumlya dara onoʾ bolaʾ garawanenok senen unggom, mem.

¹⁹Anasa wera, bolaʾ garalamakaʾ ab, bolaʾ garanggulumakaʾ ab dara, dib nong gomaʾ. Hyak perobaʾ dib nongaʾ ara, nim ara Imik Neyung yuba lelesilaʾ ak keboka unulumakaʾ ak dib nong ulumla.

²⁰Imik Neyung adya ugun youbsuk sum ek ululum sok, weneba neikik so ulululum.

²¹Imik Neyung adya an yalom aboka enjok sum era, anda oruknanya ululum bok, eboka donjok dara, nara benyaʾ senewoka nenyek nauba seininggom. Bok, anda salyaʾ pe ululomaʾ aboka, li elegagelya dara, or elegagelyaʾ ak an dob salawoka ululom.

²²Nimi ben hnon, oruknanya bek bok, Wenelesilnya bedya youbomok bok dara, wenera alda Wenelesilnya bedya gloʾanya dangalamla. Bok, youbomok sum enyek, gloʾanya ulumok bok dara, alda Kristus adya wa wenya dangalamla.

²³Imik Neyung adya deknaʾ edya seleb deksuk. Anasa wera, nimi yokaʾ adya oruknanya dangoka ununggom, mem.

²⁴Anasa wera, hemyab o, Imik Neyung adya ugun eboka youbsuk sum enyek, ugunja ululum nong enyek, weneba al anaso uboka, Imik Neyung ab neikaʾ ulululum.

²⁵Wera gela nenya dobdanggom nim emba lebnamna. Ban nenesemba dara, nara Wenelesilnya bek ab yuba hnon okoka neknenggunyok bok, Wenelesilnya bedya nak angoo yadyek senewoka eleklenelnya bedya, ban senelenanya nenyek neknesin.

²⁶Wenera yokaʾ-yokaʾ igina kwesinaʾ lanalelabok anasa, nadya seinilamnaʾ ara, sikba wen pe ulumak sok uluseng senelamna.

²⁷Anda gela seleb domen bok dara, gel genera lobsinya senewoka, yeiriwoka pika enaʾ ara mem. Anda gela anam donaʾ orok bok dara, gela dobnun senewoka enaʾ ara mem.

²⁸Bok, anda gela dobnelam dara, nera malya unaʾ gomaʾ. Anaso neikik, goubenya gel gera nenya dolomla dara, nera alda malya unggulumla. Bok, alda doldalamak nim era, yokaʾ-yokaʾ igina kwesinaʾ damok ara, sikenek ulumnesil. Nadya dara, unurub igin yakaʾ danyek ugunuk kwebsilyek aboka lelemna.

²⁹Hemyab o, nadya lelenanya nera, damok ara banasa lelemna. Nu ulumab salek enera wera mekaʾ me ubla. Anasa wenyek danyek moruwoka, gela yak nang era, gela dobnenggomnya beneso ak ulumnamso.

³⁰Ganya suguwoka engelelenya bera, unuwanggunanya benesoʾ ak, or-or uboka pe ululul. Okselelenya bera, ei-ei ganya bobnenggunanya benesoʾ ak ululul. Yok-yok bonaʾ deklenya bera, alda or-or uboka, bonaʾ garananya beneso ululul.

³¹Sokok an wen ulumlaʾ eillililum ara, mek anam denghenelabok anasa, sokok an yokaʾ-yokaʾ unululumnya nenyek, salyaʾ so boboka lololumnya neneso ulululum.

³²Nadya senelamnaʾ ara, ugunda okna ulusil ak ab loboka, pe ulululum senelesin. Gela oroknya bera, alda Wenelesilnya bek ganya hekellilinun senewoka, Wenelesilnya bedya perob senelelanya nenyek, ganya dib beiliwoka ulumla.

³³Bok gela yaknya bera, alja gel gedya perob senewonulul senewoka sokok an ulumlaʾ digum ok sobaʾ seiniro ulumla.

³⁴Wera anadya alja ganya era, bokgokoka ulumla. Nenya donaʾ orok gel gek dara, alja senelamlaʾ ara, alja ganya nong ab dara, Wenelesilnya bedya dangoka ulunun senewoka, Wenelesilnya seinilamla ok geklewoka seiniro ulumla. Bok, nenya domna gel gera, nadya nenya edya perob senewonululaʾ aboka, ulumlaʾ anasa, alja ganya seinilamlaʾ ara, sokok anyebnya nok seiniro ulumla.

³⁵Ban nadya ugunuk momnya doboka beibsinaʾ ara, ban men ununggom. Ban nenyek ununaʾ ara, mem aboka ubnenggubna. Alda ugunuk perob dosululaʾ aboka ubna. Nadya ugunja unuwanok senelamnaʾ ara, ugunja unuwanamunaʾ geknewoka peblenya nenyek unuwoka, onoʾ ugunja ganya era, Wenelesilnya bek bekoka, dib beiliwoka ulululumaʾ aboka lebsin.

³⁶Wera nimi ben hnon, nadya molob lobsa gel genyek, goubenya yamen dangoka pe ulunamakanya, nunda kaboka siklewoka ubnenggunusinimaʾ anasa, nadya molowasa gel gek or dobnamna senelamla dara, nera or alja senelamla sok unuwolul. Anasa wera, sik dobdanasereng dara, nera malya unaʾ gom anasa, or perob.

³⁷Bok, onoʾ nimi ben hnon nadya molob lobsa gel gek ara, nadya donaʾ lobnamna senewanamla dara, ban seiniwalyaʾ ara, yok nim edya gom, alja ok ganya anaso seiniwalya dara, nara pe ulumnamla senelamlaʾ anasa, or lobnamlaʾ ara pelemla.

³⁸Dara, gela domna nang ara pe unulamla. Bok, gela gobdo donaʾ orok nang era hyak nauba pe unulamla.

³⁹Nenya domna gel gera, alja nenya embengaʾ or ulumla salek era, alja nenya ek neikaʾ ganya daklinggoka ulumla. Bok, alja nenya seleb somoganemso dara, wera gel gera alja nara ban benyek dobnun senewanamso dara, al Imik Neyung yuba dorobnya bek senelamla dara, or unuwolul.

⁴⁰Bok nenya somogamso gel gera, yok nenyek donaʾ orok dara, hyak nauba pe ulumnamla senelamna. Nera nadya ganya edyok seiniwoka lebnabok, Imik Neyung Geisinya migib adya lelemlaʾ ak lelemna, senelamna.