Read Nalca 1 KORINTUS 8 Bible Online

1 KORINTUS 8 - Nalca bible

1 KORINTUS 8

¹Wenera meewoka giblemaknya nek, beil balamak denaʾ yub ek lebnesin. Nim adya, ”Nunda nidyaʾ ara, yokaʾ-yokaʾ ella ulumab,” alamakaʾ ara ella ulumab. Bok, nimi geremseng ulumakaʾ nong adya, nauba dengdang ganya nenelesil, bok wanaʾ unaʾ adya danyek, nim ak bukullilisil.

²Nimi ben hnon, nara yokaʾ-yokaʾ ara, nauba ella ulumna seneldalalanya bera, hyak dib nong ara, yokaʾ-yokaʾ ganya olowoka anam pe ella unggulumla.

³Bok, Imik Neyung ak ganya ologoka wanaʾ ululanya bera, Imik Neyung adya alak ella ulumla.

⁴Dara, denaʾ ara meewoka giblemaknya nek beil balamak yub ek dara, nera meewoka giblemakaʾ ara nong ak dara, dib nong unggulumlaʾ ara, nunda ella ulumab. Dara onoʾ nunda hnon sokok an yokaʾ-yokaʾ ulumlaʾ adya ella ulumabaʾ ara, Imik Neyung ara hyak hnonok Imik Neyung ok ulumlakanya, yok Imik Neyung era, hnon mekaʾ unggulumla.

⁵Dara, nimi yok nang edya, Imik Neyung ara an, Wenelesilnya yokaʾ ara an, alamaknya nera, imik sam hnon, sokok sam hnon, nim ugumaʾ nauba ululabok,

⁶nun nong ak dara, Imik Neyung nunja neyung hnonok ok ulumla. Al adya dara, yokaʾ-yokaʾ nidyaʾ uyimoknya bek ulumla. Nunda al nong amba ok ulumab. Nunja Wenelesilnya bera, nuk dara hnonok ok ulusilaʾ ara, Yesus Kristus hnonok ulusil. Nidyaʾ yokaʾ-yokaʾ ara, Yesus Kristus pik moruwoka uyimok. Dara, nunda al adya embengaʾ ulumab.

⁷Bok, ban ella ulumabaʾ anaba, ban nera nimi nidyaʾ ella ulumakaʾ goma! Hnonda youmaʾ dara, bisaʾ giblemekaʾ adya, wenebabya sobaʾ giblemakaʾ ak sam beil balamak denaʾ era, an senewoka bekelmoublemak. Anadya sikja mek ganya era dib kanaʾ orok adya, doboka den dara, nera malya unaʾ denewanel senelemak.

⁸Hyak dib nong ara, denaʾ adya dara, nub Imik Neyung ab ganya kwebdangoka pe unaʾ ara unggulumab. Wera hnon denaʾ loboka denggunesibya dara, anadya malya so danganggulumab. Dara onoʾ saawoka, hnon denaʾ doboka denesibyaʾ anaba, perob so danganggulumab.

⁹Bok, ugunda hyak pe keebmoublulum! An adya nidyaʾ yokaʾ-yokaʾ ara, ella uboka unululamaʾ adya, yub dib doboka ganya kanaʾ orok nim enyek, oluk diknaʾ girik anaso neniyiwamenek anasa, keeboka ululom.

¹⁰Nenera ban nenesa lemna, Anda yuba dib doboka ganya kasomnya benyek, bisaʾ amba beil balamak denaʾ dero bulusom dara, onoʾ dero bulusomaʾ ak hnon, ganya kanaʾ oroknya bedya eibgeso dara, wera eibgesonya bera an delesom denaʾ era, albabya asaʾ ganya boboka denggunumso senelelam de?

¹¹Wera anadya, anja ganya olowoka ella ululamjok unululamaʾ adya, yok nimi yuba dib senewoka ganya kanaʾ orok nim era, nera Kristus ara al benesa seleb somogok bok, orok dangamnaʾ anaso dangalamla.

¹²Wera an yuba men doboka ululamnya bedya, onoʾ bisaʾ amba beil balamak denaʾ doboka deregoka ululamaʾ adya, nimi yok yuba dib ganya kanaʾ orok uboka, hmeng ulumak nim ek, malya geboka hmenga nenelelam dara, wera an unululamaʾ adya, anda Kristus ak anaba malya unululam.

¹³Anasa wera, nadya delemnyaʾ adya, nadya hemyabo malya unaʾ ubijek aboka anasa, denaʾ amba leboka, nadya hemyabo malya unaʾ gaka malelebok dara, wera nara pam soub ara hyak mekaʾ denggunumna e.