Read Nalca 2 KORINTUS 11 Bible Online

2 KORINTUS 11 - Nalca bible

2 KORINTUS 11

¹Nara hnon dongdang henemna bok, or keboka dogom hululum. Aldib, nadya yuba seleb dogom aboka kel lololum.

²Neyung genong adya, nimi salawanggom gelma ara, nengma era hnonok ok eleklemak sok, nara ugunuk doboka Kristus ak lesisa. Anasa, nara ugunuk Imik Neyung perob senelamla hman ganya bolosin.

³Hawa gek bagaʾ geremseng adya bob geregemok sok, Kristus ak ganya gekman bojam ululumaʾ anyek, bob neneweisilyek senewoka lok ganya bolomna.

⁴Nunja anaso leb elegesubaʾ Yesus yuba dibaʾ ak gom, alda yok nim edya yok so Yesus yub enyek nekel yalasak enyek, perobaʾ aboka dololum. Dara, perob seininaʾ ganya eb, perob lero yanggan yuba dib nongaʾ nunja leb elegesubnya nera loboka, salyaʾ dib gom seininaʾ eb, yok so perob lero yanggan yub eb danyek, dololum.

⁵Bok nak dara, yok senenggom yuba lenaʾ gak nang ulumak senelelum bok, nababya meknya bek senenggulumna.

⁶Nara yuba sanaʾ ara, pe hobyang sanggulumna bok, ella danganaʾ ak dara, nara dongdang anaʾ mekaʾ oroknya bek ulumna. An unaʾ era ugunuk yokaʾ-yokaʾ unusubaʾ ak anyeb, laga dangamokaʾ ara ella ululum.

⁷Nara Imik Neyung adya perob lero yanggan yuba ugunuk lel elegel yeilisisa dara, nak rupiah eleklemnenulum aboka molowanggumsa. Wera anadya, nara ganya sokok nenebdangamsakanya, ugunuk imik neneweisisa dara, anya nadya ugunuk malya ubsisa de?

⁸Nara ugunuk arawoka yuba lebsununaʾ aboka, yok Imik Neyung yuba donaʾ nim ek rupiah dolomsa.

⁹Wera an wa welesisa sum enyek, nak unuruwaʾ okna ubnyoknya nemba leboka, ugunuk igina kweiyiwanggusisa. Nadya hekaʾ ak doboka bobsinya senesenya nera, nunjaʾ hemyabo Makedonia nimi yeindeboka, pe aralenyek. Nara ugunuk obnebsinyek senewoka pe siklewoka ulumsa sok, eimik eneba al nenyek sobaʾ unulumnamna.

¹⁰Kristus adyaʾ dib jong yub era, nak an ulunel bok anasa, Akhaya mok ebnya ben hnonja, nadya an nonggo alamna senelenanya nera, yuba garawanggununel.

¹¹Hekasa nara anaso wenyhen do? Nara ugunuk wanaʾ usinaʾ orok adya anaso lebna de? Orok! Nara ugunuk wanaʾ ulusinaʾ ara, Imik Neyung anaba ella ulunel!

¹²Nadya wen unulunanya nera, sobaʾ unubgiga balamnamnaʾ adya, sikda hnon senenggom yuba len nang aldalamak nang era, nunda Paulus benya arob nanga welemak sok, numba unulumab aboka nonggo hijek anasa, lobnokaʾ aboka pika leblemnamna.

¹³Wera an unulumak nang era, sikda sondaʾ yuba lenaʾ gak nang uboka, nimi bol gereklemak nang ulumak. Sikda sondaʾ bok, Kristus bedya yuba lenaʾ gak nang ulumab seneweisinokaʾ aboka, samal meneklemak.

¹⁴Bisaʾ dubnya Satan anaba, dilinaʾ lero ulumla henokaʾ aboka samal meneklamla sok, sikba sondaʾ anasa yuba len nang abdangoka samal meneklemak dara, loka dabnenggunususo.

¹⁵Anasa, bisaʾ dubnya bek arawoka welemak nang eneba, Imik Neyung wa welemak nang anasoʾ anyek sene sunulumak dara, loka dabnenggunususo. Anya eimik era, sikda nidyaʾ meknewoka unulumak sok, sunuwoka dirigoka malya nenewanasil.

¹⁶Nara onoʾ saawoka lebnamna, nimi hnon nak alda dongdang anaʾ anya senenaʾ ara mem. Bok ugunuk dara, or anam alda dongdang anaʾ anya senewanenulum dara, nara mek nonggo henunaʾ aboka, or unuwolul senewolulum.

¹⁷Wera nadya nonggo aboka sabnya dara, nera Imik Neyung adya perob senelelanya nenesoʾ ak sanggulumna. Wera nera, nara dongdang anaʾ nang eneso uboka salamna.

¹⁸Ugunja dara, nunda geremseng nang seneldalalumaʾ adya, nimi dongdang anaʾ nang ek ara, or namenaʾ siklewoka ululumaʾ anasa, nimi nauba sokok an ulumlaʾ ak sunuwoka nonggo alamakaʾ anasa, wera onoʾ naba nonggo henemna.

²⁰Ugunuk oruknaʾ nang nenelesak gom, ugunuk lobaʾ nenelesak gom, ugunuk ab duboka lolowoka bonaʾ dolomak gom, ugunuk mekaʾ neneiyiwoka, sikenek imik nenelemak gom, ugunuk hogunga wablasak gom dara, nuk or unulusinok senelelum.

²¹Bok nuk dara, unurubnya nek ara, hmeng so uboka unuwanggumsaʾ adya, alya ulunel. Bok, yok nim edya yokaʾ ak nonggo heneseng dara, nababya or asaʾ ganya boboka unuwanasinya! (Nara dongdang anaʾ anya beneso bok lebna.)

²²Sikda Ibrani nang ulumak de? Naba Ibrani nang ulumna! Sikda Israeli nang de? Naba Israeli nang ulumna! Sikda Abraham nang yilaʾ ulumak de? Naba Abraham nang yilaʾ ulumna anyaʾ!

²³Sikda Kristus adya wa wen nang ulumak de? (Nara lobaʾ oronanya benesoʾ anyek lebnamna.) Nak danyek, Kristus adya wa wenaʾ nongnya ulumna! Nara Kristus wa yeiriwoka hyak nauba so welemna, anasemba leboka liga gong henga gouboka beillilenyek, hnonda sobaʾ saboka olonyek dara, liga gong somogeisinyaʾ ak elelloblonyok.

²⁴Liga lambadya Yahudi nim edya henga gouboka, legebnaʾ li denga hnonok uboka ebdobnya obadya deboka onyek.

²⁵Liga winilya Roma nang edya gamaʾ adya waboka obnyek, liga hnonok girik adya saboka obnyek, liga winilya mek ekla bunaʾ yabanaʾ malya dok dara, salyaʾ mam beragasa, hnon sum era mek dubuk salyaʾ mab mouruwasa.

²⁶Hyak omom uboka okna pika, nauba yabalamsa. Meka gwenel lendelenyok, hokaʾ don nang ek loka kwelenyok, Yahudi nang ek hnon, onoʾ Yahudi gom nim ek hnon lok ubnen bok yabalamsa, senenggom heikek hnon, gak denaʾ ak hnon, loka kwebnenbok yabalamsa. Mek dubuk ab loka dabnen bok, onoʾ yuba donaʾ orokjok, nunda yuba don nang alamak nang ek ab hnon loka kwelenyok.

²⁷Nara wa nauba yeiriwoka welemsa dara, hmeng hwam ulunyok, hnon sum hogunga manggulumsa, hnon gwanenga meka bunya malamsa, hnonda gwanenga lol morulamsa, hnonda ongon akleng orok adya saragenaʾ kwelenyok.

²⁸Wera eini lebnanya nenesonya nera nauba ulunyok bok, hnon ara nim Imik Neyung yuba dolomak nim enyek sobaʾ seiniyiwoka, ingmun berelenel.

²⁹Nimi hmenga dangalamak dara, nera naba hmeng ganya nenelenel. Nimi hnon malyanggalamak dara, nak dara, angoo senewoka ganya oldalamna.

³⁰Nara yokaʾ-yokaʾ ak nonggo henesinya dara, wera nera nak hmenga ulunelnya nenyek nonggo henemna.

³¹Imik Neyung, nunjaʾ Wenelesilnya Yesus aljaʾ neyung bera, sobaʾ giblemnemaknya bera, nara sondaʾ lenggulumnaʾ anara, ella ulunel.

³²Nara Damsyik heikek ulusebok, anyagan soko dubnya bera Aretas onoʾ alja senenggom dubnya be ulumookanya, nak henga goubnelum aboka orugosuk dara, yin bonaʾ nang era, pika welenyek.

³³Bok heik legaʾ gegen pik sor serrema doronggoka, henga geregoka doblingganyek. Dara, anyagan welemokaʾ dubnya bedya soruk ak ab goboka beiya buksa.