Read Nalca 2 KORINTUS 12 Bible Online

2 KORINTUS 12 - Nalca bible

2 KORINTUS 12

¹Nonggo aldanaʾ ara, perobaʾ lananggulumlaʾ ak ululabok, wera, nara Imik Neyung adya lendar dib ab, alja yuba laga sal eleklenelnya nenyek, moruwoka lebnamna.

²Nimi yuba donya ben hnon, Kristus adya imik heikek hyak imik sam do welewok salek era, wera gibnaʾ meija dubukaʾ badya lemok danyekaʾ ak, ella ulumna. Alja nong gekman dobok gom, or lendara ak gom ara, dibaʾ orokaʾ ara Imik Neyung ok ella ulumla. Do welewoknya bera imik heikek denewaʾ winilyaʾ ak welewok.

³Nara onoʾ hnon saawoka lebnamnaʾ ara, bera aldib nong gekman dobok gom, lendara dokaʾ ak gom ara elgom ulumna bok, Imik Neyung ok ella ulumla. Bok nim ak dara, ella ulumna.

⁴Bera alda imik heikek bo byuk dara, nim ek ella dangoka salalulum henggomaʾ, sabnamenggom yub enyek, kemok.

⁵Wera benyek, nadya dara, nonggo henesinya bok, nasamba nonggo abdanggunusinya. Alda nak hmenga dangalanelnya nemba danyek ok, nonggo abdanasinya.

⁶Nara yokaʾ-yokaʾ amba nonggo henesinya dara, dib yub amba ok lebnesinyaʾ anasa, dongdang anaʾ anya wenyhenggununeseng. Nadya unulamnaʾ ak eillilimakaʾ hnon, nadya yuba salamnaʾ kelemakaʾ hnon, banyek ok sunuwoka nak anaso unulamla senewaneseng. Bok, alda dibnya nek loboka nauba so unulamla seneweinijek aboka, nara yok yuba hnon sabnunaʾ unadyok, siklewoka ulumna.

⁷Imik Neyung adyaʾ senenggomaʾ unu laga eiro yabalenanya nenyek, eillilamnaʾ adya dengdang ganya bobnyek aboka, sabalaʾ hnon nadyaʾ nong lomok, meiyinyok. Nara dengdang ganya bobnyek aboka, ban sabalaʾ manyokaʾ ara, bisaʾ mal dibaʾ lebom alalulaʾ aboka elegenyok.

⁸Wera sabalaʾ manyokaʾ ak, gwenewanelom aboka, Imik Neyung ak liga winilya molobsiniwasa.

⁹Bok Imik Neyung adya dara, ”Anda hmeng ululam danyek, nadya migib era, gobdo nauba dangalamlaʾ anasa, nara anak wanaʾ uboka elekgenaʾ ara seleb nauba ulunggel,” henyok. Nara hmeng ulumna ak an, Kristus adya migibaʾ nak gouluwoka bo ulumnenelaʾ anasa, nara hmeng ulumnenel dara, nonggo alamnamna.

¹⁰Anasa nak dara, hmenga dangalanel dara, perob senelamna. Nara hmeng ubnen salek enyek, onoʾ migib ulumnaʾ anasa, Kristus amba leboka hmeng ulumna gom, igin kwelenel gom, okna ulunel gom, ol neblenyak gom, lebelmoublenel gom dara, pelenel senewoka eiya dablenel.

¹¹Nak dara, hyak salyaʾ anya ulunabok, yokaʾ-yokaʾ pe ununaʾ ak sam amba dara, senenggom yuba lenaʾ gak nang eneba sikda senenggomaʾ bok, nak dara mekaʾ sirikaʾ ak ara, hnon unggulumla. Ban neneso leboka, ugunja nak ara pelemla senewoka gigiwananesom bok, ugunda unuwanggunulumaʾ adya, nara dongdang anaʾ anya beneso dangalamna.

¹²Nara aldib Kristus adya yuba lenaʾ gaknya laga beknaʾ ulumlaʾ ara, wa wenaʾ geknebaʾ ak lok soʾ beknaʾ hnon, senenggom lok so ununaʾ hnon, yok-yok migib ununaʾ ab dadya, ugun gangganek ab, nara hyak ganya siklewoka laga okoka welemsa.

¹³Anasa yok-yok mok soko yuba donaʾ nim ulumakaʾ ara, yok makoka ununaʾ orok, ugunuk neik so welesisa bok anasa, hekaʾ ak goʾ weilik gesisa do? Alda banyek hnonok lobsisaʾ ara ban: nak rupiah arawananulum aboka molowanggusisaʾ ak hnonok meknewasaʾ anasa, sugunaʾ ganya bonumun dara, wera laga lebnenulum.

¹⁴Sum enera winilinya sum ugunuk kemel yousununaʾ aboka diri ubna. Anasa yanamna dara, ugunuk ara igina neneb eleganggunusin. Wera nadya perob senelamnaʾ nong ara, ugunja boboka delelumaʾ ak gom, ugun nong anyek nak eleganenok senelamna. Wera mekmab edya nauba nim ek yok-yok bonaʾ bolowoka beillinggulumak bok, alda nauba nim edya memab amba aboka yok-yok bonaʾ bolowoka beillilemak, anasa lemna.

¹⁵Nadya ganya doboka yokaʾ-yokaʾ ara, ugunsamba leboka, nadyinya orok nenewoka dolomnakanya, na nong anaba malyaʾ neneldalamna. Nadya ugunuk nauba wanaʾ ulusin bok dara, ugunja dara, nak ara mek wanaʾ ubnenesom de?

¹⁶Wera nara ugunuk ara, yokaʾ-yokaʾ amba ol nebnenggulusisa. Bok, nara geremseng ganya boboka, ugunuk sondaʾ amba bobnenewoka, henga weboka youbsisa senelelum de?

¹⁷Nera hekasa unuwanasisinya! Nim ugunuk an wa webnelum aboka bokol yalasin nang pik anyeb uboka, ugunja denaʾ bonaʾ doboka delesisa de?

¹⁸Nara Titus benyek ugunuk an aralesululaʾ aboka bokol yeilimsa, dara onoʾ yok yuba donya be hnon alab neikaʾ wel binilum aboka bokosisa. Titus bera, ugunuk ab bonaʾ denaʾ hnon molowoka doboka desuk de? Bok nab Titus beb dara, neik ganya boboka, neik ununaʾ edya neikaʾ welenamaʾ ak, eiyilum do?

¹⁹Ugunja dara, ban nidyaʾ lelemakaʾ ara, meknenggulumab senewoka, mala doldalamak senelesulum. Bok, nunja nidyaʾ ugunuk an lelemabnya nera, Kristus lomok uboka nenyek lelesabaʾ ara, Imik Neyung hogung ak lelemab. Nadya wanaʾ ulusin nim o, ban nidyaʾ unulumabnya nera, ugunja yuba dib senenaʾ nong anyek, gobdo migib dosululaʾ aboka ulusab.

²⁰Nara kemel yeisinya sum enyek, ugunja unaʾ era, nadya anaso ubneseng senemnyaʾ unaʾ orokaʾ ak eibnyek aboka hnon, onoʾ ugunja dara, nak alda anaso ubnamso senenumunaʾ anyek eibmunuk aboka hnon, lok ganya bolomna. Hnonda wabdoumunuk, hnonda hman ganya bobdangoka, yu ganya boboka, nanokok pewonulul yok nim era lek senewoka, derewoka wabdangoka, o lom-lom pik gelelenga lebdangoka, dengdang ganya boboka, doluwoka malya nenebdangoka ubdoumunuk aboka, lok ganya bolomna.

²¹Nara ugunuk an kemel yeisinya sum era, Imik Neyung adya ugun gangganek sokok nenewanelyek aboka, lok ganya bolomnaʾ ara, hnonda ugun gangganek youmaʾ unulum malya unaʾ enyek, gela salawoka, heng kemenaʾ malya dangalamla malya unaʾ unuwoka, meilinya unulumnya nenyek, eibkweboka ganya dangawanggumunaʾ anyek eiyiwoka, igin ganya bobnyek aboka, lok ganya bolomna.