Read Nalca 2 KORINTUS 2 Bible Online

2 KORINTUS 2 - Nalca bible

2 KORINTUS 2

¹Anasa wera, nadya dara, ugunja ganya soloma nenesinaʾ dalyek aboka kemel beisinaʾ era, lobnamna senemsa.

²Nadya ganya hek elegananeseng nim enyek, nadya soloma nenesinya dara, wera hek nim edya nak onoʾ ganya hek eleganeneseng do senelamna.

³Wera anasa nak ara, ganya hek elegananesom nim edya, nak soloma nenewonumunuk aboka, anaso seinimna yub era, an momnya doboka beibsisa. Nadya ganya eiya dabnenel dara, sikja ganya eneba eiya dabnesil senewoka ubsa.

⁴Nara ugunuk momnya weboka beibsisaʾ ara, hyak igin ganya boboka ganya soldowoka obdasakanya, heng mekaʾ gadyaʾ beibsisa. Ban nadya unuwasaʾ damok ara, ugunuk solom ganya boboka angwei senewoululumaʾ aboka gom, alda nara ugunuk hekaʾ huru wanaʾ ulusinaʾ anyek, ella ublulumaʾ aboka ubsa.

⁵Nimi ben hnon soloma nenelamla dara, alda nanokok soloma nauba gobdo nenenggulunel bok, nera alda ugunuk nidyaʾ ak hnon soloma nenelesil. (Bok, nadyok goboka nauba lebnyekaʾ anasa, ban nenyek ok lebna.)

⁶Banaso unusuknya bek ara, ugunja alak igin elegelumaʾ ara, seleb nauba elekgogowoulum.

⁷Wera alda nauba solom ganya boboka, ganya obdangoka dib malya dalyek anasa, wenyek dara, ugunda alak sugunaʾ ganya meewoka, alak onoʾ ganya hekiyiwoululum.

⁸Ugunja alak ara wanaʾ ulunjab an beknaʾ enyek, laga amalalulumaʾ aboka, nara ugunuk weneweisin.

⁹Wera ugunja dara, yokaʾ-yokaʾ nidyaʾ pe keboka unulumakaʾ ara ella doununaʾ aboka, nara sene sunusinaʾ dibaʾ momnya doboka beibsisa.

¹⁰Ugunuk an malya ubsilinya bek, ugunja meewanalum dara, nababya neikek unulamna. Wera heknyek unulamnaʾ ara, ugunuk meewanalum danasa, Kristus saramek sam ab anara unulamna.

¹¹Nunda bisaʾ dubnya Satan bedya welemla wa pik era seleb ella ulumabaʾ anasa, nadya ban unulunanya nera, bisaʾ adya nuk lolowoka imik dalyek aboka unulamna.

¹²Kristus adyaʾ perob lero yanggan yuba lebnunaʾ aboka, Troas heikek bisa dara, Imik Neyung adya wa nen weblulaʾ aboka seleb pika bak lobnyok salek,

¹³Titus benyek eibnenggubsaʾ anasa, nadya ganya seininaʾ goʾ pe kaboka ubnenggubsa. Dara anyagan ulumek nim ek, nara binimna aboka lebgogowasa dara, Makedonia moka bisa.

¹⁴Bok nunda Imik Neyung ak perob aboka sobaʾ giblemab! Al Imik Neyung welemlaʾ adya nuk sam ara, Kristus pik uboka yokaʾ-yokaʾ ak hmenga nenewoka ollamaklamab. Onoʾ alda nu pik uboka alak ella dangan gen-gen songaʾ anasoʾ ak, mok soko me nidyaʾ olleleklamla.

¹⁵Nuk dara, Kristus bedya gen-gen song meklaʾ Imik Neyung amba ulumab. Nim uk hinik binobaʾ aboka ulumak nim emba dara, nuk dara, somoknaʾ damok song ulumab bok, alda embengaʾ ulunobaʾ aboka bleblesil nim emba dara, nunda mereldisinaʾ song anasoʾ ak ulumab. Bok heknya ak ban damok era, unuwanesonya be hnon ulumla do?

¹⁷Nimi nauba yok nim edya Imik Neyung yuba lero yabanaʾ ara, deknaʾ dobnobaʾ aboka welemak so nang ek, nunda ununggulumab. Nunda Imik Neyung adya wa nera welemnelum aboka elegousukaʾ anasa, nunja lero yabalamabaʾ ara, geisa ganya adya welemab. Nunda Imik Neyung yuba lelemabaʾ ara, Kristus lomok uboka, Imik Neyung saramek uboka lelemab.