Read Nalca 2 KORINTUS 3 Bible Online

2 KORINTUS 3 - Nalca bible

2 KORINTUS 3

¹Nunda onoʾ hnon gigibdanobaʾ aboka leb einimab de? Nunja dara, yok nim unulumak sok, ugunuk gom, ugunuk ab gom, wa nen pe welelanya an momnya donaʾ bobnesibya de?

²Ugun nong anyek, nunjaʾ wa nen pe welelanya an momnya donaʾ dibaʾ ululumaʾ ara, nunjaʾ ganya lomok sam seleb momnya dobsukaʾ ara, nidyaʾ yok nim edya seleb ella uboka einilemak.

³Ugun nong ak dara, nunda ugunsamba welemoubukanya, ugunda Kristus bedya momnya donaʾ ululumaʾ ara, yok nim ek laga amalasulum. Bolpen adya momnya dobnenggubsuk bok, alda Imik Neyung embengaʾ ululanya alja Geisinya bedya momnya dobsukaʾ ara, girik lagasaʾ ak dobnenggubsuk bok, alda nimi ganya ek momnya dobsuk.

⁴Nunja ban wenhyabnya nera, Kristus pik uboka Imik Neyung ak dib senelemabaʾ nong anasa, lebab.

⁵Nunja unu welemab wa nemba dara, numbeyok dara, unuwamenggomaʾ ak ululabok, nunja unu migibaʾ welemabaʾ ara Imik Neyung adya ok eleklesil.

⁶Imik Neyung adya nadya wenyok ugunub dibaʾ wenyaldan yuba wa pe webnelum aboka migibaʾ nuk elegosuk. Ban wenyok yub era, momnya dobokaʾ ak unggululabok, alda ganya ak ulumla. Dara momnya dorob yub era somogollilisil bok, ganya ak yub era embengaʾ eleklesil.

⁷Sagobadya unuwanalum an yub era, nimi somoknaʾ yuba bok, momnya dorob girik lagasaʾ ak doboka elegosuk sum era, Imik Neyung adya senenggom dilinaʾ era, Musa bedyaʾ hogung ak hyak senenggomaʾ anyek yebemok. Wera Israeli nim edya dara, Musa bedyaʾ hogung ak an yebemok dilinaʾ domenya edya, men heng kemenaʾ lomek bok, ban dilinaʾ era mek danggiga balamok. Dara, nimi somoknaʾ damok unuwanalum an yub enyek, senenggom dilinaʾ edya yeb goluwoka elegousuk bok,

⁸Imik Neyung Geisinya adya dib embengaʾ eleklesil wa wenaʾ era, wera hyak senenggom dilinaʾ nong enyek yeb goluwoka elegousukaʾ ak ulumla.

⁹Nimi somoknaʾ bo lanalamla unuwanalum an yub enyek babya, senenggom dilinaʾ yebemok dara, eimik nim ak peldisinaʾ elegousukaʾ amba dara, hyak senenggom dilinaʾ ak ulumla.

¹⁰Anasa wera, youmaʾ yeblemok dilinaʾ era, wenyek senenggomnya yeblelanya neb sunuwanesibya dara, wenyeknya nera hyak senenggom adya, youmaʾ anya nera hyak dolbalekaʾ dangalamla.

¹¹Or anam denghenemok yub enyek babya, dilinaʾ nauba yeblamla senemek dara, hyak dibaʾ ulumnamla yub era, hyak nauba senenggom dilinaʾ yeblamla senewanemak.

¹²Wera nunda nenyek unu dib senelemabnya nenedya, wera ban enera yuba asaʾ ganya boboka lelemab.

¹³Nuk dara, Imik Neyung dilinaʾ anyek Musa bedya hogung ak yeboka dengabgiga balamokaʾ anyek, Israeli nim eibijek aboka, Musa bedya hogung goulunaʾ lilibdangamok sok, nunda ununggulumab.

¹⁴Israeli nim era, sikja ganya seleb ong ibsuk. Dara onoʾ wenebabya, sikda youmaʾ wenyaldanaʾ yuba anam einilimak salek eneba, hogung goulunaʾ anaso anam sikja ganya ak ulusil. Kristus pik uboka adya ok, ban goulunaʾ era gloklamla.

¹⁵Anya, al weneba Musa bedya momnya domok yub enyek einilimak dara, sikja ganya era ong iboka suʾ kelesil.

¹⁶Bok nimi hnon Imik Neyung ak ganya dangawoka yalamak dara, hogung ak goululesilaʾ ara glokoka boloklesil.

¹⁷Wera Wenelesilnya alamlaʾ ara Geisinya ak lelemla. Dara, Imik Neyung Geisinya ulumlaʾ ara, nimi henga lob losinaʾ anasoʾ ara, anyagan ulumla.

¹⁸Wenyek dara, nunja hogung goulusinaʾ ara hnon unggulumlakanya, nunja Wenelesilnya bedya senenggom dilinaʾ nim ek yeblemab. Yeblemabakanya, nunda sob-sobaʾ also nenebgiga balasil. Dara, ban dilinaʾ en yeblemab ara, Wenelesilnya bek ab yalamlakanya, Wenelesilnya bera Geisinya be an ulusil.