Read Nalca 2 KORINTUS 4 Bible Online

2 KORINTUS 4 - Nalca bible

2 KORINTUS 4

¹Imik Neyung adya nuk angoo yadyek senewoka namen ubsukaʾ adya, ban wa nenera doboka welemab. Nenesa leboka, nunda okna bar aboka hmeng ganya bonggulumab.

²Nunda doknololanya, nimi malya dangoka alya dangananya nera, lek aboka lolomab. Nunda nim ak bob geregoka, Imik Neyung yub ak dangab menegoka unggulumab. Alda nuk dara, Imik Neyung wa welemabaʾ ara, dib nong yub enyek laga amawoka welemab. Ban adya, nimi nidyaʾ ara nuk dara, Imik Neyung hogung ak ara, aldib anara welemak senewoka, sikjaʾ mek ganya ek ab wensenewaneseng.

³Nunja perob lero yanggan yuba lelemabaʾ ara, hnon nim ek dara, pe olowoka ella damenggom ulumeija dara, wera nera sikda somoganobaʾ aboka, ulumeija nim ek anyek pika seregeledya.

⁴Sokok an malya unaʾ gakaʾ ululanya bedya, yuba dib senenggulumak nimi ganya ibel leblesil. Wera an bisaʾ dubnya benedya, Kristus bera Imik Neyung sununaʾ anedya, Kristus si imik nenen yuba dilinaʾ heng eibijek aboka, heng luma nenelesil.

⁵Yuba lel eleklesabaʾ ara, nun nong anyek geklewoka lel eleknenggulusab. Alda yub enera, Yesus Kristus ara Wenelesilnya nong ara an, an yub enyek, lel eleklesab. Bok, nuk dara alsamba leboka, ugunuk arasin nang ulumab aboka lel eleklesab.

⁶Imik Neyung adya leleladya, ”Gunaʾ lomok ab dilinaʾ yeblul,” alamla Imik Neyung enedya, nunjaʾ ganya lomok dilinaʾ yeblesil. Al Imik Neyung adya alja nong senedyaʾ ella dangasin dilinaʾ yeblulaʾ aboka unulusil. Dara Kristus aljaʾ asok pik uboka dilinaʾ yeblesil.

⁷Bok ban geisa perobaʾ ara, nu soko adya uyisuk nimi nong lomok bolomab. Wera an unulumabnya nera, senenggom migib era nuk an unggulumla, alda Imik Neyung ak ulumlaʾ anyek laga dolulaʾ aboka ulumab.

⁸Nuk pika nidyaʾ aknewoka seklama daralesil bok, soldowoka orok nenenggulusil. Nunda hyak ganya elesil bok, gobdo malya dab senenaʾ ara unggulusil.

⁹Nuk ol neblesak bok, hnon gwab losinaʾ anasoʾ ak unggulumab. Hnon oboka manallilisak bok, hnon dibaʾ soldenggulusil.

¹⁰Yesus adya embengaʾ ulumlaʾ anyek, nunjaʾ nongok ak ab laga dolulaʾ aboka, alja gwekoka somokok somoknaʾ era, nunja nong ok anaba unulusil.

¹¹Yesus nong unaʾ enyek, nunjaʾ sokok anyeb nong ek an laga dolulaʾ aboka, nunda wen embengaʾ ulumab nim enera, Yesus anasa leboka, somoknaʾ lomok sam sobaʾ doboka doroklesil.

¹²Wera nera nunja nong ak ara, somoknaʾ damok anyek maboka dulusil bok, ugunuk ara embengaʾ unaʾ damok adya maboka dulusil.

¹³Imik Neyung yuba bukuk sam ara, ”Nara dib senemsaʾ anasa, nara yuba lemsa,” alamla. Wera an unu neik ganya bolomabaʾ adya, nunda dib senelemabaʾ anasa, wenyaboka lelemab.

¹⁴Wenelesilnya Yesus embengaʾ suboka bukiyiwok Imik Neyung enedya, Yesus pik uboka nub neikaʾ embengaʾ bukiyiwanesilekanya, onoʾ ugunub nub neikaʾ bo beil binisil.

¹⁵Wera ban nidyaʾ unulusilaʾ ara, ugunuk perob dosululaʾ aboka ulusil. Anasa nimi nauba ara, Imik Neyung adya wanaʾ uboka eleksinaʾ eiyiwoka, wera sikja Imik Neyung ak perob aboka giblemnemaakanya, wera anadya Imik Neyung si ara imik beillilemnemak.

¹⁶Ban anasa, nunda okna bar aboka hmeng ganya boboka unggulumab. Aldib nunja eilibik bokaʾ ak dara, blobgiga balalabok, ganya lomok ak dara, li sob-soba migib nenebgiga balasil.

¹⁷An wen mekaʾ igin ulusilaʾ anadya, nera wene salek seʾ ok ulusil bok anasa, eimik era hyak senenggom sobaʾ ulmoublemnamla imik nenesinaʾ danesil. Wen an ol neblesilnya nera or mek bok, eimik eleganesilaʾ ara, hyak senenggomaʾ perobaʾ ak eleganesil.

¹⁸Dara, nunda nonga laga ululanya nenyek kemero unggulumab bok, alda heng eilinaʾ oroknya nenyek kemero ulumab. Henga laga eillilemabnya nera seʾ salek ok ululabok, heng eilenggulumabnya nera eimik era, hyak sobaʾ ulmoublumnamla.