Read Nalca 2 KORINTUS 7 Bible Online

2 KORINTUS 7 - Nalca bible

2 KORINTUS 7

¹Nadya wanaʾ ulusin nim o! Ban nidyaʾ unuwanasin hyokaʾ ara nuk lebsuk. Anasemba nunda al Imik Neyung ak lok ganya boboka, nunda al Imik Neyung amba gobdo geisaʾ perobaʾ anyek ulunob. Nunjaʾ ganya nonga malya nenelesil malya unaʾ nidyaʾ ara, dibaʾ loboka geisa nenebdanamab.

²Ugunja ganya edya nu nonga doboka beibsululum. Nunja dara, yok nim ek ara, hnon malya ubnenggumouba, dara onoʾ hnon malya danok senewoka malya nenewanggumouba. Nunda yok nim ek ab bobnenewoka perobaʾ dobnenggumouba.

³Nadya ban wenyhenaʾ ara, ugunuk igina nenewosununaʾ aboka lebnenggubna. Eini sam ugunuk lemna sok, nunda ugunuk wanaʾ uboka, nunda hemyabo nang uboka, neikaʾ embengaʾ ubnesibya gom, somoganasibya gom anaba seinilamna.

⁴Nara ugunda pe unulumnemakaʾ anyaʾ senelesin. Nara ugunuk nauba gigilesin. Nunda yok-yok igin edya kweboka ol neblesil bok, ugunja unaʾ edya, ganya hekel eleklenulum. Anya nadya ganya era, anadya nauba eiya dablenel!

⁵Nunda Makedonia moka byuba sum eneba, goʾ pe bukoka dek-deka sobnenggububa. Nunda yok-yok pik ab uboka igina nenewoka ol neblesikaʾ ara, eilibek ara oldalamoubakanya, onoʾ meneng ganya lomok ab dara, lok ganya bolomouba.

⁶Bok, Imik Neyung adya alda nimi malya dan nim ek ganya hekellilisilnya bedya, nuk dara, Titus benyek anyagan bo yokaʾ nong adya, nunja ganya hekom husuk.

⁷Dara, nuk ganya heksukaʾ ara, Titus be anyagan yokaʾ adya ok gom, alda ugunja alak hek elegolumaʾ adya numba ganya heksuk. Alja dara, ugunja nab hyak eibdeisibya senelelumaʾ anyek, alda nak neknyok. Anya hnonda ugunja angoo senelelumaʾ ara, onoʾ nak mala dolonulumaʾ anasa, hyak nauba so eiya dabnyok.

⁸Nadya momnya doboka beibsisaʾ adya, ugunja ganya soloma neneweisisa. Men dara, angoo salya umsa senemsa bok, wenera wensenenggulumna. Ban momnya doboka beibsisaʾ adya, ugunja ganya soloma neneweisisaʾ ara, or seʾ amba ok ubsisaʾ ak eibsa.

⁹Dara, nara perob seneweisinaʾ nong ara, ugunja ganya angoo senewoulumaʾ amba ok gom, alda ugunja angoo senewoulum ganya enedya, ugunja ganya dangalumaʾ anasa, eiya dablenel. Ugunda Imik Neyung adya anaso unu bobnok senelamla solom ganya boblumaʾ adya, nunja unusubnya nera ugunuk malya nenewanggusuba.

¹⁰Anasa, Imik Neyung adya perob senelamlaʾ angoo senen ganya bolomakaʾ ara, nimi ganya danganaʾ nenewoka, onoʾ nimi blebsinaʾ dangalamla. Dara, nim ara ganya en lanalamlaʾ amba dara, solom ganya bonggulumak. Bok, alda nimi soko nimi ganya adya ok, angoo senelemak dara, wera nenedya nimi somoknaʾ damoka lanalamla.

¹¹Wera ban neik ganya era, al Imik Neyung seinilamla sok, ugunja angoo senewoka soloma dasuknya nedya unusukaʾ anyek, ugunda pe kendenelum! Wera an ganya enyek bolumaʾ adya, ganya goulunaʾ hnon lumaʾ ganya enyek, perobaʾ nenenaʾ hnon, malya unaʾ lek senenaʾ hnon, lok ganya hnon, nunda eibsibya senen ganya hnon, yeirinaʾ ganya hnon, meknelemak nim ek igina nenesinaʾ ganya hnon, ban bololum ganya adya, ugunuk nidyaʾ laga dosuk. Dara unululumaʾ nidyaʾ adya pe memelum beknaʾ ulumla.

¹²Anasa, nara ugunuk momnya donaʾ beibsa bok, ban malya unulumoknya nenesa beibnenggubsa, onoʾ ban malya unaʾ enedya igina kweboka gweklemek nim enesa beibnenggubsa. Nara momnya doboka beibsisaʾ ara, ugunja nuk wanaʾ uboka aran ganya ugun dam nang ek laga dosululaʾ aboka beibsisa.

¹³Wera anadya, nunja ganya anaba hek elegosulum. Onoʾ ugunja Titus bek ganya hek elegolumaʾ adya, nunjaʾ anaba nauba eiya dabsuk.

¹⁴Nadyaʾ anaba Titus bek Korintus nim era hyak pe ulumak aboka gigilesisinya nera, yoka danganaʾ orok adya, alya ubnenggubnyok. Nunja nidyaʾ ugunuk dib ok lelemouba sok, onoʾ nunja sikda anaso ulumak aboka Titus bek sibamaʾ adya ok neklemouba bok, ok ab dara, dib gigiwal.

¹⁵Dara, Titus bedya, alak e yeililumukanya, ugunda lok ganya boboka alja yuba pe keboka unulumaʾ anyek, alja anyek bekoka ugunuk hyak nauba wanaʾ ulusil.

¹⁶Ugunda yokaʾ-yokaʾ nidyaʾ ara, pe unulumnamakaʾ anyaʾ senelesinikanya, nara nauba eiya dablenel.