Read Nalca 2 KORINTUS 8 Bible Online

2 KORINTUS 8 - Nalca bible

2 KORINTUS 8

¹Hemyabo nim o, Imik Neyung adya Makedonia moka yuba dolomak nim ek wanaʾ uboka pe arawoka unulusukaʾ anyek, hnon ugunda ella danalum senelesab.

²Sikenek hyak yok-yok senenggom igina kwelesukaʾ anaba, sikda nauba ei-ei ganya boboka heknaʾ ganya uboka, sikda hyak bonaʾ garan ulumekjok, yok nim ek nauba arawanamab senen ganya bolomek.

³Sikda nim adya unu eleganelum anaʾ orok bok, sikja ganya doboka, sikenek ulumoknya nek sunuwoka eleganggumek bok, onoʾ nauba gokoka eleklemek.

⁴Sikja nuk, munaʾ Imik Neyung mabo Yudea sokok ulumak nim ek, numba hnon arawanamab aboka dukaʾ lolom-lolom aboka moloweisik.

⁵Nunja dara, anasoʾ ak eleganemak senewanggumoubnya nenyek unumek. Sikda Imik Neyung adya seinilamlaʾ sok, men dara, sik nong anyek Imik Neyung ak elegekjok, onoʾ nuk hnon sik nong elegeisik dara, yok aranaʾ era elegemek.

⁶Ban unumek anasa, ugun gangganek sam hnon, Imik Neyung adya pe arawoka unulusilaʾ adya, neik unaʾ unulumnulum aboka, Titus bedya nek einimoknya nenyek webdaknamla aboka orugomouba.

⁷Anasa wenyek dara, ugunda yokaʾ-yokaʾ pe unululumaʾ yak nim ululum. Yuba dib senenaʾ hnon, perob yuba sanaʾ hnon, perobaʾ ella danganaʾ ak hnon, ganya gouluwoka aranaʾ ak hnon, nuk sam wanaʾ ulusulumaʾ hnon, ban nidyaʾ pelelumaʾ anasa, an yok nim ek aranaʾ anaba hyak nauba perobnya nedya unulululum.

⁸Nera nadya oruksin yuba anaso lebnenggubna, alda yok nim edya or nim arawanamab senelemaknya nenyek nauba unulumakaʾ anasa, onoʾ nadya dara, ugunda hekaʾ huboka nimi yok nim ek wanaʾ ululumaʾ anyek sunuwosununaʾ aboka lebsin.

⁹Ugunda Yesus Kristus, nunjaʾ Wenelesilnya ululanya bedya wanaʾ uboka eleksinaʾ ara, seleb gobdo ella ululum. Kristus ara ugunsamba bonaʾ garannya danyaʾ adya, ugunuk bonaʾ dub nimi dolulumaʾ aboka, alda dubnya bok bonaʾ garannya dok.

¹⁰Nenyek youmaʾ gibnaʾ enyek, ugunda men arawanamab aboka seinibgogolumukanya, onoʾ arab einilum nim ek, ugunuk perobaʾ dosululaʾ aboka, anaso unuwolulumaʾ aboka lebnesin.

¹¹Wera wenyek, ugunda arawanamab senelumnya nenyek, nera unubdaknalum. Youmaʾ dara, nunda nenyek unuwoka arawanamab aboka nauba pe seinibgogolum sok, onoʾ wenyek ugunuk ulusilnya nek doboka pe arabdaknalum.

¹²Imik Neyung adya dara, unaʾ orok digumaʾ ak sununggulumla, alda seleb ululanya nok sunulamlaʾ anasa, ben hnon ara ganya doboka hyak arawonun senewoka eleklamlya dara, Imik Neyung ara perobaʾ leboka dolomla.

¹³Nera nadya dara, ugunuk ara igina nenewoka, yok nim ek ara, jakman nenewanesin senenggulumna. Bok ugumba sikba neik digum dolul, senelamna.

¹⁴Alda ugunda bonaʾ denaʾ pe deregoka ululum salek era, wera ugunja yok nimi garan ulumak nim ek, al ugunja or elek arawanalum. Onoʾ eimik era, ugumbabya garana buknelum sum era, sikbabya denaʾ bonaʾ ubnamla dara, wera ugunuk arawanasak. Wera unu araldalamnalumaʾ adya, neik so so danamla.

¹⁵Imik Neyung yuba bukuk ara, ”Nauba bololomoknya bera goʾ hnon bok lobnenggumookanya, mek bololomoknya bek dara, mek danggumok,” hyok.

¹⁶Nara ugunuk senelesin sok, Imik Neyung adya Titus benyek ganya gouluwoka ugunuk aran ganya elegokaʾ anasa, Imik Neyung ak giblenob!

¹⁷Wera Titus bera nunja anyek unuwanalam hyubnya nenyek kemok bok, alja ok orowek ugunuk arawanasin ganya nauba boboka, alja nara sikenek biniboka webnamna ganya boboka yalamla.

¹⁸Wera Titus be yanggalaʾ ak ara, Imik Neyung yuba donaʾ nimi nidyaʾ adya, alda perob lero yanggan yuba lero yabanaʾ ak ara pe welemla senelemaknya ben hnon, alab neikaʾ bokol yeilisab.

¹⁹Wera onoʾ hnonda, beneba yuba dolomak nim edya weboka, ugunda elegolum arasinaʾ neikaʾ bo binilum aboka sekiyiwek. Wera ugunja bololum bonaʾ nimi pik elekdo yibinemab dara, Imik Neyung si imik nenewoka, nunja ganya doboka araweisinob senelemabaʾ ara laga dolulaʾ aboka unuwanamab.

²⁰Nunja nimi yok nang ek, ugunja senenggomaʾ bololum bonaʾ elekdo yibinimab dara, yok nim edya meknelelum heisijek aboka, keeboka unuwanemab.

²¹Nunja hyak pe unuwanemabnya nera, Imik Neyung hogung ak ok gom, alda nim hogung ak anababya, meknenaʾ orokaʾ ak ubak senewanokaʾ aboka unuwanamab.

²²Titus beb yoknya beb yanggerijaʾ ak ara, onoʾ nunjaʾ hembe yoknya be hnon makoka neikaʾ bokol yasab. Nunda alak, li gong wa elegemouba dara, aldib yeng ganya boboka pe welemlaʾ eillilimab. Alja dara, ugunuk ara pelemakaʾ eillilisilaʾ adya, wenyek dara, nauba so yeng ganya bolosil.

²³Titus bek dara, nadyaʾ hembe yokaʾ nong uboka, ugun arasin wa neikaʾ welenamnya bek ulumla. Alda yok penya nang alab neikaʾ yalamak nang dara, anyagan Imik Neyung yuba donaʾ nim edya wa nen welemnelum aboka bokosak nang. Onoʾ sikda Kristus si imik nenelerak nang ulurak.

²⁴Nunja ugunsamba sikda anaso pe unulumak aboka gigilisabnya nera hnon, ugunja dib wanaʾ usinaʾ hnon, yok-yok Imik Neyung yuba donaʾ nimi gangganek anaba, ban winilya nang ak amalemnelum.