Read Nalca GALATIA 2 Bible Online

GALATIA 2 - Nalca bible

GALATIA 2

¹Wera onoʾ eimik gibnaʾ meijaʾ dubukaʾ badya seleb lebok danyek, nara Yerusalem heikek onoʾ bisaʾ ara, Barnabas be hnon neikaʾ bunuma. Anya, Titus be hnon neikaʾ byuba.

²Imik Neyung adya or Yerusalem heikek binilam aboka aawoka nekenyokaʾ anasa, bilimsa. Wera Yerusalem heikek ara, hnonda si sinaʾ nang eb neikaʾ longowouba dara, nadya Yahudi gom nim ek perob lero yanggan yuba lel eleklamsaʾ anyek, neksisa. Nera youmaʾ wesenya gom, eimik welemnenanya gom anyek, hnon nim era salyaʾ lelem welemla seneweneijek aboka, si sinaʾ nang ok gelelenga neksisa.

³Titus be nab neikaʾ bilinumnya bera, alda Yunani nang bokaʾ anyek, sikja Yahudi nanga bolaʾ garaldalamak sok, alba unuwoulul aboka dukaʾ lolom-lolom henggumek.

⁴Hnon nang edya dara, or unuwanamla aboka lelemek bok, unuwolul aboka yo henggumek. Wera an wenyalamek nang era, yuba dib doboka ununaʾ orokjok, nunjaʾ Kristus Yesus ak dib senemoubaʾ adya, gobdo ganya doboka unaʾ ak gelelenga kemero yeilimek. Sikja dara, nu yuba dobnenggoma wenyek unulumoubaʾ anyek, neik so unulunokaʾ aboka pik nekoka igina kweiyiwanobaʾ aboka yeilimek.

⁵Bok nunda dib leblum aboka, sikja yuba mekaʾ kenaʾ anaba kebnenggumouba. Wera an unumoubaʾ ara, perob lero yanggan yuba dib ulumlaʾ ara, ugunuk sobaʾ ulululaʾ aboka umouba.

⁶Si sinaʾ nang edya dara, nak ara anda anyek yokaʾ-yokaʾ mekaʾ hnon unuwanalam aboka lebnenggubnyek. (Imik Neyung ara nimi hogunga perobaʾ malyaʾ anyek kemenggulusilnya bek anasa, sikda perob nang gom, malya nang gom ara, weboka seininanya nera, nak dara, dib nong gom.)

⁷Petrus bek Yahudi nim ek perob lero yanggan yuba neklelulaʾ aboka, wa elegemok sok, onoʾ nak dara, Yahudi gom nim ek perob lero yanggan yuba len wa lobongganyokaʾ ak eiyimek.

⁸(Imik Neyung adya Petrus bek nimi bolaʾ garalamak nim ek, yuba len wa arawoka migib elegemoknya bedya, neik so nababya bolaʾ garanaʾ orok nim ek neik wa welelulaʾ aboka arawoka migib eleganyok.)

⁹Wera Imik Neyung adyaʾ wanaʾ uboka eleksinaʾ enera, nak eleganyokaʾ ak eibek dara, Yakobus beb, Petrus beb, Yohanes beb dadya dara, sikda yuba lenaʾ gak dub nang ulumekaʾ anasa, nab Barnabas beb soruka salawoka gibdanggogowouba dara, wera anara nunda neikaʾ kwebdangoka, ugunda Yahudi gom nim ek welemnerum bok, nuk dara, Yahudi nim ek welemnemab aboka ububa.

¹⁰Sikja dara, nimi bonaʾ denaʾ garan ulumak nim enyek, arawoka unulumnulum aboka, banyek ok moloweisik. Nadyaʾ anaba wa nera dib nong wa senewoka, hyak unuwanamna senemsa.

¹¹Petrus bera alda Antiokhia heikek sam yok dara, aldib meknewokaʾ anasa, nadya laga hogung ak dalagoka wabsa.

¹²Men dara, Petrus bera bolaʾ garanaʾ orok nang eb neikaʾ delemekjok, wera nimi nidyaʾ ara, bolaʾ garalemnesak senelemek nanga Yakobus beb neikaʾ yek dara, nang enyek lok anasa, Petrus bera neikaʾ delemeknya nera globoka, mokso bul byuk.

¹³Dara, yok Yahudi nim eneba Petrus bedya ulumok sok diligaʾ dolomekaʾ adya, dara onoʾ eimik era, Barnabas beneba benewoka sikja ununaʾ ak neik diligaʾ domok.

¹⁴Nara sikja unulumeknya nera, Imik Neyung adyaʾ perob lero yanggan yuba lelemlaʾ sunuwoka ununggulumekaʾ anyek eiyimsa dara, Petrus bek nimi hnoum ab, ”Anda Yahudi nang bok, anja unaʾ era Yahudi gom nim eneso uboka, Yahudi nim eneso unggululam bok dara, Yahudi gom nim ek ara, hekasa Yahudi nang unaʾ diliwoka ulululum aboka loloboka unululam do?” aboka lebsa.

¹⁵Nimi beilinaʾ adya dara, nunda aldib Yahudi nim ulumabaʾ ara, yok mok soko nimi malya unaʾ nim enesoʾ ak unggulumab.

¹⁶Anyek babya, nimi perobaʾ nenelamlaʾ ara, unuwanalum an yub unulumakaʾ adya gom, Yesus Kristus ak dib senewoka ganya oloknaʾ adya, perobaʾ nenewousululaʾ aboka dib senemouba. Nimi nidyaʾ ara unuwanalum an yub ununaʾ adya dara, perobaʾ nenenaʾ ara, okna dangalamla.

¹⁷Nunda Kristus pik uboka, perobaʾ nenesinaʾ elemabakanya, nera malya unaʾ nim ek bok anaso eildalamab dara, ban adya Kristus ara, malya unaʾ perob aboka liginanya gebnesibya de? Nenera hyak unuwanggunusibya!

¹⁸Nara onoʾ youmaʾ golob menegoka lomsa yub enyek, onsok sounuwoka meeb einiwanasinya dara, nara senenggom damok bleknanya neneldalamnesinya.

¹⁹Unuwanalum an yub edya, ban unuwanalum an yub ek ara, seleb somogamsa. Wenyek dara, nara Imik Neyung amba embengaʾ ulumna. Nara Kristus ab neikaʾ seleb gal ak oboka glabsik.

²⁰Dara, nadyaʾ youmaʾ ulusenya nek dara, anam embengaʾ unggulumna bok, Kristus anyek nadyaʾ nong lomok wen ulunel. Wera nadya wen embengaʾ ulumna nong enera, Imik Neyung bedya me nek dib senenaʾ adya embengaʾ ulumna. Alda nak wanaʾ uboka, al nonga nasamba somoganyoknya bek dib senewoka embengaʾ ulumna.

²¹Nim ara unuwanalum an yub edya Imik Neyung hogung ak perobaʾ nenenaʾ dobnesibya bok dara, Kristus ara malya unaʾ amba somogomokaʾ ara, salyaʾ lelem danamso. Anasa, nara Imik Neyung adya wanaʾ uboka eleksinaʾ ak, lek aboka longgulumna.