Read Nalca GALATIA 4 Bible Online

GALATIA 4 - Nalca bible

GALATIA 4

¹Bok nadya hnonok lelemnaʾ ara, nimi bonaʾ damnya benyek, anam mek me ulusobok dara, alja neyung bedya anda anaso uboka nebmen sum era, an bonaʾ anjaʾ ulumla nidyaʾ ara, anja meewoka ubnelam asobok dara, anam nenaʾ orok dara, alda bonaʾ oroknya oruknaʾ nang anaso ulumla.

²Me nera bonaʾ dam me bokaʾ anyek, alja neyung bedya hek gibnaʾ ek na damnya dobnenggen amnya salek anam dara, yok nang edya al nonga bo ulumnamak.

³Anasonya neikek numbabya, nunda anam neboka ganya kanaʾ orok salek era, sokok an ulumla ganya gong edya gouluwoka bo ulusuk.

⁴Bok Imik Neyung adya sumen senemokaʾ nong sum gigiwok dara, aljaʾ yando me nera sokok sam bokol yeilisuk. Wera me nera, unuwanalum an yuba mamok salek era, sokok an gel gedya boboka beibuk.

⁵Numbabya Imik Neyung bedya mabo yokaʾ danokaʾ aboka, me nera unuwanalum an yub ulumokaʾ gangganek ulumek nim ek dekoka blebsuk.

⁶Dara, ugunda alja mab ululumaʾ anasa leboka, Imik Neyung adya alja me nedya Geisinya bera, ugunja ganya ek bokol yeilisuk. Dara alda, ”Neyung o, nadyaʾ neyung o,” wenyalamla.

⁷Anasa, ugunda oruknaʾ wa nang ek anam unggululum bok, alda alja mabo yokaʾ ululum. Ugunda Imik Neyung bedya mab ululumaʾ anasa, Imik Neyung adya alja mab emba aboka beillilesil misaʾ nidyaʾ ara, ugun hnon dobnelum.

⁸Youmaʾ ugunda Imik Neyung ak elgom ululum salek era, Imik Neyung be dibaʾ ak gom, alda yokaʾ anyek nunjaʾ neyung nenewoka, ugun nong ara anyagan ganya diboka ululum.

⁹Bok wenyek dara, ugunda Imik Neyung ak seleb ella ululumukanya, dib nongaʾ ara, Imik Neyung adya ugunuk seleb ella ulusil bok anasa, dolbalek sonya uboka hmeng ganya dangoka, dil beillilumaʾ ara hekamba do? Hekasa ban dolbaleknya nek saawoka oruknaʾ nang danob senelelum do?

¹⁰Ugunda perob hen sum eb, walaʾ daknaʾ ab, perob gibnaʾ sum hnon, liga gong-gong masa menegoka yoululum.

¹¹Nadya ugunsamba nauba duboka welenanya nera, nidyaʾ salyaʾ lelem dalyek senewoka, loka dablenel.

¹²Nadyaʾ hemyabo nim o, nara ugun so dangalamsaʾ sok, ugumbabya nadya diligaʾ diliwolulum. Nara ugunuk ab dara, anyek malya unyek ara mekaʾ hnon elgom ulumna.

¹³Nara ugunuk an Imik Neyung yuba bo yeilisisa sum era, anyek unulamsa enyek nak neiknaʾ salanyokaʾ ara, ugunda seleb ella ululum.

¹⁴Nadya nong enyek anaso ubnyok bok dara, ugunuk ara hubnemabaʾ ak ubla anaʾ dok bok, ugunja dara, heng kemenaʾ malya danganaʾ danggubuk. Ugunja nak ara, Imik Neyung lero anasoʾ gom, Yesus Kristus diligaʾ anasoʾ doboka perobaʾ lebnulum.

¹⁵Ugunda an lebna sum era, hyak eiya dabnaʾ ganya bololum. Bok wenera an unu bolum ganya era hanyagar beib loblum do? Ban sum enera nadya kemen dara, or dara, ugunda nasamba leboka ugunja heng era, nak kweboka eleganamnaʾ yenenulum.

¹⁶Nadya dib yub ok lelesisaʾ adya, ugunuk hnon isaʾ nang neneweisisa de?

¹⁷Nimi malya nenelesak nim edya dara, sikja yuba pe keboka perob pikek pajaʾ seregoka, malya neneweisinobaʾ aboka, ugunja ganya benewoka gliboka sobaʾ yeiriwoka dulusak.

¹⁸Perobaʾ amba leboka, yok nimi yeiriwoka ganya glilimak dara, perob senen bok, nak ugun gangganek an ulumna salek enyek ok loboka, sobaʾ unulumnemak dara, perob.

¹⁹Nadya wanaʾ ulusin mab o! Ugunsamba leboka, nara hyak nauba duboka, me bomna gel gek me juga gweklamla sok, neik so unulunel. Kristus adya unun ganya ugunuk an dib yinaʾ mebnenggumnesil dara, sobaʾ ara anaso ok ulumnenel.

²⁰Nara ugun gangganek ab yok so salanunaʾ aboka, nara ugunub wen neikaʾ ulusibya senelamna. Nara ugunuk ara hekaʾ hubnamna do senewoka ganya elenel.

²¹Hemyabo nang o, ugun unuwanalum an yub ek ganya beiliwoka ulumnamab senelelum nang era, ban unuwanalum an yuba lelemlaʾ ara ugunda ella ululum gom, orok gom, wera neknenulum!

²²Anasa, momnya donaʾ ulumlaʾ ara, Abraham bera alda memabo penya beiyimok. Hnon me nera, aljaʾ wa wenaʾ gel gedya beiyimok, hnon me nera, aljaʾ yokaʾ gel gedya beiyimok, alamla.

²³Bok ek wa wenaʾ gel gedya me nera, nimi ganya adya beiyimok bok, hnon me nera, Imik Neyung adya eleganenggen amokaʾ gigiwoka beiyimok.

²⁴Wera wenyamokaʾ sununaʾ ara ban: ban penya gelewa danara, Imik Neyung adya penya unuwanasin aboka lemoknya nek sunuwoka ulumlaʾ ara, hnonda Sinai meinik mok ebnya nek, gel gera oruknaʾ amba wa wenaʾ mab ok beillilemnamla amok gel gera, Hagar ge ulumok.

²⁵Ban Hagar gera, Arab sokok ab Sinai meinik ak sunumok. Alda alja mab eb yok nang edya wa wenaʾ nang ulumnemekaʾ anasa, alda Yerusalem moka wen ulumla anasoʾ ak sununaʾ era an.

²⁶Bok imik heikek Yerusalem heik ara, albeyok sekok gel ulumlakanya, nunjaʾ genong ge dibaʾ an ulumla.

²⁷Wera anesemba momnya donaʾ hnon ulumlaʾ ara, ”Anda me beilinaʾ loboka, me you ululam gel gera, eiya hlalalom! Anda me juga gweknaʾ orok ululam gel gera, ei-ei ganya boboka merelelom! Nenya dolomla gel gera, mabo mek bok, nenya adya lobonggomok gel genyek, mabo nauba dangalamla anasa, eiya daboka glololom,” wenyaro momnya dobok.

²⁸Nadyaʾ hemyabo nim o, ugunuk dara, Imik Neyung adya eleganenggen aboka lemok me Ishak benesoʾ ak ululum.

²⁹Youmaʾ ulumek sok, nimi ganya seininaʾ adya beiyimek me nenedya, Geisinya migib adya beiyimok me nek lobaʾ nenewoka lomok. Dara weneba, neik so unulamla.

³⁰Bok Imik Neyung yuba momnya dobokaʾ adya dara, hekaʾ alamla do? ”Alja gel gedya yokaʾ me neb, ek wa gel gedya me neb dara, misaʾ bonaʾ neikaʾ dobnengguneserengaʾ anasa, aranaʾ gel geb alja me neb dara, gwab loblom,” hyok.

³¹Anasa nadyaʾ hemyabo nim o, nuk dara, aranaʾ gel gedya mab unggulumab bok, alda e yokaʾ gel gedya mab ulumab.