Read Nalca GALATIA 6 Bible Online

GALATIA 6 - Nalca bible

GALATIA 6

¹Hemyabo nang o! Ugun gangganek ara, ben hnon meknemlaʾ ak eibmun dara, ugun Imik Neyung berem ululum nang edya, pe ganya namenaʾ anyek, bera perob pik doro dibnelum. Unuwanalum bok, ugunuk hnon sikbabya malya ubnok senewoka sunuweisilyek anasa, ugumba diri uldalalulum.

²Ugun moumen yok nim edya igin ulumlaʾ anyek, arawoka bobdangoka unulululum. Dara, Kristus adya unuwanalum an yuba pe unululumaʾ beknaʾ dangalamlaʾ ara an.

³Anasa nimi ben hnon alda perob gomnya bokaʾ anyek, nara perobnya seneldalamla dara, al dam nang sondaʾ leldalamla.

⁴Nimi yok-yok ara, alja unulamla anyek pe kendulul. Dara, ban adya yok nang edya unulumeijinya nenesa pelemna seneboka gigildanaʾ loboka, alda aljaʾ yokaʾ pelelanya nenyek, or gigibdanamla.

⁵Anasa nimi yok-yok, sikjaʾ welemakaʾ igin ulusilaʾ ara, ellaʾ gigiro bolomnamak.

⁶Nim Imik Neyung yuba dololanya bedya, alja yokaʾ-yokaʾ perobaʾ ulumlaʾ nidyaʾ ara, alak yuba neklelanya bek bokoka hnon eleklelul.

⁷Nim ara yinaʾ memnaʾ sunuwoka nonga dolomak. Onoʾ, Imik Neyung lelemlaʾ ara sunuwoka gigilamla anasa, ugunda gigiwanggunumso senewoka, sonda leldanggom, mem.

⁸Heknedya ganya oka den yinaʾ doklamla dara, alda ganya oka den doka somoknaʾ ak daklamla bok, heknedya Geisinya bedya senelamlaʾ sunuwoka yinaʾ doklamla dara, alda Geisinya bek ab embengaʾ ulmoubnaʾ doka daklamla.

⁹Nunda hmenga danggusilyebok dara, alja suma dalya dara, doka daknamabaʾ anasa, perob unulumab salek era, nauba unulamna senewoka sulmalya ganya boboka bulugul longgom, mem.

¹⁰Anasa, pe unun salek ulumla dara, nunda yok nimi nidyaʾ ak pe unulumnemab bok, nauba so ara, neik yub ek dib senelemab nim ek pe unulumnemab.

¹¹Nadya soruk yokaʾ edya nauba momnya donaʾ edya ok ugunuk beiyisinaʾ anyek kendululum.

¹²Nimi nuk perob seneweisinokaʾ aboka hogunga bo elemak nang edya, bolaʾ garanaʾ yub ara, unuwanalumaʾ aboka goklesak. Sikda ban unulumaknya nera, Yahudi nang edya Kristus oboka gal ak glamek yub emba leboka lobaʾ neneweisijik aboka ulumak.

¹³Nimi bolaʾ garalasak nang eneba, Yahudi nim emba unuwanalum an yub ek momnya dobokaʾ ara, nidyaʾ pe sunuwoka ununggulumak. Bok sikja dara, ugunda sikja unulumakaʾ anyek gigiwalya dara, nunja yuba keboka unulumak senewoka nonggo henobaʾ aboka, ugunuk bolaʾ garawanok senelesak.

¹⁴Nak dara, yokaʾ-yokaʾ anyek pelemla aboka nonggo anaʾ ara, unuwanggunusinya bok, nunjaʾ Wenelesilnya Yesus Kristus gal dubuk somogosukaʾ amba danyek ok unuwanasinya. Wera Kristus anyek gal dubuk somogokaʾ adya danyek, sokok an ululanya nedya nak benewoka glinggulunelekanya, nara soko amba seleb somogamnaʾ anaso ulumna.

¹⁵Nimi bolaʾ garanaʾ gom, orok gom ara, hnon dib nong unggulumla. Alda nimi wenyek nong unaʾ dolomakaʾ ak, hnonok dib nong ulumla.

¹⁶Wera anaso ganya boboka ulumak nim eb, onoʾ nidyaʾ Imik Neyung alja Israeli nang dibaʾ ara, Kristus yuba dib dolomak nim enyek, Imik Neyung adya namen unaʾ ab, angoo yadyek senewoka arasinaʾ ab, ugunuk ulusulul senelamna.

¹⁷Nadya nong enera, nara Yesus adya yuba doboka diriga bannya diligaʾ laga ulunelaʾ anasa, onoʾ hnonda nimi hnon lobaʾ nenewoka ol nebnenaʾ ara mem!

¹⁸Wera nunjaʾ Wenelesilnya Yesus Kristus adya wanaʾ uboka eleksinaʾ anyek, ugunja ganya eb bo ulusulul senelamna. Aldib or unulusulul. Nara Paulus bedya gibsin e.