Read Nalca EPESUS 6 Bible Online

EPESUS 6 - Nalca bible

EPESUS 6

¹Wei, memab o! Dib nongnya perobnya nera, ugunda Wenelesilnya bedya unuwanok senelesilaʾ anyek, ugunjaʾ neyunga genong adya yuba pe keboka unulululum.

²Imik Neyung adya, ugunda unulumun dara, perob danasil aboka men orugoka, ”Anjaʾ neyunga genong ak lok ganya boboka giblelom,” wenyaboka,

³”Anyek unulumen dara, anda sokok anara senenya loboka pe ubwenewanalam,” hyokaʾ anasa, ugunda nauba nimi yuba pe keboka unulululum.

⁴Hemyab ugun neyung yabo dangoka ululum nang ek lebnesin! Ugunja mab era meknewoka unuwomunaʾ anyek, sikda soloma daboka yu ganya bo bijek anasa, sikja ganya malya nenenaʾ ara mem. Alda Wenelesilnya bedya lelemla yub edya hnon, yok perob ununaʾ yub edya hnon, wenewoka nellililulum.

⁵Hemyab ugun nim edya wa welelum nang ek lebnesin. Ugunjaʾ neyung yabo dangalamla nang edya yuba pe kelelulum. Ugunda yuba keboka wa webnemun dara, Kristus amba welemna senen ganya boboka, ganya hyak dib goluwoka, lok ganya boboka bleknyek senewoka pe welelulum.

⁶Nim adya heng eiyiwoka unu welemak aboka kemelesija salek ok perob seneweisinok senen ganya boboka wenggom, mem. Alda Imik Neyung adya senelamlaʾ ak unulumak nang geknewaʾ Kristus yuba domek nang ek adya, alsamba ganya gouluwoka welelulum.

⁷Ugunja welelum wa wel yabamun dara, nim amba ok wenggom, Imik Neyung ak arawoka welemnaʾ anaso uboka, perob ganya boboka pe welelulum.

⁸Yok nang edya wa oruknaʾ nang gom, sikbeyok ulumak nang gom, sikja nidyaʾ pe weboka ulumeijaʾ amba dara, Imik Neyung adya sunuwoka deknesilaʾ anyek beklelulum.

⁹Dub nang dangoka ululum nang ek lebnesin! Ugunda neik so, ugunja wa oruknaʾ nang edya ugunuk arawoka welesak sok, onoʾ sikenek anaba, pe sunuwoka unulusululum. Yu ganya boboka baralaʾ seingim-seingim anaʾ ara, mem. Ugunub ugunja wa oruknaʾ nang eb dara, hiboka senenggom dubnya, Imik Neyung bera imik heikek ulumlaʾ ara, alak ok hnonok beklemnelum. Imik Neyung ara, nimi hogung ak kemenggululanya bek ulumlaʾ anyek, ugunda pe beklemnelum.

¹⁰Anya wera, ugunda Wenelesilnya lomok uboka, migibaʾ ak ulululum. Alja senenggomaʾ unulamla migibaʾ ak ab doboka ulululum.

¹¹Iblis adya yokaʾ-yokaʾ ak bobgeregoka dulusilaʾ ak sam, ugunda pe mel-mela we seklelulumaʾ aboka, ugunda Imik Neyung adya yina mala senga nidyaʾ boboka eneklelulum.

¹²Nunda nimi sirikaʾ ab mala weboka oldanggulumab bok, alda imik garan denaʾ ak sam wenewoka bo usinaʾ ab, senenggom unaʾ ab, wen gunaʾ ulumla sokok an bisaʾ dub unaʾ ab, gobdo malya ulumak yu bisaʾ unaʾ ab, oldalamab.

¹³Anasa, malya unaʾ lanawanamla salek enyek, ugunda pe ganya migibaʾ anyek saawoka oldalamunukanya, yokaʾ-yokaʾ nidyaʾ unubgogowoumun dara, bisaʾ ab obdangdibigemunaʾ ara, ugunda senenggom obsimenggom nanga dangoka sekmoublulumaʾ aboka, Imik Neyung eleklesil yina mala senga nidyaʾ boboka eneklelulum.

¹⁴Wera anasa, ugunda hyak pe diri uboka welsinilelulum. Ugunda perobaʾ nenesinaʾ anyek goukwa noronaʾ dibaʾ norowoka, jong ununaʾ anyek girik seng anasoʾ anyek enegoka, we seklelulum.

¹⁵Imik Neyung adyaʾ perob lero yanggan yuba, ganya heklamlaʾ anyek, lero yabalemnamna senenaʾ anyek, ugunja ganya ak yan ongonaʾ dibaʾ ongowoka ulululum.

¹⁶Onoʾ hnon, Imik Neyung ak dib senen ganya enyek, bisaʾ mala leilinaʾ dibaʾ bololulum. Wera an dib senenaʾ enedya, bisaʾ adya uk sirikaʾ mala naklesilaʾ nidyaʾ ara, saranggeldilimnelum.

¹⁷Ugunda nimi blebsinaʾ damok anyek, girik huk goulunaʾ dibaʾ goulumunukanya, Imik Neyung yub ak dara, Imik Neyung Geisinya bedya yina mala dibaʾ doboka bolomnelum.

¹⁸Dara, Imik Neyung Geisinya adya, ugun nonga bo ulusilaʾ adya, nidyaʾ salek enyek, yokaʾ-yokaʾ amba mololelulum. Dara, sobaʾ websiniwoka, munaʾ Imik Neyung mabo nidyaʾ amba bulugul lonaʾ loboka, mololsinilelulum.

¹⁹Nara Imik Neyung yuba lel yabanya dara, Imik Neyung adya ban yub enyek sablom aboka neknululaʾ aboka, nasamba hnon mololenululum. Wera anadya nara Imik Neyung adyaʾ perob lero yanggan yub era, yok nim ek asaʾ ganya boboka doknomok yub era pe leb eleganamnya yuba gak enyek neksununaʾ aboka hnon mololenululum.

²⁰Wera Imik Neyung adya perob lero yanggan yub enesa lelelulaʾ aboka, bokol yanyokaʾ anasa welemna dara, alsamba yuba sanaʾanya dasa, wera anasa gasa ek henga gouboka beibnyek. Anasa, asaʾ ganya boboka, onoʾ pe lelenunaʾ aboka, ugunda nasamba mololenululum.

²¹ Imik Neyung wa bojam welelanya nunjaʾ hembe Tikhikus bedya, nadya ulumnakanya welemna wa nera, ugunda ella dolulumaʾ aboka, anaso aboka neknesil.

²²Anasa, nadya unulamnaʾ ara neksululaʾ aboka hnon, ugunja ganya daklinggoka pewosululaʾ aboka hnon, Tikhikus bera ugunuk an bilom aboka orugamna.

²³Nunja neyung Imik Neyung bedya hnon, Wenelesilnya Yesus Kristus bedya, nimi nidyaʾ yuba dololum nim ek, ganya heknaʾ hnon, dib senen ganya boboka, wanaʾ unaʾ hnon eleklesulul.

²⁴Nunjaʾ Wenelesilnya Yesus Kristus ak orok dengaboka sarangganggunumla wanaʾ unaʾ edya, wanaʾ ululum nang ek wanaʾ uboka eleksinaʾ adya bo ulusulul. Nara Paulus bedya gibsin, perob.