Read Nalca PILIPI 1 Bible Online

PILIPI 1 - Nalca bible

PILIPI 1

¹Na kabo nim ugunda nidyaʾ Pilipi heikek ululum munaʾ Imik Neyung mab ek hnon, onoʾ Imik Neyung wa arawoka nimi bo usin nanga hnon, hnonda arawoka wa wen nang ek hnon, momnya doboka beibsin! Nara Paulus beb, Timotius beb, Yesus Kristus amba welenam nang edya dara, Imik Neyung nunjaʾ neyung bedya hnon, Wenelesilnya Yesus Kristus adya wanaʾ uboka eleksinaʾ ab, nimi nonga pe unaʾ ab, eleklesulul senelenam!

³Nara ugunuk seiniweisin dara, Imik Neyung ak sobaʾ perob aboka giblamna.

⁴Nara ugun nidyaʾ amba leboka, sob-sobaʾ Imik Neyung ak molol yabasin dara, nara hyak eiya adya, perob ganya boboka mololesin.

⁵Nara Imik Neyung ak perob aboka giblamnaʾ damok nong ara, ugun nong anyek anam sum ekaʾ ara moruwoka sumen eneba, ugunda nak arawoka Imik Neyung adya perob lero yanggan yuba wa era neikaʾ welemabaʾ anasa, hyak eiya ganya boboka mololesin.

⁶Wera Imik Neyung adya albeyok ganya doboka, aljaʾ perob wa nong enera ugun gangganek an web einimokaʾ ara, onoʾ welmorulamlyaʾ ara, Yesus Kristus yanamla sum ek loboka webdaknamlaʾ anyaʾ senewoka, an nong ak hnonok dib senelamna.

⁷Ugun nong anyek, nong unaʾ ak dara, mok-mok ulumab bok, ganya ak dara, na dam an sobaʾ neikaʾ ulumab senen ulumlaʾ anasa, wera ban nadya ganya enera wanoksodya unu seiniwanasisinyaʾ anaba gigiwoka ubnesinya. Anya hnonda Imik Neyung adya aljaʾ wanaʾ uboka eleksinaʾ era wen an nara gasa ek sam ulumna wenesa gom, loboka Imik Neyung adyaʾ perob lero yanggan yuba wa webnesinya danasa gom, alja wanaʾ uboka eleksinaʾ era ugun hnon, na hnon, neikaʾ doro beillilemabaʾ anasa, perob senewanasinya.

⁸Nara Yesus Kristus lomok uboka, wanaʾ uboka, ugunuk hyak eibsisinya senewoka ulusinya nera, Imik Neyung anaba alda ella ulunel.

⁹Wera nadya ugunsamba mololosinaʾ ara ban: Ugunda perobnya nek ella danganaʾ ab geremseng unaʾ ab dara, nauba danggiga balasilyekanya, Imik Neyung ak hnon, nim ak hnon, nauba wanaʾ ubgiga balalulumaʾ aboka, mololesin.

¹⁰Wera ban adya ugunda perobnya nenyek ella uboka welemunaʾ adya, Kristus yanamla sum era, ugunja nong unaʾ era, gegena ponaʾ loboka malya ulumak nim aboka yana kibsilyek anasa, mololesin.

¹¹Dara, ugunja nong unaʾ enyek, perob unaʾ adya ok, Yesus Kristus adya pe deknelesilya dara, wera Imik Neyung si ak imik nenewoka, alak sobaʾ giblemnemak.

¹²Hemyab o, nadya dara, nak yokaʾ-yokaʾ ununyokaʾ anadya nimi nauba Imik Neyung adyaʾ perob lero yanggan yub ek keboka dib senelamakaʾ anyek, ugunda ella danasom senelamna.

¹³Damok ara anadya wera, dub nang ek an pika wen nang eb, nimi yok nimi nidyaʾ ab dara, nak henga geregoka beibnyekaʾ ara, Kristus amba aldib urob senewoka ella ulumak.

¹⁴Nak henga gouboka beibnyekaʾ adya, wera yok Imik Neyung mab era, asaʾ ganya bob sounuwoka, lok ganya orokaʾ anyek, Imik Neyung adya yub era lero yabalamak.

¹⁵Wera ban Kristus yuba lero yabalamak nang era, hnon nang era hman ganya boboka lolobdanob senen lero yabalamakaʾ ara aldib bok, hnon nang era Imik Neyung ak ganya gouluwoka perob ganya boboka lero yabalamak.

¹⁶Ban eimik lebman nang era, nak alja perob lero yanggan yub enyek ligilamlaʾ bar aboka, ella ulunyaakanya, wanaʾ ulunyaknya nenesa yuba dib lero yabalamak.

¹⁷Bok men lebman yok nang ek dara, Kristus yuba lero yabalamakaʾ ara, dib gomnya nenesa nunokok pewosulul senewoka lero yabalamak. Ban unulumakaʾ nong adya, wera na an henga geregoka beibnyekaʾ anyek ulunanya bek an nauba igina kweiyiwanamab senewoka unulumak.

¹⁸Bok anaba or maly! Wera dib damok emba gom, sondaʾ amba bobnenewoka Imik Neyung yuba lero yabalamakaʾ anaba, Kristus si ak lero yabalamakaʾ anasa, nara eiya dablenel. Anya eimik eneba sobaʾ eiya dablemnenel.

¹⁹Ugunja nasamba heng uboka mololenulumaʾ ab, Yesus Kristus Geisinya adya aralenelaʾ ab dadya, henga gouboka beibnyekaʾ anaba lobnenyakaʾ ella ulumnaʾ anasa, eiya dablemnenel.

²⁰Nadya dara, nadya nong ok meknewanya danyek alya ubnelyek senewoka nauba seinilamna. Nadya seinilenanya nera, al wene salek eneba, nadya nonga ganya gekman asaʾ ganya boboka, nara embengaʾ ulumnyaʾ gom, somogamnyaʾ gom ara, Kristus si anyek imik dolul senelamna.

²¹Anasa nak dara, embengaʾ ulumnaʾ ak dara, Kristus amba ok ganya dib beiliwoka ulumna. Anya somoganamna dara, wera onoʾ hyak pewanasinya, senelamna.

²²Bok nara sokok anam ulumnaʾ adya, nadyaʾ perob wa nera onoʾ welemnamna, dara anadya nara har nerek nenyek aboka dobnesinyaʾ ara elgom ulumna.

²³Nara penya nang edya giliwoka gangganaʾ goklenerek. Anasa hyak perob nongnya nera, sokok anara loboka, imik heikek biniboka Kristus ab neikaʾ ulusinim senelamna.

²⁴Bok ugunuk sam anyek, perob dosululaʾ aboka, nara sokok an or ulumnesinya dara, nauba perob danamso.

²⁵Nara ban nenyek perobaʾ ara ella ulumnaʾ anasa, ugun nong anyek Wenelesilnya bek dib senenaʾ anyek eiya ganya boboka migiba danggiga balalulumaʾ aboka, ugunuk arasin danasa, nara ugunub neikaʾ ulumnemab senewoka ella ulumna.

²⁶Ban nenesa leboka, ugunuk yanya dara, nasamba leboka Yesus Kristus bek bekoka hyak nauba eiya dablemnesil.

²⁷Yo, anasa wenyek dib nong ara, ugunda Kristus amba lebokaʾ perobaʾ Imik Neyung adyaʾ perob lero yanggan yub enyek, sunuwoka ugunda pe ulumnelum. Ban unu ulumunaʾ adya, yub ok kebnamnaʾ anaba, Imik Neyung adyaʾ perob lero yanggan yub ek ganya dib senewoka un danasa duboka hnonok nonga dangoka ulunobaʾ aboka, yeirilemak anaʾ hnonok ella ubnamna.

²⁸Ugunja isaʾ nang ek lok ganya bonaʾ loboka, sobaʾ asaʾ ganya ok bolomnelumaʾ anyek hnon, ella ubnamna. Ban unulumunaʾ adya, wera sikenek orok nenewanasil beknaʾ laga danasilikanya, ugunuk dara, Imik Neyung adya blebnesil beknaʾ laga danasil.

²⁹Anasa Imik Neyung adya ugunuk perob eleknaʾ elegosukaʾ ara, Kristus ak dib senelenokaʾ aboka ok eleganggubsuk, alda onoʾ Kristus amba igina kweboka gweklenokaʾ aboka hnon, elegosuk.

³⁰Anasa, ugunda wenera nab neikaʾ perobnya nenyek dobnobaʾ aboka dulumab, nera nadya youmaʾ dulumsaʾ seleb eiyilumnya hnon, anya onoʾ weneba sobaʾ or dulumnaʾ anyek, wen seleb kelelumnya nenyek lebna.