Read Nalca KOLOSE 1 Bible Online

KOLOSE 1 - Nalca bible

KOLOSE 1

¹Imik Neyung adya seinimokaʾ sunuwoka, Yesus Kristus bedya yuba lenaʾ gaknya Paulus bek ab hnon, nunja hembe Timotius bek ab hnon,

²ugunda Kolose sam Imik Neyung amba geisa uboka, Kristus ak dib senelelum hemyabo nim emba beibsab. Nunja neyung Imik Neyung ak ab wanaʾ uboka eleksinaʾ ab, namen ganya unaʾ ab danyek, ugunjaʾ dangalalul.

³Nunda Imik Neyung ak nunja Wenelesilnya Yesus Kristus alja neyung ak, liga sob-sobaʾ ugunsamba mololosabakanya, alak perob aboka giblemab.

⁴Ugunja Kristus Yesus ak dib senelelumaʾ ab, munaʾ Imik Neyung mabo nidyaʾ ak wanaʾ ulumak an yub enyek, seleb kemoubaʾ anasa, unulumab.

⁵Ban dib senenaʾ hnon wanaʾ unaʾ hnon ara, imik heikek ugunsamba beillilisilaʾ ak ganya welelumaʾ ak ab lanalamla. Ban ganya wenaʾ ara, ugunda men dib nong yuba kelum adya ella dangalum. Ban perob lero yanggan yub ara,

⁶ugunuk an seleb yousuk sok, mok soko nidyaʾ oboka lelewoka doka moru balamla. Dara neikek, ugun gangganek anaba, an yub enyek einilumukanya, Imik Neyung adya wanaʾ uboka perob eleksinaʾ anyek pe ella dangalum salek ek ab ara mouruwoka, doka moru balasil.

⁷Anasa, ban nidyaʾ ara, nunja neikaʾ welemabakanya, wanaʾ ulumabnya Epafras bek ab ella dangalum. Benera ugunja dara, Kristus wa wenya hyak bojamnya bek ulumla.

⁸Dara al adya ugunja Geisinya lomok uboka wanaʾ ululumaʾ ara, nuk neksuk.

⁹Anasa, an unu ulumak an yub kebub salek eb moruwoka, nunda ugunsamba sobaʾ heng uboka mololdibilloklesab. Ugunda Imik Neyung adya senelamla ganya anyek pe munaʾ gobdo ella ublulumaʾ aboka, yok-yok Imik Neyung ak ab geremseng un ganya ab, yuba domna adya ella un ganya ab, boblulum aboka nunda mololosab.

¹⁰Dara, alja senelamla anyek pe ella ubmun adya, ugunja ululumaʾ ara, al saramek ab dom digum ulumla adya or unu ulunok senewanemlakanya, yokaʾ-yokaʾ unululumaʾ nidyaʾ ara perob senewanamla. Nunda heng uboka mololosab ara, ugunda yok-yok perob wa weboka doka moulumnelumukanya, Imik Neyung ak ella danganaʾ nauba danggiga balalul aboka mololosab.

¹¹Ugunuk yokaʾ-yokaʾ lanawanesilaʾ ara, ganya eiya daboka, or malye senewoka, migibaʾ bal morulululum aboka, alja perobaʾ senenggom migib edya ugunuk migib gebsulul.

¹²Hnonda ban adya neyung bek, dilinaʾ pik balamak munaʾ Imik Neyung mab amba beibuknya nek dobneseng senen nang nenelesilnya benyek, ganya eiya daboka perob aboka giblemnelum.

¹³Anya, alja nunda gunaʾ migib ak ab seleb lobsuukanya, nunda alja wanaʾ ulumla me nedya heikek doro dibsuk.

¹⁴Dara nunda al Kristus adya nunja blebsinaʾ damok dekoka dobsuk ara, wera nunja malya unaʾ memelesilaʾ ara an.

¹⁵Alda Kristus ara, Imik Neyung laga eilinggulumaknya bedya sununaʾ ulumla. Anya yokaʾ-yokaʾ uyiwok ak ab dara, alda hyak nonoknaʾ nongnya ulumla.

¹⁶Yokaʾ-yokaʾ imik heik ulumlaʾ ab, sokok an ulumlaʾ ab dara, al pik ab uyiwok. Wera laka ulumlaʾ laka unggulumlaʾ, dubnya unaʾ, wenewoka oruksinaʾ, wenewoka bo usinaʾ, senenggom dub unaʾ, ban nidyaʾ ara, al pik ab uyiwok. Anasa, yokaʾ-yokaʾ nidyaʾ ara, al pik ab uyiwookanya alsamba, nera alsamba uyiwok.

¹⁷Anya yokaʾ-yokaʾ nidyaʾ anam bok, alda hyak men ulumok. Dara, yokaʾ-yokaʾ nidyaʾ ara al adya bo ulmorulamla.

¹⁸Alda nong ak dara, yuba donaʾ nimi hiboka amba, al Kristus ara, huka, dubnya, ulumla. Alda men yokaʾ nong, anya somoknaʾ ak ab men nonga subuknya ulumla. Anasa, yokaʾ-yokaʾ ab dara, alak danyek, hyak nonokdob.

¹⁹Wera anasa, Imik Neyung ulumlaʾ nidyaʾ ara, neyung adya ganya doboka alaʾ me ak yeindeboka al lomok munaʾ gobdo ulumla.

²⁰Anya Imik Neyung adya, alda yokaʾ-yokaʾ ab, al nong ab, neikaʾ hibnunaʾ aboka dara, or sokok an ulumlaʾ gom, imik heik ulumlaʾ gom, alda yokaʾ-yokaʾ neikaʾ ara hiyiwousununaʾ aboka, Kristus obek gal eneng pik seleb neikek hiyiwousuk.

²¹Youmaʾ dara, ugun nong ara, Imik Neyung ak ab mok gebdangoka ululum; ugunja ganya seininaʾ adya alak isaʾ nang gebelumaʾ ara, lagaʾ dok ara, ugunja yu hwam unaʾ adya beknaʾ laga ella ulumok.

²²Bok wera Imik Neyung ara, Kristus adyaʾ nimi nong lomok somogok adya, ugunuk al saramek geisa uboka, gegena ponaʾ orokaʾ ak beibsulul aboka neikaʾ hiyiwousuk.

²³Ugunda ugunja ganya dib senelumaʾ lomok sobaʾ ubmouboka, wirring-warreng anaʾ loboka, mel-mela sekoka, anya perob lero yanggan yuba kelum adya ganya wenaʾ ak ab goknenggunusak dara, al saramek anaso beibnesil. Ban blebsin yub ulumlaʾ ara, im damumduk yangawokaʾ nidyaʾ ak seleb wenyaro yabalamak. Anya, na ban Paulus bera, an yuba wa wenya seleb dasa.

²⁴Anasa, nara wera ugunsamba leboka, igina dolomna dara, eiya dablenel. Wera, Kristus nong amba, alja yuba donaʾ nim emba leboka, alja nong enyek, igin kweboka buluk loboknya nera, nak an gigilamla.

²⁵Nara ban yuba donaʾ nimi wa wenya seleb dasaʾ ara, Imik Neyung adya nak wa nenyek alja yub amba hyak munaʾ gobdo ugunuk wero balalul senemok adya an yuba lenya dasa.

²⁶Nara yuba lenya dasa ara, ban youmaʾ gibnaʾ gong ek ab ara mouruwoka, me mengewoka nang en lika nang en lika ubgiga yek ab mouruwoka gunuwoka doknomokaʾ anyek, lebnun aboka dangamsa. Bok wenera Imik Neyung adya alja munaʾ Imik Neyung mab ek ban doknomok ara, laga amalesil.

²⁷Dara, Imik Neyung ara, yok-yok mok soko nimi nidyaʾ ak, alja mab ak ban gunuwoka doknomokaʾ ara, har so dub uboka, senenggomaʾ ulumlaʾ anyek amalesil. Dara, gunuwoka doknonaʾ ara ban: Kristus ara ugun lomok ulusil. Ban Kristus ugun lomok ulusil ara, perobaʾ senenggomaʾ ak ganya wenaʾ dibaʾ ara an.

²⁸Dara, ban benyek, nunda nim ek neklesab. Nidyaʾ yok-yok geremseng adya wenewoka, neklesab ara, nimi yok-yok Kristus lomok unaʾ anyek munaʾ kabnok aboka unulumab.

²⁹Wera anasa, nara ban nenyek unuwoulul aboka, nadya migib nidyaʾ yeiriwoka, onoʾ alja migib na lomok welenel anyek sunuwoka, an unuwaso senewoka welemna.