Read Nalca KOLOSE 3 Bible Online

KOLOSE 3 - Nalca bible

KOLOSE 3

¹Dara, ugunda Kristus ab ganya neikaʾ subuka bukiyiwosuk anasa, Kristus ara, Imik Neyung alja sirik soruk imik bulumla ak, imik sam ululanya nenyek elelulum.

²Ugunda seleb somogolumukanya, ugunja ululumaʾ ara, Kristus lomok beiyiwoka, Imik Neyung ak ulumla anasa, sokoknya nenyek gom, alda imiknya nenyek seinililulum.

⁴Dara, nunja embengaʾ ulumabaʾ Kristus ara, eimik laga nenebdalya dara, ugumbabya alablaboka alja senenggomaʾ unaʾ ak sam neikaʾ laga nenewanesil.

⁵Anasa, sokok an ulumakaʾ yokaʾ-yokaʾ, gela meknewoka salanaʾ, sembejaʾ neneldanaʾ, salyeʾ unulunun ganya hwam ab, malinya nenyek unulunun ganya, nak nauba dangalanulul ganya ara, salyaʾ ak gibnaʾ ganya era, ban nidyaʾ ugun lomok ab ugun dam nang adya somogiyiwanalum.

⁶Ban nidyaʾ ara, Imik Neyung adya yu ganya damok lanalamla.

⁷Dara, youmaʾ era, ugumbabya ban nenera unuru balalum.

⁸Anasa dara, yu ganya, yu sen-sen anaʾ, yok nang ek malya unaʾ, deresinaʾ, sembejaʾ yub ugunja sibamaʾ ak ab lanelelanya, ban nidyaʾ ara, wenyek boboganalum.

⁹ Ugunda youmaʾ ululum ganya nong ek dara, seleb gwirib loblum anasa, anya wenyok ganya nong unaʾ era, alja uyimoknya bedya ganya gigiwoka ella ubnok aboka, sob-sobaʾ wenyeknya gebgiga balasil anyek, seleb ongowolum anasa, ugunda sondaʾ leldanaʾ ara mem.

¹¹Ban nenyek dara, Yunani Yahudi nang gom, bolaʾ garaweknya oroknya gom, yu hwam nang Skit nang gom, wa wenya oruknanya gom, ban wenyaboka si singgulumak bok, Kristus ara ban nidyaʾ amba damok ulusilekanya, alda sik nidyaʾ lomok ulusil.

¹²Wera anasa, Imik Neyung adya alja angoo yadyek ulusuukanya, geisa nenewoka weboka dobsuk nim geknebaʾ uboka, yadyek senen ganya, angoo senewoka men aran ganya, ganya sokok neneldan ganya, nonga namenaʾ un ganya, sobaʾanya senewoka or malye senen ganya, ugunda ban ganya danyek bololulum.

¹³Dara neikek, hnonda nimi be hnon yok nim ek alba dirigonun senewanamla dara, or meewanasil dara, malya ubdangamunya nera, meebdanalum. Imik Neyung adya ugunuk malya unaʾ meewousuk sok, ugumbabya neiksonya nenyek unulululum.

¹⁴Anya ban nidyaʾ amba dib nongnya nera, wanaʾ uldanaʾ anyek, neikaʾ hiboka munaʾ pe goublesilaʾ anyek, ganya enyek sobaʾ bololulum.

¹⁵Ugunda hnonok nong unaʾ ulunok aboka, seleb youbosuk anasa, Kristus adyaʾ namen uboka neikaʾ hiboka un ganya anyek, ugunja ganya lomok sobaʾ orugoka bo ulusulul. Anya sobaʾ perob aboka giblelulum.

¹⁶Wera Kristus adya yub enyek, ugunuk sobaʾ sounubgiga balasulul. Dara, yokaʾ-yokaʾ munaʾ gobdo geremsengaʾ adya, ugunda yok nang ek nekoka, wenebdangoka ulululum. Anya, mazmur ber adya hnon, yok giboka sebnaʾ ber edya hnon, yub donaʾ ak geklen ber edya hnon, ugunda Imik Neyung ak perob aboka bera danedya seboka giblelulum.

¹⁷Dara, ugunja yokaʾ-yokaʾ nidyaʾ, yuba sanaʾ adya gom, soruk adya wenaʾ gom, unuwanalum dara, ban nidyaʾ ara, nunja neyung Imik Neyung ak, al pik uboka perob aboka giboka, nunja Wenelesilnya Yesus bedya si sibuka unulululum.

¹⁸Wei, gelewa o, ugunda Imik Neyung adya perob senelamla sunuwoka, ugunjaʾ nenyab ak, alja bo ulunel senewoka ganya sokok neneldalulum.

¹⁹Wei, nenyab o, ugunjaʾ gelewa ak hyak wanaʾ uboka, sikenek gasa sonya nera ununggom, mem.

²⁰Wei, memab o, ban nenyek dara, Imik Neyung ara perob senelamla anasa, ugunja nauba nim edya yok-yok yuba nidyaʾ ara, pe keboka unulululum.

²¹Wei, neyung yab o, sikja ganya angoo senewoka soloma dabijek anasa, ugunaʾ memab ak ganya yu nenenggom, mem.

²²Wei, wa arawoka wenaʾ nang o, ugunja sokok an neyung yab edya yok-yok yuba nidyaʾ pe keboka unulululum. Sik hogung ak ganya pel dilinun senewoka nenyek ok ununggom, alda Imik Neyung ak lok ganya boboka, ganya goulubmouboka pe unulululum.

²³Anasa ugunja hekaʾ ok unuwanalum dara, nim amba gomaʾ, alda Imik Neyung amba senewoka ganya gouluwoka welelulum.

²⁴Ugunda Wenelesilnya Kristus amba wa welelum anasa, ugunda na an welemna wa nemba dara, Imik Neyung bedya beibnyokaʾ ak deknaʾ dobnamna senewoka ella ulululum.

²⁵Anasa, Imik Neyung ara alda nimi hogung ak kemewoka perob senenggulululanya anasa, meknelelanya bera, ban meknelemlaʾ damok sunuwoka dobnamla.