Read Nalca 1 TESALONIKA 2 Bible Online

1 TESALONIKA 2 - Nalca bible

1 TESALONIKA 2

¹Na kabo nim o! Ugunuk seʾ yeilimoubaʾ ara, salyaʾ lelem danggumokaʾ ara, ugunda ella ululum.

²Nunda anam Tesalonika heikek yanggumouba salek era, men dara Pilipi heikek ulumouba salek enyek, nim ara nuk derelesik, olosikaʾ ara, ugunda ella ululum. Nimi nauba nuk ara lek aboka lelesik bok, Imik Neyung adyaʾ asaʾ ganya elegosukaʾ adya, ugunuk perob lero yanggan yuba lelesuba.

³Dara, nunja ugunuk unuwanalum alamabaʾ ara sondaʾ amba leboka, ugunja ganya bob leregeisinobaʾ aboka lenggulusab.

⁴Orok. Imik Neyung adya dara, nuk anyek perob lero yanggan yuba lebnokaʾ aboka lobonggosukaʾ anasa, banyek bekoka lelemab. Lelemabaʾ ara, nimi ganya perob senewanokaʾ aboka lenggulumab, alda Imik Neyung nunjaʾ ganya ak anaba sunulusilnya benyek perob senewolulaʾ aboka lelemab.

⁵Nunda ugunuk ara perob-perobaʾ yub edya meka lelewoka lebnenggusuba, orokaʾ anaba malya ubsinob senewoka hnon, ugunuk bob leregiyiweisinob senewoka Imik Neyung yuba leb eleganggubsuba. Imik Neyung ara ella ulumla!

⁶Dara onoʾ nunda nim adya gigilesinokaʾ aboka hogunga bo enggulumouba. Nera ugunja hnon, yok nim edya hnon unuweisinok senewanggumouba.

⁷Nunda aldib Kristus adya yuba lenaʾ gak nang ulumabaʾ anasa, aldib ugunuk an yokaʾ-yokaʾ elegosululum aboka molowanasisibya. Bok, nimi gela hnon alja mab ek bojam uboka pe bo ulumla sok, nunda ugun gangganek an ulumouba dara, perob ganya boboka namenaʾ anyek unulusuba.

⁸Nunda ugunuk hyak wanaʾ ulusubnya nenesa leboka, Imik Neyung adya perob lero yanggan yub ok leb eleganggusuba, alda nunja nong unaʾ enyek babya elegesuba. Ban nenera nunja ugunuk wanaʾ nauba ulusubnya nenesa usuba.

⁹Nunja ugun gangganek an nauba yeiriwoka duboka welemoubaʾ ara, ugunda seleb beklelumaʾ anyaʾ. Nunda Imik Neyung adyaʾ perob lero yanggan yuba ugunuk lero yeilisuba sum era, ugun nang enyek malya nenewoka obnebsibyek senewoka, inimnek yubyek pik nunja yeiriwoka welemouba.

¹⁰Ugun Kristus ak dib senelum nimi gangganek ara, nunda geisaʾ uboka, hyak pe unuwoka, si gegena ponaʾ loboka, ulumouba. Nunja unu ulumoubnya nera, ugumba seleb eillilisulum, hnonda Imik Neyung anaba ella ulusil.

¹¹Nunja ugunuk unulusubaʾ ara, nimi ben hnon alja mab ek pe unulamla sok, nimi yok-yok sunuwoka pe unulusubaʾ ara, ugunda seleb ella ululum.

¹²Nunja ugunuk pe unuwolulumaʾ aboka wenewoka, ugunda Imik Neyung ak anyek pe ganya hekel eleklelulumaʾ aboka, dukaʾ lolom-lolom alasub dara, hnonda wenewoka unuwanalum alamouba. Anasa ban leboka Imik Neyung ara alja perob heikek wekoka, alja unulamla ununaʾ era, ugumba unuwolulumaʾ aboka youbsuk.

¹³Ugunja hnonok pe unululumaʾ anyek nunda eiyiwoka Imik Neyung ak sobaʾ giblemab. An wenyhenaʾ ara, nunja ugunuk Imik Neyung yuba leb elegesuba sum enyek, ugunja keboka dolumaʾ ara, nimi sirikaʾ yub anaso ganya boboka dobnenggulum, alda Imik Neyung nong adya yub dib senewoka dolumaʾ nong amba Imik Neyung giblemab. Wera ugun Kristus dolum nimi gangganek an wen welesilnya nera ban Imik Neyung yub enedya welesil.

¹⁴Nadyaʾ hemyabo nim o, ugunuk an igina kweboka malya nenelesilaʾ ara, Yudea sam Imik Neyung yuba doboka, Yesus Kristus mabo dangamek nim eneba unulusil. Ugunuk an igina kwellilisakaʾ ara, ugunjaʾ meneng mok nang edya ulusak, dara Yudea sam yuba dolomak nim igina kwellilisakaʾ anaba sikja mok nimi Yahudi nang edya ulusak.

¹⁵Wera ban Yahudi nim era, sikja Imik Neyung adyaʾ ununumnaʾ lelemek nang nauba olomekaʾ ara, onoʾ Wenelesilnya Yesus anaba obekaʾ ara, wera nuk anaba malya nenewoka saboka olosak. Sikja dara, nidyaʾ mok soko nim ek isaʾ nenelesakaʾ anasa, Imik Neyung adya sikenek lek senewoka yu ganya bolosil.

¹⁶Orokaʾ anaba nunja Yahudi gom soko nim ek, nimi blebsin Imik Neyung yuba leb elegeisinobaʾ ulumna enyek, sikja pika garawoka malya nenelesik. Wera ban unulumakaʾ adya, Yahudi nimi malya unaʾ ara nauba dangoka einildaknaʾ okna dangalamla. Anya wera sikda Imik Neyung adya yu ganya boboka obnesin senelamla.

¹⁷Bok nadyaʾ hemyabo nim o, nunda ugunub seʾ amba bokdangoka ulumab salek ebaʾ ara, heng kemenaʾ mok anasa ububa bok, ganya ak dara, neikaʾ ok ulumouba. Nunda ugunuk eibsisibya senen ganya nauba boboka, ugunub ok ab eibdeisibya senewoka nauba dulumouba!

¹⁸Nunda ugunuk kemel yanasab senewoka ulumoubukanya, anya nak dara, li hnonok penya anaso sunuwasebok, Iblis adya pika garab menegoka ubnyok.

¹⁹Ugun nong anyek, nunjaʾ ganya nebom anaʾ dibaʾ uboka, eiya dabnaʾ dibaʾ ululum. Anasa wera, Wenelesilnya Kristus yanamla sum era, ugunuk danyek nunjaʾ perob bonaʾ dibaʾ danalumaʾ ak ululum!

²⁰Anasa ugun nong anyek, nunjaʾ perob bonaʾ dibaʾ anaso ululumukanya, nunjaʾ ei-ei ganya nenesinaʾ gak nim ululum!