Read Nalca 1 TESALONIKA 3 Bible Online

1 TESALONIKA 3 - Nalca bible

1 TESALONIKA 3

¹Dara, nunda goʾ ubdaboka ugunuk ab yuba kebnenggubibyek aboka, wera Atena heikek an numbeyok or lobsulul senewoka,

²nunja hem be Timotius bera ugunuk boksunum. Alda Imik Neyung amba wa nub neikaʾ Kristus amba perob lero yanggan yuba neikaʾ welemabnya bek ulumla. Nunda Timotius benyek ugunuk bilom aboka boknamaʾ ara, alja ugunuk pe unuwanalum aboka wenewoka bo uboka, Kristus anyek dib ganya ologoka ulululumaʾ aboka, al adya ganya migibaʾ geblemnesil aboka bokonam.

³Wera anadya nunja wen an igina kwelesilnya nenesa leboka, ugun gangganek ara, nimi hnon nang era Kristus ak ganya kweboka unaʾ ara lobmunuk aboka bokonam. Ban unu igina kwelesilaʾ ara, Imik Neyung adya hnon unuwanasil senemokaʾ ak ulusilaʾ ara ella ululum.

⁴Nunda neikaʾ ugunub ulumouba sum era, nunda eimik era igina nauba kwebnesilaʾ ak yuba dobab asubaʾ ara ugunda seleb ella ululum. Wera nera aldib gigiwoka ugun gangganek an unulusilaʾ ara, eillilelum.

⁵Ban nenesa leboka, ugunja Kristus ak dib senebgiga balalumaʾ anyek, pe nauba unulumakaʾ orokaʾ anyek ella donunaʾ aboka, Timotius bera ugunuk an bilom aboka orugamsa. Bisaʾ adya nunja duboka welemouba wa nera sunuweisilya enyek malya uboka, salyaʾ lelem dalyek senewoka lok ganya bomsa.

⁶Wera Timotius bera nak seleb yeiniboka ugunda Kristus ak hekaʾ huboka dib senewoka uboka, ugunja wanaʾ uldalalumaʾ ara, perob yub enera neksuk. Dara onoʾ Timotius bedya nuk ara, hekaʾ huboka pero-pero unululumnya nenyek, anya nunja ganya edya dara pelemak senenya nu beklemnemab senelelumnya nenyek seleb neksuk. Anya ugunja dara nuk sikeneb eibdeisibya senelelumaʾ ara, nunjaʾ anaba ugunuk eibdeisibya senelemab sok ulululumaʾ aboka neksuk.

⁷Hemyab o, ban nenesa leboka, nuk yokaʾ-yokaʾ adya igina kweboka, okna berelesilaʾ anaba, ugunuk pe ulumak anaʾ kelemabaʾ adya, ganya sangal eleklesil. Ugunja Kristus ak dib senelelumaʾ adya, nunja ganya nauba perob senelemab.

⁸Alda ugunuk Wenelesilnya beb neikaʾ kwebdangoka uboka, gasaʾ anyek pe ululumaʾ anasa, nunda aldib pe ulumnemab.

⁹Wera ugunja pe ululumnya nenedya, Imik Neyung saramek sam nunja alak perob aboka giblemabaʾ ara hyak nauba dangoka ulumla.

¹⁰Ugunja Kristus ak dib senenaʾ anyek nunda ugunub ok eibdangoka, hnon onoʾ mak sounuwoka neksisibya senewoka, yubyek inimnek pik moruwoka Imik Neyung ak nauba mololemab.

¹¹Wera nunjaʾ neyung Imik Neyung yokaʾ ab, nunja Wenelesilnya Yesus adya, ugunub neikaʾ ok eibdanamab pik era yarawousulul!

¹²Wenelesilnya bedya migib edya, nunja ugunuk wanaʾ ulusab sok, ugun moumen wanaʾ nauba ubdangoka, anya onoʾ nimi yok nim ek wanaʾ ubgiga balamunaʾ adya, wera anadya ugunja wanaʾ unaʾ nauba danggiga balalul senelemab.

¹³Wera anadya Wenelesilnya Yesus ara nimi nidyaʾ aljaʾ yokaʾ dangalamak nim eb yanamak sum era, Wenelesilnya bedya ugunja ganya migiba gebiyiwanesilaʾ adya, nunjaʾ neyung Imik Neyung saramek sam, nuk dara geisaʾ anyek uboka, si gegenaʾ pona orokaʾ ak dangiyiwanesil.