Read Nalca 1 TESALONIKA 4 Bible Online

1 TESALONIKA 4 - Nalca bible

1 TESALONIKA 4

¹Na kabo nim o, wen sidyaʾ lebdaknesin. Imik Neyung perob senewosululaʾ aboka anaso unulumnulum ara ugunuk nekesub dara, keboka wen unululum. Dara, wenyok Wenelesilnya Yesus si sibuka, sobaʾ nauba so dolulaʾ aboka, onoʾ unul sounululumaʾ aboka, dukaʾ lolom-lolom alasab.

²Wenelesilnya Yesus bek ab hek oruknaʾ yub ak ugunuk elegosubaʾ ara, ugunda ella ululum.

³Imik Neyung senelamla ara, nadya mabo geisa ulunok senelesil, anya yok gel salanaʾ hyak lek senelesil.

⁴Imik Neyung elgom ulumak nim era, gel ganya nauba bolomak sok unggom. Ugunda nidyaʾ ara ugunja nonga geisa ulululaʾ aboka, pe eboka pe unuldalamnalum.

⁶Ban oruknaʾ yuba blekoka yok nim ek malya ununggom. Ugunuk seleb yuba sekoka lesuba sok, Imik Neyung ara ban malya unaʾ amba yu ganya boboka obnesil.

⁷Imik Neyung ara malya ulunokaʾ aboka youbnenggusuk, geisa ulunokaʾ aboka youbsukaʾ anasa, ban anaso unggom.

⁸Anasa, ben hnon ara ban yuba blekoka lolomla dara, nimi yub ak gom, alja Geisinya eleklesil Imik Neyung bedya yub ak blekoka lolomla.

⁹Imik Neyung adya ugun kabo nim ek wanaʾ ubdanalum aboka seleb nekesukaʾ anasa, wera, ban yub en onoʾ momnya dobnenggunusibya.

¹⁰Al dib, ugun kabo nimi Makedonia sokok ulumak nimi nidyaʾ ak wanaʾ ulusulum. Bok, hemyab o, nauba so unul sounululumaʾ aboka dukaʾ lolom-lolom alasab.

¹¹Ugunuk seleb wenyamouba sok, namenaʾ ulumnulum. Yok nim edyinya nek doboka salyaʾ makal banggom. Ugunja soruk adya ugun dam nang wa welemnelum.

¹²Dara, sobaʾ anaso pe ulumnelumaʾ adya, yok nim era perob senelemnesak. Anya, yok nim ek arawananulum aboka sobaʾ molonggulumnusom.

¹³Na kabo nim o, seleb somogek nim era hek so ulumak do aboka ella danasom senelemab. Sikenek perob danganaʾ unggulumak nim era, nauba engelemak sok unuwanggunusom.

¹⁴Yesus ara somogoka onoʾ embengaʾ welemokaʾ ara dib senelemabaʾ anasa, Imik Neyung adya alja mabo men somogomek nim era, Yesus ablaboka bob mamagiyiwanasilaʾ ara dib senelemab.

¹⁵Wenelesilnya albeyok wenyasuk sok wenyhenesab, Wenelesilnya yanamla sum era, anam embengaʾ ulumab nim era men somogomek Imik Neyung mabo mengeb hwibnenggunusab.

¹⁶Wenelesilnya bera imik ab yingginiboka bii aboka, lero dubnya wenyaboka, Imik Neyung benggong yuba leblya dara, somogomek nimi Kristus mab ara men welewanamak.

¹⁷Ana berem ara, nu anam embengaʾ ulumab nim era debaʾ hnoum sikenek bob mamagiyiweisilya dara, Wenelesilnya bera imik sam eb hwibdanamab. Dara, Wenelesilnya ablaboka sob-sobaʾ ulmoublomnamab.

¹⁸Anasa, ban yuba lebdangoka ganya hekellildalamnalum.