Read Nalca 2 TESALONIKA 1 Bible Online

2 TESALONIKA 1 - Nalca bible

2 TESALONIKA 1

¹Hem yabo Tesalonika heikek yuba donaʾ nim, nunjaʾ neyung Imik Neyung mabo dangoka Wenelesilnya Yesus Kristus mabo dangalum nim ek,

²nunja nara Paulus, Silas beb Timotius beb dadya dara, nunja neyung Imik Neyung beb nunjaʾ Wenelesilnya Yesus Kristus adya wanaʾ uboka eleksinaʾ ab perob unaʾ ab ara ugunuk ulusulul senelesab.

³Hem yab o, nunda ugunsamba leboka sobaʾ Imik Neyung ak perob aboka giblemab. Ugun nong anyek, Kristus ak nauba dib senebgiga balalumukanya, ugun moumen anaba wanaʾ ubdanggiga balalumaʾ anasa leboka, wera wanoksodya nera unulumab.

⁴Anya wera, ban unululumnya nenesa leboka, nunda yok Imik Neyung yub donaʾ nim ek kemero yabanek ab, ugunuk nekoka, sikda anaso unu yuba dib senewoka unulumak aboka nekdo yabalesab. Ugunuk nong ak dara, yokaʾ-yokaʾ damok igina kweboka, nauba gweklelum bokaʾ anyek babya, Kristus ak ganya kweboka dib dololumaʾ ara dib mel-mel alamlaʾ anasa, unulumak aboka nekdo yabalemab.

⁵Ban nong adya, anyaganyeb danyek, Imik Neyung ara alda hekaʾ huboka yana lelewoka beknaʾ dangalamla ara laga danamlaʾ ara, Ugunda Imik Neyung wenesin heik amba leboka nauba igina kweboka gweklelumaʾ anasa, wera ugunda aldib Imik Neyung wenesin heikek weknelum nimi beknaʾ laga ulumla.

⁶Imik Neyung nong ak dara, alda perob ok keeboka unululanya bek adya, ugunuk an igin kwel eleklesak nim ek ara, sikbabya lunuwoka igina kweb eleganesil.

⁷Wen ugun an yokaʾ adya igina kwelesil nim ek hnon arawanasil dara, onoʾ nuk anaba neik so arawanasil. Anasa Imik Neyung ara imik heikek abaʾ ara aljaʾ senenggom migib lero nang neikaʾ hiboka yingginimak sum enyek unuwanesil,

⁸dara alda imik ab uk bokaʾ nang penya yeiniboka, nimi nidyaʾ Imik Neyung yuba ganya dibla henggonggom uboka, Imik Neyung adya perob lero yanggan yuba lelesilaʾ sunuwoka unggulumak nim ek ara, obnesil.

⁹Ban unu malya unulumak nim era, Imik Neyung adyaʾ si imik nenenaʾ migib pik ab hnon mok nenewoka yaknesil dara, sikda mok somoknaʾ heikek sam sobaʾ ulmoublemnemak.

¹⁰Ban nidyaʾ ara, Imik Neyung ak dib senelemak nim edya gibnunaʾ aboka hnon, onoʾ alja munaʾ Imik Neyung mab edya nak gibnenokaʾ aboka yanamla sum era, ugunda nunja bo yeilimouba yub ek dib senewoka dolumaʾ anasa, yok nim unuwanamakaʾ gangganek sam ugumbabya ulumnelum sum enyek, nidyaʾ gigiwoka unuwanamla.

¹¹Ban nenesa leboka, ugunuk anaso unuwousululaʾ aboka, nunda ugunsamba sobaʾ heng uboka mololesab. Nunja ugunsamba heng uboka mololesabnya nera, ugun nong anyek Imik Neyung adya ugunuk youbosukaʾ anasa, anaso unu ubseng senelelanya nenyek, gigiwoka pe ululumaʾ aboka mololesab. Anasa wera, Imik Neyung adya ugunuk aralesilyaʾ adya, ugunja Kristus ak dib senemoub aboka welelum wa nidyaʾ ara, pe unulumunaʾ adya pebgiga balalulaʾ aboka, Imik Neyung migib adya ugunuk sam ak dara, alja senelamla sok gigiwoka unulusulul.

¹²Wera ban nenyek unulumunaʾ adya, wera nunjaʾ Wenelesilnya Yesus ara si imik nenewanalumukanya, onoʾ nunjaʾ Wenelesilnya Imik Neyung adyaʾ aljaʾ wanaʾ uboka eleksinaʾ sunuwoka, nunjaʾ Wenelesilnya Yesus Kristus adya ugunja si neneba imik nenewanasil aboka mololesab.