Read Nalca 2 TIMOTIUS 1 Bible Online

2 TIMOTIUS 1 - Nalca bible

2 TIMOTIUS 1

¹Nara Paulus bedya, nadya wanaʾ nong ulunggen me, najabo Timotius anak ban momnya donaʾ era weboka beibgen. Nara Imik Neyung adya seiniwoka donyokaʾ adya, Yesus Kristus bedya yuba lenaʾ gaknya uboka, Yesus Kristus lomok nim embengaʾ ulumnamak amok yuba lero yabalamna.

²Anya wera, nunjaʾ neyung Imik Neyung ak ab, nunja Wenelesilnya Kristus Yesus ak ab, wanaʾ uboka eleksinaʾ ab, angoo yadyek senewoka arasinaʾ ab, namen unaʾ ab dadya, anak arawoka ulunggulul.

³Nadya neyung yab edya youmaʾ sikda ulumek sok, nadya mek ganya senenya lonaʾ adya, aralenanya Imik Neyung bek perob aboka giboka mololamna. Nara inimnek yubyek pik Imik Neyung ak molol yabenek ab dara, ugunuk hnon seiniwoka sob-sobaʾ mololesin.

⁴Nadya dara, ugunja ganya angwei senelelumaʾ ara seiniwoka mololesin. Ban nenesa leboka, nara anab hyak okoka eibdeisinimaʾ adya, nadya ganya hekneso senelamna.

⁵Anja genong Eunike geb, anja donggel Lois geb dadya, sikja Kristus ak dib senelerek sok, anja Kristus ak dib senelelamaʾ ara, nara seiniwoka ulumna. Nadya dara, anda anaso uboka Kristus ak dib senelamlaʾ anyaʾ senelenggen.

⁶Ban nenesa leboka, nadya anak soruka diyiwoka heng uboka yuba lelelom aboka lenggesa sum enyek, Imik Neyung adya anak elegenjoknya nenyek nauba nenelelomaʾ aboka, gokoka neklenggen.

⁷Anasa wera, Imik Neyung adya nuk elegosukaʾ ara, lok ganya ak eleganggusuk. Bok, alda nuk elegosukaʾ ara, migib un ganya hnon, wanaʾ un ganya hnon, diri uldan ganya hnon, elegosuk.

⁸Ban nenesa leboka, nunja Wenelesilnya bemba alja yuba lero yabanaʾ ak alya bar aboka longgom, mem. Onoʾ nak Kristus amba leboka gasa ek henga gouboka beibnyeknya nenesa, alya bar aboka longgom, mem. Bok alda saawoka, anda Imik Neyung adya eleklenggel migib edya, Imik Neyung adya perob lero yanggan yub emba leboka, amba neikaʾ igina kwelenggel bok yeiriwoka welelom.

⁹Imik Neyung adya nuk bleboka doboka, nuk geisa ulunokaʾ aboka youbosuk. Imik Neyung adya ban unuwosukaʾ ara nunja yoknya nek pe unumoubaʾ amba ubnenggubsuk. Alda alja wanaʾ ulusukaʾ orowek unuwanamna senemokaʾ ak sunuwoka ubsuk. Ban soko en anam uyiwanggom salek enyek, Yesus Kristus pik uboka, alja wanaʾ unaʾ ara, nuk seleb elegesuk.

¹⁰Anya wera, Imik Neyung adya alja wanaʾ unaʾ era, nuk blebsinaʾ dubnya Yesus Kristus laga dangamokaʾ adya laga amasuk. Yesus adya somoknaʾ migib era seleb yugoma nenewoka, alja perob lero yanggan yuba pik uboka dib embengaʾ ulmoubnaʾ damok ara, alja bo yeiniboka laga amasuk.

¹¹Ban wenyaboka perob lero yanggan yuba lero yaban damba, Imik Neyung adya nak yuba lenaʾ gaknya hnon, yuba neksinya hnon, jaboka sekiyinyok.

¹²Ban nenesa leboka, wera nara an yokaʾ-yokaʾ igina kwelenel. Bok heknyek dib senemsaʾ ara, nara dib ella ulumnaʾ anasa, angoo senenggulumna. Nadya banyek dib senelamnaʾ ara, alja nak welelom aboka lobongganyok wa nera, onoʾ welemnyaʾ ak an alja diri bo ulumlyaʾ moruwoka soko sidyaʾ daknamla sum unuro lobnamla senewoka, dib senelamna.

¹³Nadya anak an seleb leboka, nidyaʾ nekgesa sok, anyek pe sunuwoka ululom. Anya wera, onoʾ nunda Yesus Kristus ab neikaʾ hnonok kweldalamabaʾ adya, nunjaʾ dangamok wanaʾ unaʾ ab, yuba dib senenaʾ ab danyek, anda pe salabmoubuka ululom.

¹⁴Nuk ulusil Imik Neyung Geisinya adya anak arawoka, perobaʾ anak elegenjoknya nera, pe beiyiwoka bo diri ululom.

¹⁵Nimi nidyaʾ Asia moka ulumak nim era, nak ara loboka yokok byik. Dara, Figelus beb Hermogenes beb dadyaʾ anaba, seleb nak lo binirekaʾ ara, anda ella ululam.

¹⁶Bok, alda Onesiporus bedya ek nim edya danyek, alda nak ganya pe sangab elegoka ulunyok. Anasa, Wenelesilnya bedya, wera e nen nim ek angoo yadyek senewoka arawoka pe bo ulusulul. Nara henga gereksin ek an gereganyekaʾ anaba, Onesiporus bera henga geregek anasa, alya bar aboka, yokaʾ seiniwanggumok.

¹⁷Bok alda na Roma heikek anam yalamsa sum era, al adya nak men hanyagar ulumlyaʾ ak eibnun do aboka, eboka nak men eibnyok.

¹⁸Dara onoʾ, al Onesiporus bera, na Epesus heikek ulumsa dara, alda hyak nak nauba aralenyokaʾ ara, anda pe ella ululam. Anya wera benyek anasa, Wenelesilnya bedya nimi nidyaʾ sokok an yana lelewanasil sum era, alak angoo yadyek senewoka arawanamla.