Read Nalca 2 TIMOTIUS 4 Bible Online

2 TIMOTIUS 4 - Nalca bible

2 TIMOTIUS 4

¹Yesus Kristus ara sokok an eikaʾ ulumak nimi hnon, somoklomak nimi hnon, yana lelewosununaʾ aboka yanamla. Dara, alda laga danamlakanya, alda dubnya dangoka wenelemnesilnya nenesa leboka, Imik Neyung saramek sam hnon, Yesus Kristus saramek hnon, ban nenyek unululomaʾ aboka molowagenaʾ ara,

²Anda Imik Neyung yub ara sobaʾ lel eleklelom. Perob salek gom, malya salek gom, sobaʾ meewoka ululom. Anda nimi ganya dangallilisilom, meilinya nera ban aboka wenelesilom, banyek unuwolulum aboka nimi ganya wekellilisilom. Anda hyak ganya kaboka siklewoka ulumenekanya, pe neklesilom.

³Nimi jongaʾ pe ulumak yuba dobnenggunumak sum hnon yanalabok anasa, pe neklesilom. Eimik era dobnenggunumaakanya, saawoka nim adya anyek unuweisinya senewanamaakanya, nenyek ok unulumnumak. Dara, nunja o kelemeibya dara, pelemlya anyek kero ulunob senen malya neknaʾ enyek neklesinokaʾ aboka, nimi neksin nang nauba, bo boklomnemak.

⁴Sikenek dara, nimi pe jong ulumak yub ek dara, kebibyek aboka o pika lebeldalamnamak bok, salyaʾ malya hwam yub ek sam ara, or pe kelenob senewoka o bakoka kelemnemak.

⁵Bok anak dara, nidyaʾ yokaʾ-yokaʾ lanalamla ak ab, ganya pe siklewoka diri ululom. Anda Imik Neyung bedya wa wennya dibaʾ uboka, yokaʾ-yokaʾ igina kwelenggel bok pe kaboka ululom. Anda perob lero yanggan yuba len wa hyak pe lelewoka welelom. Anak elegenjok wa nidyaʾ anyek, sobaʾ luka bongoldililom.

⁶Nak anyagan ara, Imik Neyung amba somoganamna salek era, wera seleb oka dal. Maldabnaʾ loboka, mek anam soko enera lo binimna.

⁷Nara pe yeiriwoka oldalamsa. Nara bik-bikal dakal bilimsa. Nara dib senenaʾ ak pe bojam ulmorulamnyaʾ ara sidyaʾ daknamla.

⁸Ban nenesemba leboka, pe ulumokaʾ amba huk goulunaʾ era seleb diri ulunel. Sidyaʾ daknamla sum era, pe jongaʾ anyek yana lelesinnya Wenelesilnya bedya ban deknaʾ era, nara Imik Neyung ab perobaʾ dangoka ulumnaʾ anasa, nak doboka eleganenel. Nera or nanokok gom, alda nimi nidyaʾ Wenelesilnya be yanamla senewoka ganya neboma diri ulumak nim eneba, ban neik deknaʾ en dobnemak.

⁹Nak sam an men younunaʾ aboka dululom.

¹⁰Demas bera sokok anyek wanaʾ uboka, nak ara seleb lo binyok. Alda seleb Tesalonika heikek byuk. Kreskes bera alda seleb Galatia moka byuk. Dara, Titus beneba Dalmatia heikek byuk.

¹¹Alda Lukas bek hnonok nablaboka neikaʾ ulunam. Anda yanggamen dara, nak an aralemnenelaʾ anasa, Markus bera eboka bobgiga yanalam.

¹²Nara seleb Tikhikus bek anda Epesus heikek bilom aboka bokomsa.

¹³Anda yanggamen dara, nadya mok goulunaʾ aklenga Karpus bedya ek sam Troas heikek lo yasaʾ anyek, hnon doboka bobnenelem. Anya nadya buku arobaʾ hnon doboka bobnelom. Dib nong soʾ ara, gal bokaʾ pik weberob buku nong enyek doboka bo yananelem.

¹⁴Ya ab, yokaʾ-yokaʾ ab, selewoka memelelanya Aleksander bera, nak yok-yok malya unaʾ nauba ununyok. Wenelesilnya bedya alba eimik alja unumokaʾ sunuwoka diriganamla.

¹⁵Bera alda nunja lelemab yub enera, bol nenel goklesilaʾ anasa, anda alak pe keeboka ululom.

¹⁶Nak heng goubenyekaʾ anasa, men yuba garawoka sekeldalamsa sum era, nimi ben hnonok sibin anaba arawanggunyek. Sikda nidyaʾ lobnyeekanya, sen-senem abgogorob. Anasa, wera malye, Imik Neyung adya sikenek nera malya ublum henggunususo, senelamna.

¹⁷Bok, Wenelesilnya nak aralenyok. Perob lero yanggan yuba pe lelemlyaʾ adya, nimi nidyaʾ Yahudi gom nimi kebnokaʾ aboka, nak alja migib elegenyok. Dara onoʾ nara senenggom bei gam si ak ab blebnyok.

¹⁸Nera aldib Wenelesilnya bedya nak malya ublul senewoka sunulunelaʾ ak ab blebelmorulumnenel. Alda nak doboka alja imik heikek pe bo binenel. Alak imik nenewoka sobaʾ pe giblenok. Amin.

¹⁹Nadya Priskila geb Akwila beb, Onesiporus bedya ek nim eneba, neikaʾ perob aboka gibsin.

²⁰Erastus bera or Korintus heikek ululabok, Trofimus bek dara, neikel yabok bok, Miletus heikek alda lo yasa.

²¹Saragenaʾ li yenewanggumlya salek enyek, men bunun senewoka pe duboka nak yanalam. Ebulus beb, Pudes beb, Linus beb, Klaudia geb dadya, anak perob aboka gibjak. Dara onoʾ anyagan yok yuba dolomak nim edyaʾ anaba, hnon anak perob aboka gibjak.

²²Wenelesilnya bera anak ganya arawoka ulunggulul. Wenelesilnya bedya anak wanaʾ uboka eleksinaʾ ulusulul. Nara Paulus bedya seleb lemna.