Read Nalca TITUS 2 Bible Online

TITUS 2 - Nalca bible

TITUS 2

¹Titus o, bok anak dara, hyak dib perob nong eikaʾ yub enyek ok neklesilom.

²Nengmabo nauba nang ek dara, sikda ganya siklewoka kaboka ulunokaʾ aboka, perobaʾ ok seiniwoka ulunokaʾ aboka, hnonda yok nim edya perob senelesak nang geknebaʾ ulunokaʾ aboka, onoʾ yuba dib senebmoubuka, hyak wanaʾ ubdangoka, pe siklewoka welenokaʾ aboka pe neklesilom.

³Anasonya neikek, onoʾ seleb kalamla nauba nim ek, Imik Neyung mabo pe ulumak diligaʾ enyek doboka ulunokaʾ aboka, yok nim ek miniwoka len yuba loboka, yu meka nauba deregoka unaʾ ara mem aboka neklesilom. Onoʾ sikda perob yub enyek nekdangoka ulunokaʾ aboka neklesilom.

⁴Sikda ban unulumeijaʾ adya, wera onoʾ sikja goubenya gelewa ek, sikja nenyab eb, memab ab, wanaʾ ulunokaʾ aboka neklesinok.

⁵Onoʾ goubenya gelewa era, geremseng uboka, ganya geisa uboka, namen uboka, onoʾ nenyab adya yuba keboka, perob ek nimi dangalenokaʾ aboka wenelesinok. Nunja Imik Neyung yub ara yok nim edya malya neneweijek anasa, anaso pe ulunok.

⁶Anasonya neikek, onoʾ goubenya nang ek anaba, sikda pe seiniwoka diri ubdangoka pe ulunokaʾ aboka dukaʾ lolowoka wenelesilom.

⁷Anda yokaʾ-yokaʾ nidyaʾ unulumenaʾ ak ara, yok nang edya diliwagenokaʾ aboka, perob ok unululom. Anda yuba neklesimenaʾ ak ara dib nong ok anyek, laga angawoka neklesilom.

⁸Anadya anak malya senelenjak nang era, nunja malya unaʾ hnon ununaʾ orok adya nuk mininaʾ yuba okna anasa, sikda alya dabsulul aboka, nim adya si malya danganggulumla yuba damok enyek, pe geremsengaʾ lanawanamlya yuba damok enyek neklesilom.

⁹Wa arawoka welemak nang ek dara, sik wa welemak ek nim edya yuba pe keboka, sikenek eiya dabsululaʾ aboka, pe unulunok. Wa unu welemab bok anasa, anyek elegosuso aboka youmburaʾ debnaʾ ab, yok-yok saawoka lenaʾ ara mem.

¹⁰Hokaʾ donaʾ anaba hyak mem. Sikda pe uboka, wa bojam welemak senen hogung enyek laga geknelenok. Wera ban unulumeija hogung enyek, yok nim edya eiyiwoka, sikda nunja blebsinaʾ dubnya Imik Neyung bedya yub ek gigilenokaʾ aboka, unulunok.

¹¹Anasa Imik Neyung ara seleb orowek soko nimi nidyaʾ ak, blebsinaʾ damoka bo yalasil wanaʾ unaʾ era, seleb aawosuk.

¹²Ban Imik Neyung adya wanaʾ uboka eleksinaʾ adya, nunda sokok an ganya oka denaʾ ulumlaʾ digum unaʾ hnon, yokaʾ-yokaʾ Imik Neyung adya perob gom senelelanya nek hnon, hyak loblulum aboka nuk neklesil. Nunda sokok an ulumeibya danyek, pe ganya siklewoka, geisa uboka, Imik Neyung ak pe bojam ulunobaʾ aboka, alja wanaʾ unaʾ era neklesil.

¹³Nunda wenera, nunja perob anasa berra yaso senelemab sum era, nunjaʾ senenggom Imik Neyung uboka nunja bleblesilnya Yesus Kristus laga danamla sum enyek, nauba omom nong ubnamlaʾ anasa, diri ulumab salek enyek, anaso ulumnelum aboka neklesil.

¹⁴Nuk malya unaʾ nidyaʾ ak ab blebsununaʾ aboka, al nong anyek nunsamba leboka elegosuk. Anadya wera alja mab ok nenewoka, malya unaʾ mekaʾ unggom nimi neniyiwoka, perobnya nenyek, yeng ganya boboka ulunokaʾ aboka, ubsuk.

¹⁵Anda hyak loksonya benyek ulumenekanya, anja yuba kelenggija nim ek, ban nidyaʾ lebnanya nera, hyak pe wenewoka ooma leboka neklesilom. Anak yok nim edya dara, alda or maly, mek goubenenya benyaʾ, seneweigejek anasa, mem!