Read Nalca TITUS 3 Bible Online

TITUS 3 - Nalca bible

TITUS 3

¹Wenewoka bo usin nang ek hnon, senenggom dub nang ek hnon, pe giboka yuba kelemunukanya, onoʾ perobnya nera, sobaʾ yeng ganya boboka unulululum aboka, anja yuba dolomak nim ek pe wenelesilom.

²Onoʾ sikenek, yok nimi si ak malya yub edya, malya nenewomunuk aboka hnon, nimi yok nim eb mala weboka waldanaʾ loboka, pe heknaʾ ganya boboka ulululum aboka hnon, nidyaʾ yok nim ek, namen uboka pe heknaʾ hwam ok ulululum aboka hnon, wenelesilom.

³Anya wera, nunda numbabya youmaʾ dara, yuba blekoka dongdang anaʾ ak ulumouba. Nunda youmaʾ dara, bob nenewoka lelesiikanya yok-yok ganya seininaʾ edya hnon, yokaʾ-yokaʾ unuweisinya senen ganya edya ok goluwoka malya ulumouba. Nunda yu hwam ok uboka, hmana lebdangoka, hyak lek senebdangoka ulumouba.

⁴Bok nunja blebsinaʾanya Imik Neyung bedya nuk alja perob unaʾ ab, onoʾ alja wanaʾ usinaʾ ara, seleb amasuk dara, alda nuk blebsuk.

⁵Alda nuk blebsukaʾ ara, nunja alak perobaʾ ak unumouba amba blebnenggubsuk bok, alda alja men nuk angoo yadyek senewoka arasinaʾ adya ok blebsuk. Imik Neyung Geisinya adya dib embengaʾ damok ab, penya beilinaʾ ab dara, nuk elegoka mek elegosukaʾ adya blebsuk.

⁶Imik Neyung adya alja Geisinya nuk gokoka elegesukaʾ ara, nunda blebsinaʾ dubnya Yesus Kristus pik uboka elegesuk.

⁷Wera alja wanaʾ uboka eleksinaʾ adya, nuk perobaʾ neniyisuukanya, onoʾ nunja dib embengaʾ ulmoubnaʾ damok ara, nunja seiniwoka diri ulumabnya nenyek, dobnamak aboka blebsuk.

⁸Ban lebna yub era hyak dib yuba. Nadya senelamnaʾ ara, ban seleb wenyhenya nenyek, yok nimi seleb Imik Neyung ak dib senelemak nimi nidyaʾ ara, perob wa nong enyek hyak duboka yeiriwoka welenokaʾ aboka, hyak nauba so pe neklemnesilim. Ban anaso unaʾ era, nimi nidyaʾ ak dara, perobaʾ ab perobnya neb danyek ulusil.

⁹Bok anak dara, dongdang aboka yeiriwoka malya gak enyek, heng ero yabalamaknya neb, youmaʾ unumok aboka salyaʾ nekdo bulumak neknaʾ eb, Yahudi nim emba unuwanalum an yub amba mala weboka waldanaʾ ab dara, ban nidyaʾ ara perobaʾ ak unggulumlakanya, nuk pesinaʾ damoka bo lananaʾ orokaʾ ak anasa, anara mok geboka ululom.

¹⁰Nimi yuba dolomakaʾ ak doluwoka bokol goklesak nang ek ara, anja ban unululamaʾ ara loblom aboka, li penya unu gorogoka lelelom. Ban nen seleb unuwamen bok dara, anda alab neikaʾ uruma dobdangoka unaʾ ara mem.

¹¹Ban anaso nang era, alda hyak seleb malya nonga doknya bera alan. Alja malya ulumlaʾ nong adya, wera alda malya unaʾ hwamnya seleb nenebdangamokaʾ ara, ella ululam.

¹²Nadya Artemas bek gom, Tikhikus bek gom, anak bilom aboka ben hnon boknyaʾ anyek, ben hnon anak yalya dara, nara sargenaʾ li yenewalyebok dara, Nikopolis moka ulumnamna senemnaʾ anasa, men na ulumnyaʾ ak berra yanalam.

¹³Senas yuba damok elnya beb, Apolos beb dara, sikda pe lanawoka baladurukaʾ aboka, sikenek unggulumlyaʾ nidyaʾ anyek, pe duboka arawanasilim.

¹⁴Nunja nim era, sikja unaʾ ek dara, perobaʾ ak unuwanggubijek aboka, sikja ganya edya anyek desibya bobsibya senelemaknya nera, pe dolonokaʾ aboka, sikda perobnya nenyek unulmorulunokaʾ aboka ella dangalanok.

¹⁵Nunja hemyabo nimi nidyaʾ anyagan nab neikaʾ ulumab nim edya, ugunuk perob aboka gibsak. Nunja gibsabnya nera, nunja hemyabo yok nimi, yuba dib senelemab adya wanaʾ ulusak nim ek, unu gibisak aboka nekdo yibinelam. Anya wera, Wenelesilnya bedya, ugunuk nidyaʾ nauba wanaʾ uboka eleksinaʾ ara ulusulul. Nara Paulus bedya seleb lebsin.