Read Nalca IBRANI 11 Bible Online

IBRANI 11 - Nalca bible

IBRANI 11

¹Anasa ganya dib senenaʾ ara, yokaʾ-yokaʾ nunja ganya weboka dobnemabaʾ senenaʾ nong ak ulumlakanya, nunja yokaʾ-yokaʾ eibnenggunanya nek beknaʾ dibaʾ ak ulumla.

²Dara ban ganya dib senenaʾ nong adyok, nunja youmaʾ nim ek ara, laga eilinaʾ ak sam dara, pe ganya mabok.

³Anasa nunja ganya dib senenaʾ adya, ban nidyaʾ im soko ara Imik Neyung yub adya uyiwok senewoka ella ulumab. Wera anedya ban eillilimabaʾ nidyaʾ ara nunda eibnenggunusibyaʾ ak ab uyiwokaʾ ak eillilimab.

⁴Dara Habel bera, alja ganya dib senenaʾ adya Imik Neyung ak ara Kain bedya giboknya nek ab dara, loboka alda hyak perobnya nenyek elegoka gibok. Wera an pik enyek anyeb uboka, alda alak ara laga lenaʾ dobokaʾ ara alak danyek hyak pebok, anedya Imik Neyung ara alja giboknya nenyek perob senewookanya, alda ganya dib senemokaʾ nong adya, seleb somogomok bok, weneba sobaʾ alda unumok alamak.

⁵Dara Henokh bera alja ganya dib senenaʾ adya, alda somogalyek aboka Imik Neyung adya gamyakaʾ do welewokaʾ adya alda eibnenggubek. Anasa alda anam do welewanggom dara, alda Imik Neyung ak ganya hekellilemok.

⁶Bok nim ara ganya dib senenaʾ orok dara, Imik Neyung ara perob senenggulusil. Wera anasa, heknedya Imik Neyung ak yanalanya bera, alda Imik Neyung ara aldib ulumla senewoka ulumlyekanya, alda nim Imik Neyung alak elemak nim era deknaʾ eleklesil senelelul.

⁷Dara ganya dib senenaʾ adya, wera Nuh bera anam laga danggumoknya nenyek Imik Neyung adya alak nekemokaʾ sunuwoka, pe ganya gouluwoka alja ek nimi bleblulaʾ aboka, alda senenggom mek ekla bunaʾ meemok. Anya ban ganya dib senenaʾ adya, alda sokok an igin elegookanya, dara alja ganya dib senelemokaʾ sunuwoka, alak perobaʾ donya dok.

⁸Dara Abraham bera ganya dib senenaʾ adya, alda yok mok soko aljaʾ misaʾ danamok sokok sam binilam aboka ebok dara, alda hek mok balamnaʾ ara elgomaʾ anyek pe keboka lanawoka byuk.

⁹Wera ganya dib senenaʾ adya, alda Imik Neyung adya eleganenggen amok sokok sam ara, sekel yanggan nang mok soko anasoʾ ak ulumok. Dara anyeganera alda luboka son ek sam ulumok, dara ban hnonok wenyasuk yub en neikaʾ misaʾ dobek nang Ishak beb, Yakub beb danaba, neik so unu ulumek.

¹⁰Anasa alda pe gasaʾ adya yangawoka son heikek, Imik Neyung adya seiniwoka sobnamla heik senewoka ganya gouluwoka diri ulumok.

¹¹Onoʾ Abraham bera ganya dib senenaʾ adya, alab Sara geb dara, seleb yamen dangarek bok, me beiblulaʾ aboka migiba dobok. An nera alda ban me eleganenggen hyoknya bera pe bojam ululanya benyaʾ senemokaʾ adya unuwok.

¹²Wera ban nenesa, nimi hnonoknya bek ab, alda seleb somogomoknya bek ab bok, alak pik ab danyek nimi nauba likekaʾ ara, imik sam eini guraʾ ololaʾ anaso ab, mek gwan gemek egenyaʾ enesoʾ hyak einibdaknamenggomaʾ anyek likek.

¹³Dara ban ganya dib senelemek nimi nidyaʾ ara sikda ban perobaʾ eleganasin amokaʾ ara dobnenggubek. Banera mok ab eiyiwoka dobnob senemek bok, dobnenggubek. Anya sikda aldib sokok anera yok mok soko nim enesoʾ uboka sekel yanggan nang ulumek.

¹⁴Anasa sik an anaso wenyalamek nang era, sikda yok heik enyek ganya oka deregoka elemek nang.

¹⁵Anya ban unulumekaʾ ak anyeb, sikja soko yokaʾ nong enyek an lo yeilisengaʾ ak an or seiniliseng dara, wera sikda onsok saawoka ban salek nauba ulumok.

¹⁶Bok wenera sikda hyak perob heik hnonok ok ubsibya senelemakaʾ ara, imik heik ok ulumla. Anasa Imik Neyung ara ban hnonok heik era siksamba meewoka solosilaʾ anasa, Imik Neyung ak ara sikja Imik Neyung aboka si silimneseng dara, alda alya dabnenggunumso.

¹⁷Dara Abraham bera alda ganya dib senenaʾ adya, alak sunubyamawok dara, Ishak bek giboka beibuk. Wera alja ban unuwanasin an yuba domoknya bedya, alja me yando me nera or oboka gibnun senemok.

¹⁸Nera alak ara seleb wenyamok bok, ”Dara Ishak be pik ab liknemak nang yilaʾ enedya, alja nang yilaʾ henemak,” amokaʾ anyek babya oboka gibnun senemok.

¹⁹Dara alda ban unu seinimokaʾ ara, Imik Neyung ara nim ak somogamnaʾ ak abaʾ anaba, migib adya embengaʾ suboka buklililisilnya benyaʾ senemok. Anasa alda somogamna anasoʾ bok, saawoka domnaʾ dok.

²⁰Dara Ishak bera alja ganya dib senenaʾ adya, wera alda hyak moknya nenyek seinib gogomookanya, aljaʾ perobaʾ misaʾ ara Yakub beb Esau beb perobaʾ leboka elegosuk.

²¹Dara Yakub bera alja ganya dib senenaʾ adya, alda anam somoganamok salek era, alja gamaʾ ak huk eriyiwoka giblemokjok, nimi perobaʾ misaʾ ara Yusuf bedya mabo moumenaʾ ek leb elegosuk.

²²Dara ganya dib senenaʾ adya Yusuf bera anam somoganamok salek era, Israeli nim goubnomekaʾ ab, alja yok eb dara, pe meewoka bo binilum aboka nekoka leb gogomok.

²³Wera ganya dib senenaʾ adya, Musa bera anam beibuk salek era, alja genong gedya dara, me nera hyak goubenyekanya, sikda wenenaʾ dubnya bedya yub ek ara loka dabnenggusukaʾ anasa, alja nauba nim edya walaʾ winilya doknemek.

²⁴Dara ganya dib senenaʾ adya, Musa bera seleb nebok dara, alda wenesin dubnya bedya gelma edya me nenyaʾ anaʾ ara lek hyok.

²⁵Nera alda or seʾ amba malya unaʾ ak abnya nenyek eiya hlaboka un danegom, alda Imik Neyung adya nim eblawoka igina kweboka unya nenyek perob senelemok.

²⁶Alja ganya seininaʾ era deknaʾ donaʾ anyek mamokaʾ adya, alda Mesir mok soko nidyaʾ perobaʾ digum ak ab dara, Kristus anasa leboka derelesaknya nenyek hyak senenggomaʾ perob bonaʾ senelemok.

²⁷Dara ganya dib senenaʾ adya, Musa bera dubnya be wabnelyek senewoka loka dabnenggubookanya, alda Mesir mok soko lobok. Anya alda lak gomnya nenyek heng yokaʾ bekoka eiyimnaʾ anaso anyek kemeldablemok.

²⁸Dara ganya dib senenaʾ adya, Musa bera sikja yando memab obsilyek aboka, alda Paskah sum meewoka enenga ngikdo yibuk.

²⁹Wera ganya dib senenaʾ adya, Mesir nim ek dara, Aranaʾ mek gwanek ara meka si dusuk bok, Israeli nim ek dara, mek digin hnoum anyek kelerob arob soko eilib enesoʾ anyek yibik.

³⁰Dara ganya dib senenaʾ adya, Yerikho heik lekaʾ ara lika sek badya sum bera seboka bob ganagek dara, soboka maro yinggyuk.

³¹Wera ganya dib senenaʾ adya, Rahab gera salyaʾ dongolomok gel bok, alda mok soko maka hmeil bilirek nang ek perobaʾ leboka doboka doknosukaʾ anasa, yok bleklemek nim eb dara neikaʾ obnenggubsuk.

³²Anya nara hekaʾ ak hnon wenyhenemna do? Anasa nara ban nang enyek, Gideon bek, Barak bek, Simson bek, Yefta bek, Daud bek, Samuel bek, anya ununumnaʾ len nang ek geklewoka lebnesinya dara, wera wenyhenesinya salek enedya nadya yok unuwanasinya nera mek danamso.

³³Dara sikda ban nang era, ganya dib senenaʾ pik uboka, senenggomaʾ wenesin nang edya heik mok soko era malyaʾ geboka, penaʾ amba ununumnaʾ leboka, eleganasin amokaʾ ara doboka, singaʾ gam si bamaʾ leboka,

³⁴senenggomaʾ singalamna uk era saranglemek. Anasa sikda mal uk ab dara mereweekanya, hmeng ulusuknya nera migibaʾ dobeekanya, oldanaʾ ak ab dara, seleb migibaʾ deekanya, yok mok soko nim edya yin bonaʾ era seleb walawoka obyakek.

³⁵Dara nauba nim era, sikja nim era seleb embengaʾ subuka bukuldilimekaʾ anasa, sikda seleb saawoka doro yibik. Bok yok nim ek dara, sikda hyak embengaʾ subnanya perobnya nenyek dobnob senewekaʾ adya, sik nong ara iginaʾ doboka, or pe unaʾ ak dara dobnenggubek.

³⁶Dara hnon nang era derewoka walasik, anya hnon yok nang era henga gouboka saragenaʾ ek sam beillilisik.

³⁷Sikda girik adya olosik, sik nong ara gal erenaʾ adya garalesik, yina mal adya olosik. Sikda domba pam ab, kambing pam bokaʾ adya boksom ok ongowoka dongolomek dara, gwaneng okaʾ ab, weiningdangoka, anya igina nauba dolomek.

³⁸Anasa sokok anera, sikda ubnamenggom. Dara sikda hwalek sam ab, moksoko mein pik ab, girik dam e pik ab, girik lom pik ab mal giriklimek.

³⁹Anya sikda nidyaʾ ara sikja ganya dib senenaʾ ak, laga eilinaʾ ak sam dara, pe ganya mabok bok, alda eleganesin amoknya nera sikda dobnenggubek.

⁴⁰Anasa Imik Neyung ara nusamba dara, hyak perob nongaʾ anyek meewoka beillilisil. Anya nuk orok dara, sikda pe munaʾ pel daknaʾ ak ara binggunuseng.