Read Nalca IBRANI 13 Bible Online

IBRANI 13 - Nalca bible

IBRANI 13

¹Dara, ugunja hemyabo nim ek wanaʾ uldanaʾ ara hyak pe unulululum!

²Dara hnon nim era, yok nim ek, ek yoululum amek dara, sikda elgom bok, wera lero nang ek denaʾ elegemekaʾ anasa, ugunda nimi yok nim ek, ek yanalum aboka perobaʾ lenaʾ ara hiliknenggom mem.

³Wera yok igina dolomak nim ulumak sok, ambabya sikeneblaboka neikaʾ ulumnaʾ anasoʾ ganya enyek boboka, anda sikenek beklesilom. Anya, sik yok nim edya malya nenelesak nim ek, anda sikeneblaboka neikaʾ unulusinaʾ anasoʾ ganya enyek boboka, anda sikenek beklesilom.

⁴Dara ugunda nidyaʾ ara gela nenya doldanaʾ ak ara hyak perobaʾ senewoka imik nenelemnelum. Wera sik salyaʾ dongolomak nim eb, meknewoka salyaʾ salaldalamak nim eb dara, Imik Neyung adya yana lelewanasilaʾ anasa, ugunda gela nenya ara hyak pe uboka mekneldanggom mem.

⁵Dara Imik Neyung yub ara banaso lelemla, ”Nara anak ara hyak mekaʾ dogom ab lobnenggununggenekanya, nara anak ara hyak mekaʾ gwab lobnenggununggen,” wenyalamlaʾ anasa, ugunda rupiah ak nauba dolonun ganya ek ab leiblelulum. Alda ugunuk an ulusilaʾ anyek, eiyasa gigibdangoka ulululum.

⁶Wera anasa, nunda ganya daboka wenyalamabaʾ ara, ”Imik Neyung ara nadyaʾ aranaʾanya ulumla. Anasa nara loka dabnenggulumnamna. Dara nim adya dara, nak ara hekaʾ ak unuwanenyak do?” wenyalamab.

⁷Dara ugunjaʾ dub nang, ugunuk Imik Neyung yuba seleb lel eleklesak nang ek ara beklelulum. Anya sikja unulumakaʾ ak ab lanelamla anyek pe kemelemunukanya, ugunda sikja unulumakaʾ anyek dililda doblelulum.

⁸Anasa, Yesus Kristus ara youmaʾ hnon, wen hnon, eimik hnon, neikaʾ ok sobaʾ ulmorulamla.

⁹Wera ugunda yok beiyik sam ab neknaʾ edya ganya bob neneweisilyek mem. Dara perobnya nera ban, ugunja ganya era wanaʾ uboka eleksinaʾ edya migibaʾ geblesilaʾ anyek hnonok. Alda ban yok-yok denaʾ edya sik ban denaʾ enesa lelemlaʾ sunuwoka gigiwoka delemak nim ek perobaʾ nenenggulusilaʾ anegom.

¹⁰Dara nunda yok uka daboka gibnaʾ oulyanga hnon ulusilekanya, ban e lom enyek an welemak nang era ane lomok ulumlaʾ ara denaʾ mem.

¹¹Anasa yuba wa gakaʾ dubnya bedya pam eneng anyek perob munaʾ oulyangak an malya unaʾ lubsin damba bo weklamlaʾ bok, nong ak dara, beiyik e weilik sam uka dalamak.

¹²Dara Yesus anaba, alja nim era alja yokaʾ nong eneng edya, geisa nenewousununaʾ aboka dara, alda naubaʾ wekna pik beiyik sam igina gwekoka unuwok.

¹³Wera anasa, nunda alja alya daboka derenaʾ anyek dobnobaʾ aboka, alak sam e weilik beiyik binimab.

¹⁴Anasa nunda anyek anara nunda dibaʾ un heik era unggulumla, bok nunda eimik yanamla heik enyek elemab.

¹⁵Al nenesa, nunda Yesus pik uboka, Imik Neyung ak perob aboka gibnaʾ ara, nuk ol nebeldaleng sok unaʾ ara, nunja sibamaʾ edya alja si nek perob aboka sobaʾ giblenob.

¹⁶Anya arabdangoka pe ununaʾ ara, ban ununanya nenyek, Imik Neyung ara perob senelamlaʾ anasa, ugunda yok nim eb arabdangoka pe ununaʾ ara hileknenggom mem.

¹⁷Dara ugunjaʾ dub nang era, ugunuk bo un nang nenebdangoka, sikda ugunjaʾ ganya nong anyek, Imik Neyung kemelesil senewoka, pe keeboka bo ulusakaʾ anasa, ugunda sikenek pe keboka ganya imik doro dillilisululum. Wera ugunda sikenek igina nenewanalum dara, ugunuk perob damok lanawanggunumla anasa, sikda eiya daboka welesinokaʾ aboka, ugunda sikenek pe keboka unulululum.

¹⁸Dara nunda yokaʾ-yokaʾ ak ara hyak pe unya nenyek senelemabaʾ anasa, wera nusamba leboka hyak sobaʾ heng uboka mololomnesulum. Nenera nunda ella ulumabaʾ ara nunjaʾ mek ganya ek dara, hyak pe ulumabaʾ anasa.

¹⁹Anya hyak okoka dara, nara ugunuk men berra aboka saawoka elegeisinokaʾ aboka, nara ugunuk wenewanasinaʾ ara ugunda banera unulumnelumaʾ ak lebna.

²⁰Dara namenaʾ pe unaʾ eleklesil Imik Neyung era, embengaʾ eleganasin amok eneng pik uboka, domba pam senenggom dubnya, nunjaʾ Wenelesilnya Yesus ara somoknaʾ ak ab saawoka bo yoknya bedya,

²¹ugunuk yokaʾ-yokaʾ perobaʾ ak alja senelamlaʾ sunuwoka unulunokaʾ aboka pe munaʾ lelewoka eleklesulul. Anya dara, alja perob senelamlaʾ ara Yesus Kristus pik uboka, nu lomok welesulul. Wera nidyaʾ senenggomaʾ perobaʾ ara al alsamba ok sobaʾ ulmorulul! Aldib, al unululul.

²²Dara ban nadya ugunuk wenewoka beibsin yub era, or burum anasa, hemyabo nim o, nara ugunuk wenewoka wenyhenesinaʾ ara ban yub era hyak ugunja ganya siklewoka kelululum.

²³Hnonda ella ubnelumaʾ ara nunjaʾ hem Timotius bera seleb bok dorogek. Anya wera al men yalyaʾ seleb dara, nara alablaboka neikaʾ ugunuk kemel yanesinim.

²⁴Dara nunja perob aboka gibsabaʾ ara ugunja dub nanga nidyaʾ ak hnon, munaʾ perob nimi nidyaʾ ak hnon wenyhenelum. Anya ban nunjaʾ hemyab Italia sam ab gibsakaʾ ara pe dobnelum.

²⁵Dara wanaʾ uboka perob eleksinaʾ adya ugunuk bo ulusulul.