Read Nalca IBRANI 4 Bible Online

IBRANI 4 - Nalca bible

IBRANI 4

¹Wera anasa, an Imik Neyung adya dek-deka sonaʾ ak weknelum hyokaʾ ara, anam or ululabok anasa, nim ugun gangganek ara ben hnon weknenggublyek anasa, hyak pe diri uldalamnemab.

²Anasa Imik Neyung adyaʾ perob lero yanggan yub era, sikenek leb elegeisik sok, onoʾ nuk anaba leb elegeisik. Bok sikja yuba seleb kebekjok, dib senenaʾ orok anasa, siksamba dara, Imik Neyung yub ara perobaʾ danggubuk.

³Bok nu wen an Imik Neyung ak dib senelemab nim era, ban dek-deka sobnelum wenyhesukaʾ ara, dolomab. Ban unulumabaʾ ara, al Imik Neyung adya ban lebok sok, Nara yu ganya boboka waboka laga dib unuwanasin hesaʾ ara, ”Nadya deregoka pe dek-deka soboka ulumnaʾ ak ara, sikda hyak weknenggunumak,” hyokaʾ ara sunuwoka nuk unulamla. Imik Neyung ara anaso wenhyok bok, alda alja wa nera, soko anam uyiwok salek enyek moruwoka seleb webdakok.

⁴Sek sum mem sum emba dara, Imik Neyung yub ek ara, ”Imik Neyung ara, welemokaʾ wa nidyaʾ ak ab, sek sum mem sum era, dek-deka somok,” wenyaro momnya dobok.

⁵Anya ban yub enyek an nunda einilimabaʾ ara, ”Nadya deregoka pe dek-deka soboka ulumnaʾ ak ara, sikda hyak weknenggunumak,” wenyaro webok.

⁶Perob yuba men kemek nim era, keboka pe ununaʾ orok adya, dek-deka sonaʾ ak ara, gigiwoka dobnenggubek. Wera anasa laga geknelamlaʾ ara, nimi hnon yok nim ek lunuwoka anyek an wekel binimak.

⁷Anasa leboka, Imik Neyung ara, yok sum hnon meewokaʾ ara, ”Ban sumen,” hyok. Dara onoʾ eimik gibnaʾ gong lemok bok, Daud be pik uboka, Imik Neyung adya laga unuwanasin aboka lebokaʾ ara, ”Ugunda sumen, Imik Neyung yuba kebmunjok dara, onoʾ saawoka gasa ganya bonggom mem,” hyok.

⁸Yosua bedya Musa be lunuwoka sikda dek-deka sonaʾ ak seleb bo wekesisobok dara, Imik Neyung ara, onoʾ eimik enyek yok sum ek henggunumso.

⁹Wera anasa Imik Neyung adya nim amba dara, yok dek-deka son sum, nera an sek sum ulumla.

¹⁰Anasa, heknedya Imik Neyung adya dek-deka sonaʾ ak seleb wekelenya bera, alda neik so, Imik Neyung ara alja wa nek ab dek-deka somok sok, albabya alja wa nek ab dek-deka solomla.

¹¹Men nim edya keboka pe unaʾ orok adya sikda malyinggilimek sok, numba ben hnon unuwalyek aboka, Imik Neyung adya dek-deka sonaʾ ak weknobaʾ aboka, perob so pik era sobaʾ duboka elemnemab.

¹²Imik Neyung yub ara, embengaʾ ab, migibaʾ ab, yok-yok mal si nek ab dara, hyak yu nongaʾ ak ulumla. Imik Neyung yub ara, nimi nong ab, nimi ganya ab, lomok wekoka bokol meneklamla, onoʾ yok ab, nolonggwerenaʾ ab, ana lomok anaba bokol meneklamla. Anya, nimi ganya seininaʾ ab, unuwesinya ganya eb danaba, yok-yok nenewoka ella ulumla.

¹³Imik Neyung adya henga kemenaʾ ak ab dara, yokaʾ nidyaʾ hnon goʾ pe doknowamenggom. Alda yana lelewanasil dara, nara anasa unumsa aboka laga lebnemabnya bek, yokaʾ-yokaʾ nidyaʾ ara, nong baneng laga ok ulumla.

¹⁴Anasa wera, Imik Neyung saramek sam seleb byuknya, Imik Neyung bedya me Yesus ara, nunja senenggom yuba wa gakaʾ dubnya nunsamba ulusilaʾ anasa, nunda Imik Neyung yuba dib dobab amoubaʾ ak pe salabmouboka diri ubdanob.

¹⁵Nunja senenggom yuba wa gakaʾ dubnya bera, alda nuk an igina kweboka malya nenelesilaʾ ara, alda elgom uboka, alba ununaʾ oroknya bek unggulumla. Bok, albabya numba ulusil sok, seleb bisaʾ adya sunubyaawoka uboknya bok, alda malya unaʾ ak hnonok mekaʾ oroknya bek ulumla!

¹⁶Wera anasa, nunda alja araweisiso senelamab salek era, angoo yadyek senewoka arasinaʾ ab, wanaʾ uboka eleksinaʾ ab, dobnobaʾ aboka, Imik Neyung nunja aralesilnya bek ara, asaʾ ganya boboka, aljaʾ perob eleksinaʾ saramek sam ara balanob.