Read Nalca IBRANI 7 Bible Online

IBRANI 7 - Nalca bible

IBRANI 7

¹Melkisedek bera Salem moka dubnya uboka, Imik Neyung hyak imik ululanya bedya yuba wa gaknya ulumok. Abraham bera yok-yok soko dub nang ek oblamagoka yanggok dara, wera Melkisedek bedya pika diboka ouma demok.

²Dara Abraham bera mal oldalamekaʾ ak ab alawoka domok bonaʾ era, sagonya hnon bokoka Melkisedek bek elegemok. (Melkisedek an si nera men dara, ”Jong unaʾ dubnya,” dara onoʾ Salem heikek dubnya ulumokaʾ anasa, wera alja si nera hnonda, ”Pe namen unaʾ dubnya,” alamek.)

³Wera Melkisedek bemba dara, alda neyung genong ara hnon unggulurek, hnonda al nang yilaʾ si oroknya, alda anyek anyeb beiyimekaʾ ara, onoʾ anyagan somogok anaʾ anaba orok. Alda Imik Neyung bedya me Yesus anaso uboka, alda senenggom yuba wa gaknya ulumla.

⁴Anasa wera, Melkisedek bera senenggomnya ulumokaʾ anyek seiniwolulum. Alda hyak senenggom dubnya ulumokaʾ adya, nunjaʾ neyung yabo sikjaʾ neyung Abraham bera, mal ak ab domok bonaʾ era hnon sagonya nera bokoka alak elegemok.

⁵Yahudi nim edyaʾ unuwanalum an yub ek ara, Lewi nang yilaʾ ok yuba wa gak nang uboka, neik nang yilaʾ Abraham nang yilaʾ bok, sikjaʾ hemyab Israeli nang ek ab, sagonya bolowoka dolomnemak aboka lebgogomok.

⁶Melkisedek bera, alda Lewi nang yilaʾ unaʾ orok bok, mal ak ab bonaʾ sagonya nera, Abraham bedya bokoka elegemok dara, wera soruk ak ab domok, dara onoʾ Abraham bera Imik Neyung adya perobaʾ eleganenggen amoknya bek, perobaʾ danenggel aboka ouma debok.

⁷Nimi nidyaʾ benera perobaʾ danamla aboka ouma debnaʾ ara, imik ululanya bedya meksonya bek unulumak ara, sondaʾ lebnenggunuseng!

⁸Youmaʾ yuba wa gak nang uboka sagonya Imik Neyung eleganaʾ bo bololomek nang era, nimi sirikaʾ ak adya hmenga dangoka somoklomek. Bok Imik Neyung yuba momnya dobokaʾ ara, Melkisedek be Abraham bek ab sagonya eleknaʾ dobok alalanya bera, embengaʾ ulumla.

⁹Lewi nang yilaʾ yuba wa gak nang ulumekaʾ anaba, Israeli nim edya sagonya beillilemekaʾ dolomek bok, Abraham bedya Melkisedek bek sagonya hnon elegel yabok sum era, Lewi nang lunuwoka elekleng so ubok henesibyaʾ anaba dib lebnesibya.

¹⁰Nera Lewi bera anam beilinaʾ orok bok, al nang yilaʾ sikjaʾ neyung Abraham benyek, Melkisedek beb yuba sabdangoka sagonya elegok sum era, Lewi beneba Abraham bedyaʾ nong ok an seleb ulumokaʾ ak ulumla henesibya.

¹¹Lewi nang yilaʾ yuba wa gak nang ulumek sum enyek, sik pik uboka unuwanalum an yub era Israeli nim ek ara, Imik Neyung adya elegosuk. Bok Lewi nang yilaʾ yuba wa gak nang ulumek bok, Imik Neyung wa anyek geisa wa bok pe wel daknenggulumekaʾ anasa leboka, yok yuba wa gaknya, Melkisedek be ulumok sonya benyek, Harun nang yilaʾ ak ab gom, alda yoknya bek elegosuk.

¹²Wera yuba lenaʾ gak nang enyek, Lewi nang yilaʾ ara loboka, yok nang yilaʾ ak daneseng dara, wera Yahudi nim edyaʾ unuwanalum an yub eneba yok danamso.

¹³Ban yokaʾ dok alamlaʾ ara, Nunjaʾ Wenelesilnya Yesus anyek Lewi nang yilaʾ ak ab beibnenggunumek, alda yuba wa gak nang dangoka wenggulumek nang, Yehuda nang yilaʾ ak ab beibnemekaʾ anasa lelemla.

¹⁴Nimi nidyaʾ ella ulumabaʾ ara, nunjaʾ Wenelesilnya Yesus ara, Yehuda nang yilaʾ ak ab beibek. Bok Musa bera yuba wa gak nang lelewoka doboka sekiyiwanamok sum era, Yehuda nang yilaʾ ara, hnon yuba wa gak nang ulumnemak aboka, hnon lebnenggumok.

¹⁵Wera nunja an wenyaro lebab yub era, Melkisedek benesoʾ yok yuba wa gaknya be hnon seleb yok aboka lebnemak dara, wera damoka pe olowoka ella danamab.

¹⁶Wenyok yuba lenaʾ gaknya Yesus ara, alda senenggom yuba wa gaknya nenewokaʾ ara, nim adya unulumak ununaʾ ek sunuwoka yuba gaknya sekiyiwanggubuk bok, alda al nong senenggom dubnya uboka, sidyaʾ somoganamlaʾ ara oroknya bek sekiyiwok.

¹⁷Anasa Imik Neyung yuba bukuk sam lelemla ara, ”Yuba wa gaknya Melkisedek beneso ak ulumok sok, anda yuba wa gaknya hyak sobaʾ ulmorulumnelam,” alamla.

¹⁸Youmaʾ unuwanalum an yuba ulumokaʾ ara dib gomaʾ anyek, migib unaʾ hnon unggulumokaʾ anasa, men yub era seleb weilik sam gebok.

¹⁹Yehudi nim edyaʾ unuwanalum an yub ulumokaʾ adya dara, nimi yokaʾ ak ara, perobaʾ nenewoka geisa nenesinaʾ ara hnon unggulumok. Wera nenesa leboka, wenyek dara, Imik Neyung adya yok perob ganya nebom anaʾ dibaʾ elegosuk adya, wera nunda an pik enyek anyeb uboka, Imik Neyung al berem ara or balamab.

²⁰Nera, Imik Neyung adya perobaʾ eleganesin amoknya nek anyek seiniwoka ubsuk. Yok-yok yuba wa gak nang sekiyiwanasik sum era, hnon anasonya nera, wenyanaʾ orok.

²¹Bok Yesus ak dara, anyek perobaʾ eleganenggen aboka, laga yuba lenaʾ gaknya ulumnelam aboka, Imik Neyung adya sekiyiwok sum enyek, Imik Neyung adya dib unuwanamna hyokaʾ ara, ”Wenelesilnya bedya seleb laga lebokaʾ ara, onoʾ saawoka yoka lebnenggunumla, anda aldib senenggom yuba wa gaknya sobaʾ amba ulumnelam,” hyok.

²²Wera an unuwoka, Yesus nong ara yok eleganesin an yub ek ab dara, beknaʾ unuwanesilaʾ gebdok.

²³Hnonda, yok-yok yuba wa gak nang dara, sikda nauba ulumek bok, sikda somoklomekaʾ adya, sikja welemek wa nera garal lolomek.

²⁴Bok Yesus ak dara, alda embengaʾ sobaʾ ulmorulamlaʾ adya, wera alak Imik Neyung adya, anda yuba wa gaknya ulumnelam aboka elegok wa nera yok nim edya salawanggunuseng.

²⁵Wera anasa, Yesus ara, alda sobaʾ ulmorulamlakanya, bleblesil nim enesa leboka, Imik Neyung ak sobaʾ mololosilaʾ anasa, aldib sobaʾ ulmorulamlaʾ adya, nim Imik Neyung ak al pik uboka yalamak nim era, hyak gobdo dibaʾ amba bleblesil.

²⁶Anasa wera, yuba wa gakaʾ dubnya bera, banasonya benyek, nunda alak aboka, anera, alda meknenaʾ orokaʾ ak, malya unaʾ sibin ara, alak mekaʾ unaʾ orokaʾ anyek, geisa nongaʾ ok ulumlakanya, malya unaʾ nimi gangganek ara unggululanya, anya imik heikek ara hyak imik ululanya.

²⁷Nimi sirikaʾ bok, yuba wa gakaʾ dubnya bedya, sikja youmaʾ unumna malya unaʾ enesa, pam oboka uka dabnekanya, an nen seleb dara, onoʾ yok nimi malya unaʾ amba unulumek. Bok Yesus ara anaso gom. Alda al nonga beibdangoka somogokaʾ ara, li hnonok bok hyak sobaʾ dib nong amba munaʾ gobdo somogok.

²⁸Yahudi nim edyaʾ unuwanalum an yub edya dara, malya unaʾ hwam nim enyek, yuba wa gakaʾ dub nang ulumnelum aboka sekillilisuk. Bok eimik era, Yahudi nim emba unuwanalum an yub ek ab dara, Imik Neyung ara, alja me Yesus anyek, nimi blebsinaʾ dubnya ulumnamla bar aboka, Yesus ara senenggom yuba wa gaknya sobaʾ ulmorulumnamla bar aboka, laga unuwanamna aboka hyak munaʾ gobdo pe sekiyiwok.