Read Nalca IBRANI 8 Bible Online

IBRANI 8 - Nalca bible

IBRANI 8

¹Anyagan nidyaʾ lelewoka lebab yuba damok ara, nunjaʾ yuba wa gakaʾ dubnya ulusilnya bera, alda Imik Neyung imik senenggomaʾ ululanya alja sirik ek sam bulumla.

²Al Yesus ara senenggom yuba wa gaknya dangoka, nim adya sorob e nek gom, alda Imik Neyung adya albeyok sobokaʾ dib nongaʾ ek sam, alak elegok wa nera welemla.

³Nimi yuba wa gakaʾ dubnya ulumnaʾ ara, yokaʾ-yokaʾ Imik Neyung ak bo beil biniboka, uka daboka giblimnamla aboka sekillilisak. Anasonya neikek, nunjaʾ yuba wa gakaʾ dubnya Yesus anaba, yokaʾ hnon Imik Neyung ak beiyiwoka eleganamso.

⁴Yahudi nim emba unuwanalum an yub ek sam lelemlaʾ yuba sunuwoka, seleb welemak nang edya Imik Neyung ak ara yokaʾ-yokaʾ uka daboka memelemakaʾ anasa, Yesus ara sokok an anam ulumso dara, alda senenggom yuba wa gaknya danggunumso.

⁵Yuba wa gak nang edya welemek Imik Neyung wa nera, imik heikek sam ulumla wa nenesa, sununaʾ dibaʾ ak welemak. Dara, yuba damok enera, Musa bedya pam bokaʾ e sobnunaʾ aboka ul yabok sum enyek, Imik Neyung adya Musa bek ara, ”Anda pe beknelam! Anja nidyaʾ unuwanalamaʾ ara, Sinai meinik ab nadya anaso-anaso unuwanalam aboka nekenggesa sok pe unuwanalam,” hyokaʾ ara ban nenesa lebok.

⁶Imik Neyung adya nim ab dibaʾ wenyabdab an yub era, wen lelelanya nera pe lebokaʾ adya, hyak pelemlaʾ anasa, neik so Yesus ara alda hyak senenggomaʾ perob wa nenyek, youmaʾ yuba wa gak nang edya welemek wa nenesoʾ ak gom, alda hyak perobaʾ anyek welemla.

⁷Nera men Yahudi nim ek, Imik Neyung adya unuwanalum an yub elegesukaʾ ara, perobaʾ ok ulumso dara, eimik onoʾ saawoka penenya hnon unuwanalum an yub era eleganggunususo.

⁸Bok Imik Neyung adya alja mab era hnon penggulumekaʾ ak eibukaʾ anasa, alda lebokja, ”Nara Israeli sokok nim eb, Yehuda sokok nim eb, sikeneb dibaʾ wenyok wenyaldan yub era yanamla salek hnon yenewanamlaʾ ara, ugunda pe beklemnelum!

⁹Nadya Israeli nimi Mesir sokok abaʾ ara bleboka nadya soruk adya bo yabalamsa sum ek nab sikeneb dibaʾ wenyabdouba yub enesoʾ ak gom, alda yok wenyek perobnya nek eleganesin. Nadya anaso unubdanamab an yub elegesisa bok, sikda pe bojam salawoka ununaʾ orok anasa, nadya sikda malya deija aboka gwab lobsisa.

¹⁰Ban wenyhesa salek en seleb dara, ban wenyek Israeli nim eb wenyaldanaʾ yub eleganesin. Nadyaʾ anaso unubdanamab an yub era, sikjaʾ ganya seininaʾ ak doronggoka, momnya dobnesin. Dara na nong ara, sikjaʾ Imik Neyung danamna dara, sik nong ara nadya mabo yokaʾ danamak.

¹¹Sikda nidyaʾ meknya naubenya nak seleb ella ulumnenyakaʾ anasa, sikja dara, sik moumen gom, sikjaʾ hemyab ek gom, Wenelesilnya Imik Neyung bek ella danalum aboka nekdanggunumak.

¹²Nara sikja malya unaʾ nidyaʾ hyak gerewoka meewanasilikanya, sikja malya unaʾ ek ara, seiniwanggunumna,” wenyaboka lebok.

¹³Imik Neyung adya unuwanalum an yuba wen eleganesin alamlaʾ adya, youmaʾ men elegesuknya nera dolbaleka dok. Anya, an dolbaleka dangalalanya yamennya nera, denghenemla salek era, oka danggiga balamla.