Read Nalca IBRANI 9 Bible Online

IBRANI 9 - Nalca bible

IBRANI 9

¹Imik Neyung adya Israeli nim ek anaso unuwanalum an yuba elegosukaʾ ara, anaso unura giblelulum aboka lemoknya hnon, soruk adya solomek gibnaʾ e nek hnon, ulumok.

²Wera Imik Neyung amba pam bokaʾ e aboka solomekaʾ ara, men lomok ekla ak ara, geisa nong ekla alamekaʾ ak ulumok. Wera ekla enyek anara, wesaʾ dinin oulyanga hnon ulumok dara, onoʾ Imik Neyung ak eleklemek roti gwanenga beilinaʾ yanganaʾ gal ab, mem roti gwaneng ab hnon ulumok.

³Dara onoʾ weilik sam yok ekla hnon ara, penenya lelin akleng weilik ara, hyak geisa nong ekla alamek ekla ek ulumok.

⁴Wera ekla en lomok sam ara, Imik Neyung amba yokaʾ-yokaʾ uka dalamek oulyang ak hnon, onoʾ anaso unubdanamab an yuba beilin golongaʾ ara, penya-penya emas girik bokaʾ adya denewoka meemek. Dara, golongaʾ en lomok ara, mouk dum-dumaʾ gwaneng mekaʾ ara emas mek hmeiyek libenggoka hnon, Harun bedyaʾ hmouka siligemok gamaʾ dungunaʾ hnon, sagobadya orukoka unuwanalum an yuba girik lagasa penya momnya dorobaʾ anyek beillilemek.

⁵Dara onoʾ golongnaʾ dameijek ara, lero ola sangablorob sununaʾ gabo penya, Imik Neyung ara anyagan yanggalamla an beknaʾ hnon ulumok. Wera golongaʾ dameijek sam an lero ola sangablorob sununaʾ penya ulumokaʾ ara, nim adya malya unaʾ doboka boloksin danasa golongnaʾ ibnaʾ goulunaʾ ak ulumok. Bok ban nidyaʾ ulumokaʾ amba dara damok ara, anasoʾ ak ulumok aboka dara, wenyek lelewoka neknenggunusab.

⁶Nidyaʾ ara anaso unulumnulum aboka orowek meewoka beibuk. Dara, lika sob-sobaʾ ara yuba wa gak nang era, e nenyek men ekla ak an, Imik Neyung ak gibnobaʾ aboka dara, wekoka yokaʾ-yokaʾ beiyiwoka giblemek.

⁷Hyak geisa nong ekla ara, yuba wa gakaʾ dubnya ok weklemok. Wera ekla enyek ara gibnaʾ hnonok amba, lika hnonok wekoka Imik Neyung ak giblemok. Ban unulumokaʾ ara, pam oboka eneng ab boboka, aljaʾ malya unaʾ emba hnon, onoʾ yok nim edya orowek senewanggonggom malya ulumek malya unaʾ doboka bobogosululaʾ aboka, Imik Neyung ak bo beil biniboka giboka uka dalamok.

⁸Wera ban unulumek ununaʾ enedya, Imik Neyung Geisinya adya nim ek neklesukaʾ ara, an Israeli nang edyaʾ Imik Neyung gibnaʾ e nenyek or anam ulumok bok dara, hyak geisa ekla dibaʾ ak sam ban pik era anam baknenggumok.

⁹Ban sununaʾ era nu wen an ulumab salek enesa, beknaʾ dibaʾ ulumlaʾ ara, pam oboka eneng ab yok-yok masa bo beil biniboka giblemekaʾ ara, sik an unuruwaʾ bo beil yalamek nimi ganya lomok ulumok malya unaʾ doboka boloknenggulusuk beknaʾ era an ulumla.

¹⁰Anasa nimi ganya adya, masa denaʾ ab mek ab yokaʾ-yokaʾ adya geisa nenebdanobaʾ aboka unulumek ununaʾ era, or nim ek sam anasa unulumek. Nera unubgiga balamekaʾ ara, gobdo pe memesinaʾ salek dok dara, ban nim ek samnya nera angawok.

¹¹Bok Kristus ara eimik yanamlaʾ perob yub emba, yuba wa gakaʾ dubnya benesoʾ ak seleb yok. Dara, alda luboka son e hyak naubukanya, munaʾ perobnya, nimi soruk adya songgulumaknya, nera an uyiwokaʾ ak ara unggululanya nera, seleb uru yibuk.

¹²Kristus ara hyak geisa nong ekla ak ara, li hnonok wekoknya nedya, nimek bleboka sobaʾ pe ulmorulunokaʾ aboka wekok. Kristus unu weknemok sum era, youmaʾ nimi sirikaʾ adya ulumek sok, kambing yem eneng ab pam eneng ab bo weknenggubuk bok, alda alja eneng enyek bo wekdok.

¹³Nimi meknemnaʾ amba dara, youmaʾ yuba wa gak nang ulumek nang edya dara, yem kambing eneng ab, yem sapi eneng ab, sapi goubenya pam oboka uka damna uk goulum ek malya umna nim ek ngikoka hwelesik. Wera pam eneng ab uka damna uk goulum ab dadya ngiksin enyek, nimi malya umnaʾ ara, geisa nenelesukaʾ ara, an nera nim ek sam amba unulusik bok,

¹⁴hyak nauba ara Kristus eneng ara, nauba so unulusil. Kristus ara, hyak sobaʾ ulumla Geisinya pik uboka, alja nong enyek Imik Neyung ak, mekaʾ diligaʾ orok pam enesoʾ anyek, beibdok. Anedya, Kristus alja eneng edya, nunja ganya salyaʾ hwam ununaʾ ak ab, Imik Neyung embengaʾ ululanya bek giboka welenokaʾ aboka, geisa nenelesil.

¹⁵Wera anasa, men youmaʾ unuwanalum an yub ulumoka wenyek, nimi nauba malya dangoka igina kwelesuknya nek ab blebsununaʾ aboka, Kristus ara somogok. Dara wera, nimi nidyaʾ Imik Neyung adya youboka dolosil nim era, Imik Neyung adyaʾ denghenggunumla bonaʾ eleganesin amokaʾ anyek dobnokaʾ aboka, Kristus ara, wenyok unubdanamab yub ek nu an ulumab nim eb danasa hnoumunga wiknenanya ulumla.

¹⁶Nimi misaʾ donaʾ amba weblemakaʾ ara, webenanya be somokan enyek, misaʾ eleklemakaʾ anasa, bonaʾ yokaʾ-yokaʾ anyek somogoknya bedya misaʾ lobongganyok alamak dara, wera somogenanya bedya, aldib somogok an, beknaʾ laga ululul, alamak. Alda bonaʾ lolonglesilnya benyek anam embengaʾ ulunabok dara, nimi misaʾ eleknenggulumak.

¹⁸Wera anasa, men unuwanalum an yub ulumokaʾ anaba, eneng adya ok unulumek.

¹⁹Men dara, Imik Neyung adya unuwanalum an yub era, Musa bedya Israeli nim ek leb elegosuk. Wera yuba seleb elegosuk dara, onoʾ eimik era, sapi me eneng ab yem kambing eneng ab mek sirikaʾ ab neikaʾ hiboka, domba pam aranaʾ hong ab, gal benggenaʾ doboka, Imik Neyung adya unuwanalum an yuba kerob bukuk sam hnon, Israeli nim ek hnon, lobsenjaʾ adya lob goulura yibisuk.

²⁰Ban unulumok ok ab dara, Musa bedya lebokaʾ ara, ”Imik Neyung adya unuwanalum an yub elegeisilaʾ ara, hyak unulumnulum aboka, orugosuknya nenyek beknaʾ eneng ara an,” hyok.

²¹Dara onoʾ Musa bedya Imik Neyung e ab, nidyaʾ anyagan Imik Neyung gibna danasa beillilemek bonaʾ eb, eneng lobsenjaʾ adya ok lob goulura yibok.

²²Yahudi nim edyaʾ unuwanalum an yub edya dara, yokaʾ-yokaʾ nidyaʾ ara eneng adya ok malya umnaʾ ara geisa nenelemok. Dara, malya unaʾ anaba al eneng nong anyek yeknaʾ orok dara, malya unaʾ ara memenggulusuk.

²³Wera sokok an ulumla bonaʾ era imik heikeknya nenesa sununaʾ ulumlaʾ ak anaso unulumek bok, imik heikek sam dibnya ululanya nenyek, Yesus enenga perobaʾ dib nongaʾ adya geisa nenemok.

²⁴Anasa Kristus ara, nim adya munaʾ solomekaʾ dibaʾ imik heikek ulumoknya sununaʾ amba solomeknya nek weknenggubuk bok, alda imik heikek Imik Neyung ak nuk pen danasa, wekel byuk.

²⁵Yahudi nim edyaʾ yuba wa gakaʾ dubnya bera, gibnaʾ ellaʾ gigiro hyak geisa nong ekla ak ara, pam oboka enenga bobnekanya lika sobaʾ weklemek sok, Kristus ak dara, al nong ara malya unaʾ amba li sobaʾ saam-saam aboka giboka beildal banggulumla.

²⁶Kristus anyek sobaʾ saam-saam aboka beildal balamso dara, wera soko anam uyiwoka wek mouruwoka liga gong somokdibigemnamso. Bok wenera alda lika hnonok munaʾ gobdo malya unaʾ amba aboka, al nong anyek wene salek era dib somogok.

²⁷Imik Neyung adya nim ara lika hnonok somoganamlaʾ seleb dara, eimik yana lelewanamna aboka seleb orowek garawok.

²⁸Anasonya neikek Kristus ara nimi nauba sikja malya unaʾ doboka bobogousululaʾ aboka lika hnonok elekdangoka somogok. Wera sumen penenya yanalanya nera, malya unaʾ amba meewoununaʾ aboka yanggunumla, alda nim alak yanamlaʾ amba diri ulumak nim enyek dib blebsinaʾ bo yanamla.