Read Nalca YAKOBUS 2 Bible Online

YAKOBUS 2 - Nalca bible

YAKOBUS 2

¹Nadya hemyab o! Ugunda senenggomaʾ Wenelesilnya Yesus Kristus bek, dib senelelum nim ululumaʾ anasa, nimi hogung ak keeboka webeldanaʾ ara mem.

²Anasa wera, nimi bonaʾ dubnya ben hnon, hyak perob nong boksom enyek ongowoka, soubna damaʾ perobaʾ anyek doronggoka, Yahudi nim edya yuba don e asomaʾ ak yaso bok, onoʾ al neikek ara, nimi hnon malya uboka gweldekdo yabalamso akleng enyek ongowoka yaso dara,

³ban perob boksom ongo yasonya benyek eiyiwoka, onoʾ ugunja dara, ”Neyung ban perob ekla bunaʾ ak an buklom,” henesom bok, bonaʾ garanya bek dara, ”Banyagono seklom” gom, ”Or esonaʾ ak an salyaʾ buklom” gom, henesom dara,

⁴wera ban unululumnya nedya, ugunja malya ganya seiniwoka bera malya senewoka, nimi yilaʾ yana lebdangoka webeldalalum.

⁵Nadya wanaʾ ulusin nim o! Ugunda banyek seiniwanalum. Sokok an bonaʾ garana ulumak nim era, yuba dib senenaʾ dub nim ulunokaʾ aboka, Imik Neyung adya weboka dolosil. Imik Neyung adya alak wanaʾ ulumak nim emba lesuk yuba sunuwoka, Imik Neyung alja mabo silibaʾ yokaʾ nenelesil.

⁶Dub nimi nong adya ugunuk digam-gamaʾ neneweisinikanya, nimi yana lelesin ek sam bo balasak nang era, an ulumak bok, ugunja dara nim era loboka, bonaʾ garan nim ek malya geboka derelelum.

⁷Ban bonaʾ dub nimi nong edya danyek, Imik Neyung ak ab, ugunja perob si dolumaʾ ara malya nenelemak nim era an.

⁸Ugunja jongnya nenyek nim ek unulumun dara, wera nera ugunda unuwanalum an yuba momnya dobokaʾ ara, ”Andamnya wanaʾ uldalalam sok, an kabo nim ek wanaʾ ululom,” hyok yub ek sunuwoka unuro perob ok unululumaʾ ara an.

⁹Bok ugunda nimi yilaʾ yana leboka weblelum dara, wera nera hyak malya ululumukanya, onoʾ Imik Neyung adya dara, ban unuweija nim era, unuwanalum an yuba bleklemak nim era an hyoknya nek anara unululum.

¹⁰Nimi hnon Imik Neyung adya unuwanalum an yub nidyaʾ ak pe keboka unulamla bok, sirik hnonok bleklamla dara, wera bera Imik Neyung adya nidyaʾ momnya dobok yub ek bleklamla.

¹¹Dara onoʾ Imik Neyung adya lebokja, ”Gela salanaʾ ara mem,” wenhyoknya bedya onoʾ hnon, ”Nim onaʾ mem,” hyok. Anasa wera, ugunda gela salanaʾ loboka, nim ak dibaʾ ololum dara, wera neneba unuwanalum an yub ak blekna nang ululumaʾ ara an.

¹²Imik Neyung adya eimik nimi bleblesilaʾ sunuwoka yana lelewanasil nimi geknebaʾ uboka, ugunda unuwanalum an yuba saboka yokaʾ-yokaʾ unululum e.

¹³Anasa wera, Imik Neyung ara nim angoo yadyek senen ganya orok bok yana lelelemak nang ek, albabya angoo yadyek senenaʾ loboka yana lelewanesil. Angoo yadyek senewoka arasinaʾ ara hyak migib nong ak ululabok, nimi yana lelenaʾ ak dara, or mek so ak ulumla.

¹⁴Nadya hemyabo nim o! Nimi ben hnon alja unulamlaʾ nidyaʾ ara pe ununaʾ orokjok, ”Nara Imik Neyung yuba donya,” henemso dara, nera perob danamso de? Ban unub menegoka dib senenanya nenedya dara al nonga blebnamso de?

¹⁵Ugun gangganek ara, nenya gom, gel gom ongon akleng eneba gobdo garan ulusodya ok, onoʾ denaʾ anaba hyak sobaʾ okaʾ bulumso dara,

¹⁶ugunda alak lebnesomja, ”Anda pob akleng ongowoka, wera or del yabalom,” wenyhenesom bok, arawanggunusom dara, perob de?

¹⁷Anasonya neikek Imik Neyung yuba dib senenaʾ ak sam ara neneso ulumla, yuba anaso lelemlaʾ anasa, nab anaso seiniwonun senenaʾ orok dara, yuba dib senelemabaʾ ara salyaʾ lelem dangalamla.

¹⁸Ugunja hnon lebnesomja, ”Nimi hnonda yuba dib senenaʾ ak sam ganya diboka ulumak dara, nimi hnonda pe ununaʾ ak sam ganya diboka ulumak.” Nadya ugunuk lebnesinaʾ ara, ”Nimi hnon pe ununaʾ orokjok, yuba dib senelemakaʾ anyek, nak an aawonululum, dara onoʾ nadya nong unaʾ edya ugunuk yuba dib senelamnaʾ ara aawanasin,” henemso.

¹⁹Ugunda Imik Neyung ara al hnonok ulumla senewoka dib senelelum gom? Nera onoʾ bisaʾ anaba alba dib senewoka, lok anasa ber-ber alamla.

²⁰Ugunda hyak dongdang anaʾ hwam nim ek ululum! Ugunja dara nimi yuba dib senenaʾ orokjok, pe ununaʾ ok unulumak anyek nuk aaweisiseng senelelum de?

²¹Ugunda nunjaʾ neyung Abraham benyek pe kendululum. Alak Imik Neyung adya perobaʾ leboka domokaʾ ara, alja me Isak benyek Imik Neyung amba gibnaʾ oulyang ak uka dalbilimokaʾ amba leboka, alak perobaʾ leboka doro beiyimok.

²²Nunda pe ulumnemab aboka dara, nunja dib senelemabaʾ anyek beknaʾ dolulaʾ aboka dara, wera nunja perob nong un unaʾ enyek, pe laga unulunob.

²³Ban nen unuwanamabnya nera ban yub en momnya dobokaʾ ara, ”Abraham bera Imik Neyung ak dib senewoka, alja ganya golumokaʾ amba leboka, alda Imik Neyung adya perobaʾ neniyiwok.” Ban nenesa leboka, ”Abraham bera Imik Neyung al kabo,” alamek.

²⁴Banyeganyeb danyek, wera nunda ella dab, Imik Neyung adya nim ek perobaʾ leboka doro dilillesilaʾ ara, yuba dib senewoka ganya oloknaʾ adya ok gom, alda yuba dib senewoka pe ununaʾ nong adya hnon perob senelesil.

²⁵Hnonda salyaʾ nang edya bolowoka salalemek gel Rahab gek hnon pemokaʾ anyek ugunda pe kendululum. Alda Imik Neyung ara pe unumokaʾ damok ara, nim Israeli nim edya bokol bisik nanga Kanaan mok soko gelelenga henga kemel bek sum enyek, alja ek sam doro diyiwoka bo masukaʾ ara, yok pik bo bogol bilisukaʾ amba leboka pe unumok.

²⁶Anasonya neikek, nimi nong ara ganya orok dara, wera seleb somogamna nong ek ulumla sok, yuba dib senenaʾ ara pe ununaʾ orok dara, wera seleb somoklamla yuba dib senenaʾ era an.