Read Nalca YAKOBUS 3 Bible Online

YAKOBUS 3 - Nalca bible

YAKOBUS 3

¹Na kabo nim o! Ugunda banyek ella danalum, yok nim era or mek so bok, nunda neksin nang dangalamab nang enyek, eimik era hyak gasaʾ anyek nauba yana lelewanasil bok anasa, nauba neksin nang danamab senenaʾ ara mem.

²Nunda nidyaʾ, hnon sum era malya ulumab. Bok alda yuba sanaʾ adya malya unaʾ hnon unggululanya bera, alda pe ganya kaboka ulumlakanya, al nonga nidyaʾ pe diri uldalamnamso.

³Nunda nim abaksin pama sibamaʾ ak henga darawoka noblemab dara, nera wera pama pika yibinamlyaʾ ara, nunja unuwolul senemeibinya nenyek gigiwolulaʾ aboka uboka, wera onoʾ anadya pam en nonga nidyaʾ sam samallilimab.

⁴Hnon sununaʾ ara, mek ekla bunaʾ ak sunuwanamab. Mek ekla bunaʾ ara, hyak senenggom nongaʾ uboka, kaboʾ nonga doroklamlaʾ adya bo yabalamla bok, glililanya bedya unuwolul senewanaʾ sunuwoka, mek ururanaʾ me nedya poweklamna enyek beiliwoka bo yabalamla.

⁵Anasonya neikek, nunja silyum eneba, silyum ara, mek bok, alda senenggomaʾ neneldalamla. Onoʾ, ugunda gal donggal ara hyak senenggom bokaʾ anyek, uka mekaʾ me adya singiwoka dengaboka delemlaʾ anyek, ugunda seiniwolulum.

⁶Silyum anaba, uka desin heikek ulumla. Nunjaʾ nong ok ara, silyum adya nong me nidyaʾ malya damoka doluwoka boklamla. Bisaʾ heikek ab uk edya, nunjaʾ nong unaʾ nidyaʾ ara uka dinilesil.

⁷Yokaʾ-yokaʾ nidyaʾ yu hwamaʾ ebeklamlaʾ ab, wining ab, sokok belega yabalamlaʾ ab, hadyaʾ ab dara, nim adya namenaʾ nenelemak, hnonda seleb namenaʾ nenemek.

⁸Bok silyum ak dara, nimi soko nim edya namena gebnenggunuseng. Silyum ara, gasa siklewamenggom uboka, nimi somoknaʾ yu meka wekdeknewoka, malya unaʾ hwamaʾ ak ulumla.

⁹Silyum ara, nunja dara Imik Neyung ak nunja neyung perob aboka giblemab bok, hnonda onoʾ Imik Neyung adya alja nonga sunuwoka uyimok nimi, nunjaʾ hemyab ek weme lelemab.

¹⁰Neik silyum ak ab, Imik Neyung ak perob aboka gibnaʾ hnon lanalamla dara, onoʾ nunja hemyab ek weme len yuba lanalamla. Kabo nim o, ban ara hyak mem!

¹¹Neik mek luk ab perob mek eb, sik mek eb goublamla de?

¹²Na kabo nim o, ara gal edya dara, Zaitun gal dok mouboka, onoʾ anggur gal edya dara, ara gal dok moubnamso de? Orok! Onoʾ sik mek luk ab dara, perob meka gobnenggunumso.

¹³Nimi ben hnon ugun gangganek ara, heknya ek geremseng uboka pe ella ulumla do? Wera unululanya geknebaʾ alda geremseng uboka, ganya sokok nenebdangoka, perob nong unaʾ adya laga amalelul.

¹⁴Bok ugunda hman ganya boboka, ganya oka debdangoka, yok nim era malya so bok nanokok pewonulul senen ganya bolomun dara, wera perob dib unaʾ yub powegoka dangab menegoka, nonggo abdangoka geremseng ulumna senenaʾ ara mem.

¹⁵Ban lebna geremseng unaʾ era, imik heikek ab yangganggululabok, alda sokok ab hnon, bisaʾ ak ab hnon, nimi ganya dukaʾ adya lanalamla.

¹⁶Solom ganya boboka hmabaʾ ganya uboka, nanokok pewonulul senen ulumak ak sam ara, onoʾ yok-yok malya unaʾ mandebnaʾ ab, nauba malya neneldanaʾ ab ulumla.

¹⁷Bok imik heikek ab yalamla geremseng unaʾ era, men nong ara alda geisa ganya boboka ulumla, anya onoʾ yok nim ek heknaʾ ganya boboka ulumlakanya, hekom aboka, pe yuba kebdangoka ulumla. Alda angoo yadyek senewoka arawoka, perobnya nok pe unuro balamla. Alda sene or-or unaʾ loboka hnonok ok sam ok ganya kwenggulumla.

¹⁸Ek nang nenelesak nim ek ab, namen unaʾ damoka melemakaʾ adya, perob unaʾ dolomak.