Read Nalca YAKOBUS 5 Bible Online

YAKOBUS 5 - Nalca bible

YAKOBUS 5

¹Na kabo nim bonaʾ dub nim o! Nadya ban wenewanasinaʾ anyek pe keblululum. Ugunda nauba ngolugoka engewanalumaʾ anasa, wera ngolugoka engelelulum!

²Ugunja bonaʾ dara seleb songa leboka blolosil. Ugunja akleng era seleb bolbolaʾ delesil.

³Ugunja meilik eb dangman ab dara, seleb mura bongolamla; wera mura bongonaʾ nong adya ugunuk malya nenewanasilikanya, eimik era uk anasoʾ adya ugunja nonga nidyaʾ dengaboka denesil. Ugunda sidyaʾ daknamla sum enesa aboka, bonaʾ ara nauba bolowoka beillilelum.

⁴Kendululum! Ugunja wak sam wa welesak nang emba dara, deknaʾ deknenggululumaʾ adya, wera sikja ugunuk omoma leboka yo yablesak. Ugunja gwanenga yongowoka mamaklesak nim edya deknenggulusak aboka araweisilom aboka bii aboka lelemak yub era, imik ululanya Imik Neyung bedyaʾ ok sam seleb balamla.

⁵Ugunda hyak unuruwaʾ garan orokaʾ anyek, pero-pero senenanya loboka, sokok an ulumlaʾ nidyaʾ damoka lelewoka dero dakdowolum. Ugunda youbnamna pam enesoʾ ak ugun damnya weildalalum.

⁶Nimi nidyaʾ malya unaʾ orok nim ek, ugunja henga geregoka ololum bok, sikja dara ugunuk ara hnon kemel samasinaʾ orok.

⁷Wera anasa, nadyaʾ hemyab o, ugunda ganya siklewoka ulumunaʾ moruwoka Imik Neyung yanamla. Nimi wa weboka melelanya bera, wa weboka meb lomnaʾ ara moka yeiniboka nong ubna dara doboka delemlaʾ amba diri ulumlaʾ anyek, ugunda sunuwoka kendululum. Dara bera alda siklewoka ulumnaʾ ara, esaʾ uruklamla salek hnon, nong ulumna salek hnon diri ulumla.

⁸Imik Neyung yanggan salek era, oka dalaʾ anasa, ugunda hnon ugunja ganya hwiboka ganya siklewoka pe diri ulululum.

⁹Imik Neyung adya ugunuk henga geregoka obsilyek anasa, ugun moumen malya nenebdangoka, youmburaʾ debdangoka uldanaʾ ara mem. Nimi yan lelesinaʾanya bera seleb younunaʾ aboka gegelamla bok anasa, ugunda pe beknelum!

¹⁰Na kabo nim o, youmaʾ Wenelesilnya si anasa leboka ununumnaʾ lelemek nang era, sikda nauba igina kweboka gwekoka, ganya siklewoka ulumekaʾ anyek, ugumba diliwanalum.

¹¹Sikda pe ulumek alamakaʾ ara, ganya siklewoka heiboka ulumeknya nenesa lelemak. Ayub bedya ganya siklewoka ulumok enyek, eimik era Imik Neyung adya alak perobaʾ nauba elegemok an yub era, ugunda seleb kelelum. Anasa Imik Neyung ara, hyak angoo yadyek nong senewoka perobnya bek ulumla.

¹²Hyak men mem nongaʾ ara, ugunda im ak si sibuka, soko ak si sibuka, yokaʾ-yokaʾ ak si sibuka laga dib unuwanamna aboka mema lenaʾ ara hyak mem. Imik Neyung adya igina yakaʾ boyiwesilyek anasa, ugunja lebnemunaʾ ara dib dara, ”Yo” hululum, sondaʾ danalyebok dara, ”Orok” hululum.

¹³Ugunda nimi ben hnon alda ganya ebnamla dara, men Imik Neyung ak molowolul. Nimi ben hnon alda perob ganya boblya dara, alda men Imik Neyung ak bera seboka giblelul.

¹⁴Nimi ben hnon neiknaʾ salawanamla dara, alda yuba donaʾ nimi bo ulusak nang ek el bilya enyek, nang enedya alsamba heng uboka molowoka, Wenelesilnya si sibuka ngiknaʾ mek adya ngiknemak.

¹⁵Sikja molowanamakaʾ ara, hyak ganya dib senewoka molowanamak dara, wera Wenelesilnya bedya neiklelenya bera meriyiwoka, alja malya umlyaʾ ara meewanamla.

¹⁶Anasa wera, ugunda merewanalum aboka dara, malya ulumunaʾ ara laga lebdangoka, onoʾ heng uboka mololdalalulum. Imik Neyung ak pelemak nim edya mololesak dara, senenggom migiba lanalamla.

¹⁷Elia bera alba nimi sirikaʾ nun so ulumok bok, alda Imik Neyung ak moka yanggunumla aboka, hyak dib beiliwoka molomok dara, wera gibnaʾ winilya uboka walaʾ hnab badya moka mekaʾ yanggumok.

¹⁸Dara onoʾ eimik danyek, moka or youlul aboka, Imik Neyung ak molomok dara, wera mok yeiniboka masa nidyaʾ ara nong oru yabalamok.

¹⁹Na kabo nim o! Nimi ben hnon ugun gangganek ara, dib yuba pik loboka yok ok sam balalabok, yoknya bedya benyek Imik Neyung ak gliboka bo yanamla dara,

²⁰ugunda ban yub enyek seiniwanalumaʾ ara, Nimi malya unaʾ pik balanabok doboka perobaʾ ak sam beil yalalanya bera, malya ulumna nong unaʾ hnon bleboka, onoʾ somoknaʾ ak ab bleboka dolomlakanya, wera dololanya bedya malya unaʾ nauba doboka boloklamla. Nara Yakobus bedya gibsin e.