Read Nalca 1 PETRUS 2 Bible Online

1 PETRUS 2 - Nalca bible

1 PETRUS 2

¹Anasa wera ban nenesa leboka, ugunuk ab nidyaʾ yu hwamaʾ ara gwiriwoka loblulum. Sondaʾ lenaʾ ab, sene or-or unaʾ ab, hman ganya boldanaʾ ab, yok nimi geklewoka derewoka wanaʾ nidyaʾ ara hyak loblulum.

²Wenelesilnya bera hyak perobnya ulumlaʾ ara, ugumba seleb ella ululumaʾ anasa, ugunda wenyok beibna me neneso uboka, perob geisa moum soub mek enyek desinya senen ganya bololulum. Ban anadya ugunja ganya nebnesilikanya, blebnesil.

⁴Kristus al nong ak dara, nim adya malya girik senewoka lobek bok, Imik Neyung adya dara, perobaʾ leboka weboka domokaʾ embeng un girik ek ulumla. Anasa, ugunda Wenelesilnya bek youmun dara,

⁵ugun nong ak dara, embeng girik gong ek anaso ululumaʾ anasa, ugun nong anyek, Imik Neyung adya doboka perob ganya e solomla. Wera anadya ugun nong ak dara, Imik Neyung amba ok munaʾ gobdo ulumak yuba lenaʾ gak nang anaso uboka, Yesus Kristus pik uboka, Imik Neyung ak giboka perob aboka ganya eleknaʾ eleklelum. Dara, alda ban eleknaʾ enyek perob senelesil.

⁶Nenesa leboka, Imik Neyung yuba momnya donaʾ ak sam ara, ”Nadya hyak perob girik ek weboka dobna, Sion heikek sam men iklemak girik enesoʾ ak beibna. Anasa, alak dib senewanamak nim era, sikenek solom ganya nenewanggunusil,” aro momnya dobok.

⁷Ban girik enera, ugunja alak dib senelelum nim ek dara, deknaʾ nauba girik era an. Bok girik enyek an, dib senenaʾ orok nim emba dara, ban yub enyek lero momnya dobokaʾ gigilamlaʾ ara, ”E sonaʾ nang edya ikoka sobnenggumek girik era, wera hyak gobdo perob girika dok,” aro momnya dobok.

⁸Anya, ”Nimi yok oluka diknaʾ girika dok, hnonda alja yok nim ek malyanggal dilisil girika dok,” hyok. Nimi nidyaʾ oluka diklesilaʾ ara, Imik Neyung yuba nong ak dib senenggulumakaʾ nong adya ulusil. Nenesa leboka, sikda yuba dib senenaʾ orok nim era, ban amba orowek gegewoka beibsuk.

⁹Bok ugun nim enyek dara, seleb orowek Imik Neyung adya weboka dobsuk nim ek ululum. Yuba lenaʾ gak nim ek uboka, geisa sokok nim ek ululum. Imik Neyung amba ok uboka, Imik Neyung alja mabo silibaʾ ululum. Imik Neyung adya ugunuk weboka doboka, gunaʾ lomok abaʾ ara, alja dilinaʾ ak sam yoululum aboka youbusukaʾ ara, alja senenggom ununaʾ enyek ugunja hyak nauba yok nim ek lero yibilulumaʾ aboka anara ubsuk.

¹⁰”Ugunda youmaʾ dara, Imik Neyung mabo silibaʾ unggululum bok, wenyek dara, Imik Neyung alja mabo silibaʾ ululum. Youmaʾ era, angoo yadyek senewoka arasinaʾ orok nim ek ululum bok, wenyek dara, angoo yadyek senewoka arasinaʾ seleb dolum nim ek ululum,” hyok.

¹¹Nadya wanaʾ ulusin hemyabo nim o! Ugun nong ara sekel yanggan nim uboka, salyaʾ soko pik dongol girikna nim ululumaʾ anasa, nimi malya ubsinya ganya bolomakaʾ anyek, nimi ganya lomok sam malya ul eleklesilaʾ anyek, ugumba hnon ununaʾ mem aboka yuba garawoka sekna.

¹²Ugunja nong unaʾ era nimi yuba donggulumak nimi gangganek ara, hyak pe ulululum. Anadya sikja ugunuk ara malya aboka wabnesak bok, ugunja pe ulumunaʾ anyek eibija dara, sikbabya anyek eiyiwoka, Imik Neyung yanamla sum era, Imik Neyung ak gibnemak.

¹³Imik Neyung amba leboka, nimi soko dub nang ulumak nanga nidyaʾ sikja yuba pe keboka unulululum. Nera or mok soko damnya bedya yuba gom,

¹⁴mok soko senenggom dubnya bedya yub ek gom, nera mok soko damnya bedya, malya ulumeija, dara henga gereganesil, pe ulumnemak dara, perobaʾ lelemnesil aboka sekililanya bedya yub eneba pe kelelulum.

¹⁵Anasa Imik Neyung adya ugunuk seinilesilaʾ ara, ugunja perob ununaʾ enedya, dongdang aboka malya yuba saro yabalamak nim edya sibamaʾ era, yuba geleganok senelamla.

¹⁶Ugun nong ara seleb numba yok sekuba nimi geknewaʾ anaso ulululum, bok ugun sekiyiwosukaʾ ak dara, malya unaʾ lomok hnon siklewoka unaʾ ara loboka, Imik Neyung adya wa wen nang beknaʾ ulululum.

¹⁷Nimi nidyaʾ nim ek perobaʾ lelelulum. Ugun neik yuba dololum nim ek nauba wanaʾ ulusululum. Imik Neyung ak dib senewoka lok ganya bolomunukanya, mok soko damnya bedya yuba pe kelelulum.

¹⁸Hemyabo nim ugun yok nimi wa wen nang dangoka ululum nim era, ugunjaʾ neyung yabo wa welelum nim edya yuba hyak nauba pe keboka unulululum. Nera heknaʾ ganya boboka pe unulusak nim ok gom, alda ugunuk yu leboka lelesak nim ek anaba neik so unulululum.

¹⁹Ugunuk hyak malya nenelesijaʾ anaba, Imik Neyung amba leboka or siklewoka ulumnelum dara, Imik Neyung adya ugunuk perob senewanasil.

²⁰Ugun malya ulusom enyek, henga geregoka igina kwelisinaʾ anyek siklewoka ulusom dara, ugunuk gigiwanasiseng de? Orok! Bok perobnya nek unululumaʾ amba leboka ugunuk igina kwelesil dara, pe siklewoka ulumun dara, wera nera Imik Neyung adya ugunuk hyak perob senewanasil.

²¹Ban nenesa leboka, Imik Neyung ara ugunuk youbsuk. Anasa Kristus ara ugunsamba leboka somogookanya, ugunda alja unaʾ diliwoululumaʾ aboka, alda ugunsamba pik dibaʾ yarawousuk.

²²”Kristus ara malya unaʾ hyak mekaʾ hnon unggululanya bek ulumok. Dara onoʾ yok nim edya anyek sondaʾ lebokaʾ ara, alak ab hnon mekaʾ kebnenggumek.”

²³Al nong ak derewoka walamek sum era, alja sikba dirigoka wabnenggubsuk. Alda igina kweboka gweklemok sum era, hekasa ulunulum aboka dirigoka obnesin wenyhenggubsuk. Alda alja nong unaʾ era, Imik Neyung pe sunuwoka unulusilnya bek elegok.

²⁴Nu nong anyek malya unaʾ adya gobuka ulusukaʾ anyek bleboka perobaʾ nenewosununaʾ aboka, anadya Imik Neyung adya unu ubseng senelelanya sunuwoka ubnokaʾ aboka, nunja malya unaʾ gong dara, Kristus adya huka boboka gal ak somogok, Kristus adya eneng menengaʾ edya ugunuk ara bleboka hwebsuk.

²⁵Youmaʾ dara, ugun nong ara weiningdangamna pam eneso ululum, bok wenyek dara, perob pama beilinaʾanya bek dobdo yeiniboka, ugunja ganya beiyiwoka bo usinya bek yeiniboka ululum.