Read Nalca 1 PETRUS 5 Bible Online

1 PETRUS 5 - Nalca bible

1 PETRUS 5

¹Nim ugun yuba dololum nimi bo usin nang ek kebnokaʾ aboka anara moloweisin. Nadya ban ugunuk momnya doboka beibsinaʾ anara, ugun kabo yuba donaʾ nimi bo usinya bedya, Kristus gwekoka somogokaʾ ara, nab okoka eibsenya bedya, anya Kristus si imik nenewanamlaʾ ara nim ek laga danamla sum era, neikaʾ unuwanasilnya bedya, ugunuk moloweisin.

²Imik Neyung adya ugunuk lebsuk domba pam danyek pe bo ulululum. Imik Neyung adya seinilamla sok sunuwoka, igin ganya bonaʾ loboka, perob ganya boboka beiyiwoka bo ulululum. Wa webnemunaʾ ara deknaʾ anyek dobnun senen ganya boboka wenggom, alda ugun nong adya aldib yok nim emba welemak nang ululumnya nenesa leboka welelulum.

³Ugunja nim enera, bo ubnelum aboka elegeisik nim ek ara, ugunja dara, senenggom dub nang edya ununaʾ enyek ununggom, mem; alda sikja ugunuk diliwanesijenya nenyek unulululum.

⁴Anya senenggomaʾ imiknya nimi bo ulusilnya yanamla sum era, ugunuk ara senedyaʾ mekaʾ habnenggunumla bonaʾ enyek, senedyaʾ yakaʾ anyek eleganesil.

⁵Dara onoʾ ugun anam goubenya ululum nang ek hnon lebnesin. Ugunjaʾ nauba so nim edya yuba pe kelelulum. Imik Neyung yub ek sam ara, ”Imik Neyung ara dengdang ganya bolomak nim ek lek senelesilikanya, sokok nenebdangoka ulumak nim ek wanaʾ ulusil,” aro momnya dobokaʾ anasa, ugunda nidyaʾ ara ganya sokok nenebdangoka pe kemeldalamnelum.

⁶Anasa wera, Imik Neyung adyaʾ migib soruk dam ak sam ganya sokok nenebdangoka ulululum. Dara, imik nenewanasil sum era, ugunda imik nenewanasil.

⁷Imik Neyung adya ugun nong ak wanaʾ ulusilaʾ anasa, ugunuk an ganya elesilaʾ nidyaʾ ara nunda unulusil aboka alak elegoululum.

⁸Bisaʾ dubnya Iblis ara alda ugunjaʾ senenggom isaʾanya ulumlaʾ anasa, ugun nonga pe diri ubdangoka mala websiniwoka ulululum. Iblis ak dara, bei gam adya denaʾ eibnenggumnekanya ngouboka ero yabalamla sok, ero yabalesilaʾ anasa keeboka uluulum.

⁹Nimi nidyaʾ nunjaʾ hemyabo mok soko me nidyaʾ sikba igina kweboka numba gweklemab sok gweklemak bok anasa, Iblis ak ara, ugunja yuba dib senen ganya enyek hyak nauba adya alak ara pe welsinilelulum.

¹⁰Wene salek enesemba ok ugunda seʾ igina kweboka gwekgogowomun dara, Imik Neyung adya alja ok ganya doboka perobaʾ nenewanasil. Imik Neyung adya ugunuk gasa geboka, migibaʾ nenewanasilikanya, ugunuk ara pe sekiyiwanesil. Anasa alda Imik Neyung ara Kristus pik uboka imik nenewanasil aboka youbusuknya bera, alda perobaʾ eleklesilnya bek anasa, ugunuk anaso pe unuwanasil.

¹¹Imik Neyung ak hnonok alak ok hyak sobaʾ or migibaʾ ulmorululul. Amin.

¹²Nadya ban burum momnya donaʾ beibsinaʾ anara, Silas benya arawoka beibsinem. Nadya dara, Silas bera nunjaʾ hem be yuba donaʾanya bojamnya bek ulumla. Nadya ban weboka beibsinaʾ anara, Imik Neyung adya perobaʾ eleklesilaʾ dibaʾ anyek, ugunuk unuwaneseng senewoka, unuwanalumaʾ anyaʾ aboka beibsin. Ugunda ban unu eleklesilaʾ anyek pe salabmoubuka ulululum.

¹³Imik Neyung adya weboka domok nimi, Babilon heikek yuba donaʾ nimi, ugunjaʾ hemyab edya, ugunuk perob aboka giboka beibsak. Dara onoʾ nadya wanaʾ ulunanya Markus bedya ugunuk hnon gibsil.

¹⁴Ugun moumen anaba Imik Neyung yuba dolomak nimi beknaʾ dolululaʾ aboka, nadyaʾ hemyab aboka gibdangoka ulululum. Dara, Imik Neyung adya Kristus mabo silibaʾ dangalum nim ek heknaʾ ganya ara sobaʾ ulusulul. Nadya Petrus bedya seleb lebna.